މާލޭގެ މަގެއްގެ މަތީގައި ވަރަށް ރަހުމުކުޑަކޮށް ހާނިމް މަރައިލިކަމަށް އިޢުތިރާފުވެ މަހްމޫދު އަމިއްލައަށް ފުލުހުންނާ ހަވާލުވެއްޖެެވެ. މަހްމޫދު ފުލުހުންނާއި އަމިއްލައަށް ހަވާލުވެފައި ވާއިރު، ހާނިމް މަރައިލުމުގައި މަހްމޫދާއިއެކު ބައިވެރިވި މުންތަޝިރު ހުރީ އެކަމާ ވަރަށް ކަންބޮޑުވެ، ރުޅި އައިސްފައެވެ.

މިއީ މިހާރު ބައިސްކޯފްގައި ދައްކަމުންދާ ފާތުމަތު ނަހުލާގެ ވެބްސީރީޒް “ހުވާ”ގެ 20 ވަނަ އެޕިސޯޑް، މިހާރު ކުރިއަށް ގޮސްފައިވާ ހިސާބުގައި ކަންހިނގި ގޮތެވެ. ރާއްޖޭގައި މިވަގުތު ފެތުރިފައިވާ އެންމެ ބޮޑު އިޖްތިމާޢީ ކަންބޮޑުވުން ކަމަށްވާ މީހުންމެރުމުގެ މައްސަލަ، “ހުވާ” ސީރީޒްގެ މައިގަނޑު ޕްލޮޓެއްގެ ގޮތުގައި ގެނެސްދެމުން އަންނައިރު، ސީރީޒް އަށް ލިބެމުންދާ ތާއިދު، ދުވަހެއް ދުވަހަކަށްދަނީ އިތުރުވަމުންނެވެ.

ވެބްސީރީޒް “ހުވާ” ގައި މުންތަޝިރުގެ ރޯލުން ފެންނަ ފުބޫ – ފޮޓޯ: ހުވާ ގެ އެޕިސޯޑް 20 ން ނަގާފައިވާ ސްކްރީން ޝޮޓެއް

ރޭ ދެއްކި ވިހިވަނަ އެޕިސޯޑުން ފެނިގެންދަނީ، 19 ވަނަ އެޕިސޯޑު ނިމުނު ހިސާބުންނެވެ. ޝީޒާ (ޝީލާ ނަޖީބް) އޭނާގެ ފިރިމީހާ ހާނިމް (ޔޫއްޕެ)ގެ ޤާތިލު، މަހްމޫދު (ރިފްޝާން) ގެ އެޕާޓްމެންޓަށް ގޮސް އިނދެ، އޭނާގެ ފިރިމީހާ މަރައިލީ ކީއްވެގެންތޯ ސާފުކުރުމަށާއި މަރުވުމުގެ ކުރިން ފިރިމީހާގެ ލޮލަށް އެންމެ ފަހުވަގުތު ފެނުނު މީހާ، މަހްމޫދު ދެކެލުމަށް ގޮސް އިންނަ މަންޒަރު ފެނިގެންދާ ވަރަށް އަސަރުގަދަ މަންޒަރުތަކާއި ހަމައިންނެވެ.

ވެބްސީރީޒް “ހުވާ” ގައި ޝީޒާގެ ވާހަަތައް އަޑުއަހަން މަހްމޫދު – ފޮޓޯ: ހުވާ ގެ އެޕިސޯޑް 20 ން ނަގާފައިވާ ސްކްރީން ޝޮޓެއް

“މަށަކަށް ނޭނގެ މަހްމޫދުގެ ކޮއްކޮއެއް، ދައްތައެއް، އަނތްބެއް، މަންމައެއް ހުރިކަމެއްވެސް. އެހެންވެކަންނޭނގެ އަހަންނާ ދިމާލަށް ތިހާ ފަސޭހައިން ތި ބުނެވުނީ، ރޭޕްކޮށްލެވިދާނޭ. ކޮށާލެވިދާނޭ. އެހާ ރީތިކޮށް އުޅެމުން އައި ދިރިއުޅުމެއް ހަލާކުވެގެން ދިޔައިމަ، ….. އެހާ ލޯބިން އުޅުނު މީހެއް ކުއްލިއަކަށް ވަކިވެގެން ދިޔައިމަ….. އާއިލާ މީހުންނާ، މަންމަޔާ، ކޮއްކޮޔާ، ދަރިފުޅާ އަންހެނުންނަށް ކުރާނެ އިހްސާސް…… މަހްމޫދަށް އިހްސާސްކުރަން އެނގޭނަމަ، …. މަހްމޫދު އެވަރުކަމެއް ނުކުރާނެ. އަހަރެން މަހްމޫދު ކުށްވެރިކުރަނީކީއެއް ނޫން. ތީ މަހްމޫދު އުފަންވިއިރު ހުރި ސިފައެއް ނޫން. ދިރިއުޅުމުގެ ކޮންމެވެސް ހިސާބަކުން ދިމާވި ހިތި ތަޖުރިބާތަކުގެ ތެރެއިން މަހްމޫދުގެ ހިތް ހިލަގަނޑަކަށް ވެފަހުރުން އެކަށީގެންވޭ. އޭގެ ފަހަތުގަ ޒިންމާވާންޖެހޭ ބަޔަކު ތިބޭނެ. އަހަރެން އެކަން ޤަބޫލުކުރަން.

އަހަރެންގެ ހަ އަހަރުގެ ފިރިހެން ކުއްޖެއްވެސް އެބަހުރި. އަހަރުން ދެމަފިރިން މަސައްކަތް ކުރަމުން އައީ ދަރިއަކަށް ދޭންވާ ހުރިހާ ލޯތްބެއް ދީގެން. ރަނގަޅު ތަރުބިއްޔަތު ދީގެން. ދަރިފުޅަކީ މުހިންމު މީހެއްކަން ދަރިފުޅަށް އިހްސާސްކޮށްދީގެން. ލޯބިވާކަން ތަކުރާރުކޮށް އަންގަދީގެން. އުފާވެރި ރަނގަޅު ދަރިއަކު ބޮޑުކުރަން. އެއީކަންނޭނގެ މަހްމޫދަށް އުނިވި އެއްޗަކީ. އެކަން އެންމެ ރަނގަޅަށް އިހްސާސް ކުރެވޭނީ މަހްމޫދަށް.“

ވެބްސީރީޒް “ހުވާ” ގައި ޝީޒާ – ފޮޓޯ: ހުވާ ގެ އެޕިސޯޑް 20 ން ނަގާފައިވާ ސްކްރީން ޝޮޓެއް

ވަރަށް އަސަރާއެކު ޝީޒާގެ ހިތުގެ ޝަކުވާތައް މަހްމޫދަށް ކިޔައިދެމުން ދިޔައިރު، މަހްމޫދު އެވާހަކަތައް އަޑުއަހަން އިނދެއެވެ. ކިތަންމެ ނޫންގޮތަކަށް ނަމަވެސް ވެހެވެ. ކިތަންމެ ހިތްހަމަ ނުޖެހިފައި އިން މޫޑެއްގައި އިން ނަމަވެސް މެއެވެ. ނަމަވެސް “.…..އެކަން އެންމެ ރަނގަޅަށް އިހްސާސް ކުރެވޭނީ މަހްމޫދަށް.” ކަމަށް ޝީޒާ ބުނާ ހިސާބުން މަހްމޫދު ހަޅޭއްލަވައިގެންފައި ވާހަކަދައްކަން ފަށައެވެ.

“މާ ވާހަކަ ގިނަނުކުރޭ! ގަދަކަމުން ނެރެލެވިދާނެ!” މަހްމޫދު އިންޒާރު ދެއެވެ. ނަމަވެސް ޝީޒާ ދައްކަން ދިޔަ ވާހަކަތައް ދައްކައި ނިންމަން އަޒުމް ކޮށްގެން އިނީތީ އަނެއްކާވެސް ވާހަކަދައްކަން ފަށައެވެ. އެންމެފަހުން މަހްމޫދު ކައިރިން އެދެނީ ހާނިމް މަރުވުމުގެ ކުރިން، އެންމެ ފަހު ބަހަކަށް ހާނިމް ބުނީ ކީކޭކަން ބުނެދިނުމަށެވެ. އާދޭސް ކޮށް ރޯން ފަށައެވެ. އެތަކެއް ސުވާލުތަކެއް މަހްމޫދާ ކުރެއެވެ. އެންމެ ފަހުން، މަހްމޫދުގެ ރުޅިގަނޑު އިންތިހާއަށް ގޮސް ވަރަށް ބާރަށް ހަޅޭއްލަވައިގެންފައި އެތަނުން ނުކުމެގެން ދިއުމަށް އިންޒާރުދެއެވެ. އެތަނުން ދިއުމަށް ޝީޒާ ހިނގައިގަންނަ ހިސާބުން މަހްމޫދުގެ އަނގައިން ހަމަ އެންމެ ލަފުޒެއް ބޭރުކޮށްލައެވެ.

“ޝީޒާ“

އެޕާޓްމެންޓުގެ ދޮރާއި ހަމައަށް ދެވިފައި ހުރި ޝީޒާ ވަރަށް އަސަރާއި ހައިރާންކަމާ އެކު ހުއްޓި، މަހްމޫދަށް ބަލައިލައެވެ.

ޝީޒާ އާއި ހަތަރުކަޅި ހަމަކޮށްގެން ވާހަކަދައްކަން ނުކެރިފައި ހުންނަ މަހްމޫދު އިސްދަށަށް ޖަހައިގެން ހުރެ އަނެއްކާވެސް “ޝީޒާ” މިހެން ބުނެލައެވެ.

“އެންމެ ފަހުން ބުނީ އެހެން.” ހިލަހިތެއްގެ ވެރި މަހްމޫދު، ޝީޒާ ކުރި ސުވާލަށް ފުރިހަމަ ޖަވާބެއް ދެއެވެ.

މިއީ ރޭގެ އެޕިސޯޑުން ފާހަގަވެގެންދިޔަ ވަރަށް އަސަރުން ފުރިގެންވާ، އަދި އެހާމެ ޢިބްރަތްތެރި މަންޒަރެކެވެ. މިފަދަ މަންޒަރެއް އެހާ ފުރިހަމައަށް ޝީލާ އަށް ކުޅެވިފައި އެވަނީ، ޙަޤީޤީ ދިރިއުޅުމުގައި އެފަދަ ހިތްދަތި މަންޒަރެއް ފެނި، އެކަމަކުގެ ފުން ހިތާމައާއި ކުރިމަތިލާން ޖެހިފައިވީ ހިނދުއެވެ. ޝީލާގެ ބައްޕަ، މަޝްހޫރު ޤާނޫނޫ ވަކީލު މަރްހޫމް އަޙްމަދު ނަޖީބް ވަރަށް ރަހުމްކުޑަގޮތަކަށް މަރާލާފައިވަނީ 2012 ވަނަ އަހަރު ޖުލައި މަހުގައެވެ.

ދިވެހި މުޖުތަމަޢުގައި މާރާމާރީ ހިންގައި، މީހުން މަރައި އުޅޭ މީހުން ވިސްނާލަން ޖެހޭ، ވަރަށް މުހިންމު ވާހަކަތަކެއް މި އެޕިސޯޑުން، ވަރަށް އަސަރާއިއެކު، ނުހަނު ފުރިހަމަކޮށް ފެނިގެންދެއެވެ.

ހުވާ އަކީ މުއްސަނދި، އުފާވެރި އާއިލާއެއްގެ ދިރިއުޅުމުގެ އުފާވެރިކަން ވިއްސި ވިހާލިވެގެންދާގޮތް ދައްކުވައިދޭ ސީރީސް އެކެވެ. “ހުވާ” ގެ މައިގަނޑު ހާދިސާއަކީ ރާއްޖޭގައި މިހާރު އާންމުވެފައިވާ އިޖުތިމާއީ ބޮޑު މައްސަލައެއްގެ ސަބަބުން އެ އުފާވެރި އާއިލާގެ އުފާވެރިކަން ކުއްލިއަކަށް ފުޑުފުޑުވެ ދިއުމަށްފަހު ދެން ކަންތައްތައް ވެގެންދާ ގޮތް ދައްކުވައިދޭ ވެބް ސީރީޒްއެކެވެ.

“ހުވާ” ގައި ޖުމްލަ 80 އެޕިސޯޑު ހިމެނޭއިރު އެ ސީރީޒްގައި ރާއްޖޭގެ ފިލްމު އިންޑަސްޓްރީގައި މިހާރު ހަރަކާތްތެރިވަމުން އަންނަ 80 އިންސައްތަ ތަރިން ފެނިގެންދާނެއެވެ. ފާތުމަތު ނަހުލާއަކީ މުޖުތަމަޢުގައި ހުންނަ މިފަދަ މައްސަލަތައް ނުހަނު އަސަރުގަދަކޮށް ބެލުންތެރިންނާއި ހަމައަށް ލިޔެ، ފިލްމެއްގެ ސިފައިގައި ގެނެސްދެމުން އަންނަ މޮޅު ފަންނާނެކެވެ. މޮޅު ސްކްރީން ރައިޓަރެކެވެ. މޮޅު ޑައިރެކްޓަރެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: