ދިވެހި ވީޑިއޯ ލަވަތަކުން އެންމެ ބޮޑު މަޤްބޫލުކަމެއް، އޭރުވެސް އަދި މިހާރުވެސް ލިބިފައިވާ އެއް ލަވައަކީ ޝިރާނީ އާއި ގިޔާސްގެ ފަރި އަދި އެހާމެ ސަކަ ނެށުން ތަކެއް ފެނިގެންދާ “މަ ހޭނެތިދާނޭ” މި ލަވައެވެ. ނަމަވެސް މިއީ ހިންދީ ވީޑިއޯ ލަވައެއްގެ މަންޒަރުން މަންޒަރަށް ނަކަލު ކޮށްފައިވާ ލަވައެކެވެ.

 

“މަ ހޭނެތިދާނޭ” ލަވައިގައި ޝިރާނީ އާއި ގިޔާސްގެ ހުރިހާ ސްޓެޕެއް ނަކަލު ކޮށްފައިވަނީ 1994 ގައި ނުކުތް ހިންދީ ފިލްމު “އޭލާން” ގެ އެންމެ ރީތި އެއްލަވަ، “ސުބާ ހުއީ ޝާމް ހުއީ” ގައި އަކްޝޭ ކުމާރާއި ތަމަޅަ އެކްޓްރެސް މަދޫ ނަށާފައިވައިވ ނެށުމުންނެވެ.

 

“މަ ހޭނެތިދާނޭ” ލަވަ އެންމެ ފުރަތަމަ ފަހަރަށް ޓެލެވިޛަން މޯލްޑިވްސް އިން ދެއްކުމުގެ ކުރިން، ޕްރީ ޝޯގައި ގިޔާސް ބުނީ ލަވައިގެ ހުރިހާ ސްޓެޕެއްވެސް ނަގާފައިވަނީ އޭނާ އަމިއްލައަށް ކަމަށެވެ. ހިންދީ ލަވައަކުން ނަކަލުކުރި ކަމަށް އިޝާރާތް ކޮށްފައެއް ނުވެއެވެ.

 

“މަ ހޭނެތިދާނޭ” އާއި “ސުބާ ހުއީ ޝާމް ހުއީ” އެއްކޮށްލައިގެން ހަދާފައިވާ ލަވައެއް ‘ވައިރަލް މޯލްޑިވްސް’ ފޭސްބްކް ޕޭޖުން ވަނީ އާއްމުކޮށްފައެވެ. ތިރީގައި މި ހިމަނައިލަނީ އެ ލަވައެވެ. ނަކަލުކޮށްލާފައިވާ މިންވަރު ވަޒަންކޮށްލަން ލަވަ ބަލައިލަމާ ހިނގާށެވެ.

މި ލަވަ ނޫނަސް ދިވެހި ވީޑިއޯ ލަވައިގެ ގިނަ ލަވަތަކެއް ކޮޕީކޮށްފައި ހުރެއެވެ. މަޝްހޫރު ޑައިރެކްޓަރުން ހަދާފައިވާ މަޝްހޫރު ލަވަތައްވެސް އެބަހުއްޓެވެ. “ގޮވިއްޖެ ނަދުރު މިރޭ” ގެ ނަމުގައި ފެނިގެންދިޔަ ވީޑިއޯ ލަވައިގެވެސް ހުރިހައި ސްޓެޕްތަކެއް ކަހަލަ ގޮތަކަށް ނަކަލު ކޮށްފައިވަނީ ތަމަޅަ ލަވައަކުންނެވެ.

 

މަޝްހޫރު ލަވަކިޔުންތެރިޔާ އަލީ ރަމީޒް ކިޔާފައިވާ “މި ރާއްޖޭގެ ސާފު ވައި ލިބި…” މި ލަވައަކީ ވެސް ތަމަޅަ ރާގެއްގެ ކޮޕީއެކެވެ. ލަވައިގެ ޅެންވެރިކަންވެސް ހުރީ ތަމަޅަ ލަވައިގައި ކިޔާފަދަ ވާހަކަތަކެއް ރާއްޖޭގެ މާހައުލަށް ފައްތައިގެން ބޭނުންކޮށްފައެވެ. އެވަރަކުން އަދި ނިމުނީކީ ނޫނެވެ. ލަވައިގެ ހުރިހައި ސްޓެޕެއް، ލަވައިގެ ސްޓޯރީ، އެކްޓަރުންގެ ފޭޝަލް އެކްސްޕްރެޝަން ވެސް ހުރީ ނަކަލުކޮށްފައެވެ.

https://www.youtube.com/watch?v=4gaoQR5CfhI

ދަސްކުރުމުގައި ނަކަލު ކުރުމަކީ މައްސަލައެއްވެސް ނޫންތާއެވެ. ނަމަވެސް ނަކަލުކޮށްފައި ވާނަމަ އެކަން ހާމަކުރުމަކީ ކުރަން ޖެހޭނެ ކަމެކެވެ.

 

ދިވެހި ފިލްމީ ދާއިރާގެ ހިނގައިގަނެވުނު ދައުރުގައި އެފަދަ ކަންތައްތައް އާއްމުވެފައި ހުއްޓަސް މިހާރު، އަމިއްލަ އުފެއްދުންތައް ފެންނަމުން އަންނަކަމީ ފިލްމީ ދާއިރާ ފުރާފުރިހަމަ ވުމަށް ފައިއަޅަމުން އަންނަކަމުގެ ހެއްކެކެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: