އެނގޭ ހެއްޔެވެ؟ ދިވެހިރާއްޖޭގައި ވީޑިއޯކެސެޓް ރެކޯޑަރ (ވީސީއާރް) އާއި ވީޑިއޯ ކެސެޓް ޕްލޭޔަރ (ވީސީޕީ) އާއި ބައިސްކޯފްދައްކާފޮށި (ފިލްމުދައްކާ ޕްރޮޖެކްޓަރ) ގެންގުޅުމުގެ ޤާނޫނެއް ކުރީން އޮވެއެވެ. އެ ޤާނޫނޫގެ ދަށުން މިތަކެތި ގެންގުޅެވެނީ ރެޖިސްޓްރީ ކޮށްގެންނެވެ. ރެޖިސްޓްރީ ނުކޮށް މިތަކެތި ގެންގުޅުމަކީ ޤާނޫނީ ކުށެކެވެ.
މިޒަމާނުގެ ކުދިންނަށް މިކަމަކީ ވަރަށް ހައިރާންވާން ޖެހޭ ކަމަކަށް ވެސް ވެދާނެ އެވެ. މިހާރު ފިހަރާއަކަށް ވަދެ ރޭޑިއޯއެއް ގަނެގެން ގެނެސް ބޭނުންކުރަން ފަށަންވީ އެވެ. ނަމަވެސް އެއް ދުވަސްވަރެއްގައި އެކަން އޮތީ ދަތި އުނދަގޫ ގޮތަކަށެވެ. ރޭޑިއޯއެއް، ވީސީއާރެއް ނުވަތަ ވީސީޕީއެއް ގަނެގެން އޭގެ ބޭނުން ކުރާން ފެށެނީ ސަރުކާރުން ކަނޑައަޅާފައިވާ އިދާރާއެއްގައި ރެޖިސްޓްރީ ކުރުމަށް ފަހުގައެވެ.
ޤާނޫނު ނަންބަރު 7/85 މިއީ އެކަމަށް އޭރު އޮތް ޤާނޫނެވެ. މި ޤާނޫނަށް ފުރަތަމަ އިޞްލާހް ގެނެސްފައިވަނީ 20 ޖުލައި 1985 ގައެވެ. އެ އިޞްލާޙް ގައި ބުނަނީ:-
ޤާނޫނުނަންބަރު 7/85 (ދިވެހިރާއްޖޭގައިވީޑިއޯކެސެޓްރެކޯޑަރާއި ވީޑިއޯކެސެޓް ޕްލެޔަރާއި ބައިސްކޯފުދައްކާފޮށި ގެންގުޅުމުގެޤާނޫން)ގެ ދެވަނަމާއްދާ ތިރީގައިމިވާގޮތަށް އިޞްލާޙުކުރުން.
2. މިޤާނޫނު ފާސްވާއިރު ރާއްޖޭގައި ބޭނުންކުރަމުންގެންދާ ވީޑިއޯކެސެޓް ރެކޯޑަރާއި ވީޑިއޯސެޓްޕްލެޔަރާއި ބައިސްކޯފު ދައްކާ ފޮށި މިޤާނޫނު ތަޞްދީޤުކޮށް ގެޒެޓް ކުރިތާރީޚުންފެށިގެން 5 މަސްދުވަހުގެ ތެރޭގައި ރަޖިސްޓަރީކޮށް ނިންމަންވާނެއެވެ.
14 ޖުލައި 1985 ދުވަހު އޮތް ރައްޔިތުންގެ މަޖްލިސްގެ 1985 ވަނައަހަރުގެ 2 ވަނަ ދައުރުގެ 2 ވަނަޖަލްސާއިން ފާސް ކުޅަ”ޤާނޫނު ނަންބަރު 5 (ދިވެހިރާއްޖޭގައި ވީޑިއޯ ކެސެޓް ރެކޯޑަރާއި ވީޑިއޯ ކެސެޓް ޕްލޭޔަރާއި ބައިސް ކޯފުދައްކާފޮށި ގެންގުޅުމުގެޤާނޫން) އަށް 1 ވަނަ އިޞްލާޙު ގެނައުމުގެޤާނޫން“ ރައީސުލްޖުމްހޫރިއްޔާ ތަޞްދީޤުކުރައްވައި، 20 ޖުލައި 1985 މިތާރީޚުގައި ގެޒެޓްކުރެވިއްޖެއެވެ.
މިހެންނެވެ.
1985-58 ރައީސް އޮފީހުން ޝާޢިއުކޮށްފައިވާ މި އިސްލާޙްގެ ދެލިކޮޕީއަކީ މިއީއެވެ. 1980 ގެ ފަހުކޮޅާއި ހަމައަށް އައިއިރުވެސް ރާއްޖޭގައި ރޭޑިއޯ އާއި ވީސީއާރް، ވީސީޕީ އަދި ބައިސްކޯފުދައްކާފޮށި، ގެންގުޅެވުނީ ރެޖިސްޓްރީ ކޮށްގެންނެވެ. މި ޤާނޫނު އުވިގެން ދިޔަ ތާރީޚެއް މުނިއަވަސް އަށް ހޯދިފައެއް ނުވެއެވެ.
ލިޔުންތެރިޔާގެ ފުރަމަލަ
