މިއަހަރު ނިކުންނާނެ އެންމެ ވަރުގަދަ، ބޮޑު ފިލްމުކަމަށް ބެލެވޭ “40+” ޕްރިމިއާ ކުރަން ކުރިން ހަމަޖެހިފައިވާ 27 ފެބްރުއަރީގެ ބަދަލުގައި 05 މާރިޗަށް ބަދަލުކުރީ ފެބްރުއަރީ 27 އަދި 28އަށް އެންސީއޭގެ ރަސްމީ ބޭނުމަކަށް އޮލިމަޕްސް ބޭނުންވެގެން އެކަމަށް އެދުމުން ކަމަށް “40+”ގެ ޕްރޮޑިއުސަރ ބުނެފިއެވެ.

މުނިއަވަސް އަށް މަޢުލޫމާތު ދެމުން ފިލްމުގެ ޕްރޮޑިއުސަރ އިސްމާޢީލް ޝަފީޤް ބުނީ  ފިލްމު އަޅުވަން އޮތް ތާރީޚް ފަސްކޮށްލީ އެންސީއޭ އާ ގުޅިގެން ޗައިނާ ބަޔަކު ހިންގުމަށް ނިންމާފައިވާ ހަރަކާތަކަށް އޮލިމްޕަސް ބޭނުންވެގެން އެބޭފުޅުން އެދިލެއްވުމުން ކަމަށެވެ.

“ފިލްމުގެ މަސައްކަތް ނުނިމިގެން، ނޫނީ އެހެން ކަމެއް ދިމާވެގެނެސްވެސް ނޫން. ޗައިނާ ކޮންމެވެސް ބައެއް ބާއްވާ އިވެންޓަކަށް އޮލިމްޕަސް ބޭނުންވާތީ އެންސީއޭއިން އެދުމުން، އެބޭފުޅުންނަށް އެއްބާރުލުން ދިނުމަށް މިހެން މި ނިންމީ.” އިއްޔެ މެންދުރެއްހާއިރު މުނިއަވަސް އަށް ޝަފީޤް ބުންޏެވެ.

ދިވެހި ފިލްމީ ދާއިރާ ހީނަރުކޮށްލުމަށް މަސައްކަތް ކުރަމުން އަންނަ “ފިލްމީ ދުނިޔެ” ފޭސްބްކް ޕޭޖްގައި ޖަހާފައިވާ ޚަބަރަކާއި ގުޅިގެން ފިލްމީ ފަންނާނުންގެ ފާޑުކިޔުންތައް މިރޭ އަމާޒުވެފައިވާއިރު، އެ ޕޭޖުން ބުނީ ޓިކެޓް ނުވިކުމުން ކެންސަލް ކުރީ ކަމަށެވެ. ނަމަވެސް މުނިއަވަސް އަށް މިރޭ ފިލްމުގެ ޕްރޮޑިއުސަރު ބުނީ އެސްއެމްއެސް ކޮށްގެން ޓިކެޓް ބްކިންއަށް ފުރުޞަތު ހުޅުވައިލިތާ ފަސްވަރަކަށް ދުވަސް ވެފައިވާއިރު މިހާރު ފުރަތަމަ ތިން ޝޯ އެއްކޮށްކަހަލަ ގޮތަކަށް ބްކިން ހަދާފައިވާކަމަށެވެ.

“ފިލްމު އަޅުވާ ތާރީޚް ފަސްކޮށްލިޔަސް، މިހާރު ހަދާފަ ހުރި ބްކިންތައް ކެންސަލެއް ނުވާނެ. މިހެން ތާރީޚް ބަދަލުކޮށްލުމުން ކުރިން ބްކިން ހަދާފައިވާ ފަރާތްތަކަށް މިހާރު ހަމަޖެހިފައިވާ ޑޭޓަށް ނާދެވޭ ކަމަށްވާނަމަ، ބޭނުން ޑޭޓަކަށް ޗޭންޖް ކޮށްލުމަށްވެސް ފުރުޞަތު އޮންނާނެ.” މިހައިތަނަށް އެންމެ ގިނަ ސްޓާރުން ލައިގެން ފިލްމު ހެދުމުގައި ދެމިހުރި ޕްރޮޑިއުސަރ ޝަފީޤް ބުންޏެވެ.

ޝަފީޤް އިތުރަށް ބުނީ ބްކިން ހައްދާފައި ހުއްޓަސް، ޓިކެޓް ވިއްކަން ފަށާތާ ދެދުވަސް ތެރޭގައި، ހައްދާފައިވާ ބްކިން ކެންސަލް ވުމަކީ އެކަށީގެންވާ ކަމެއް ކަމަށެވެ. އެހެންކަމުން ޓިކެޓް ވިއްކަން ފެށުމާއެކު ވީއެންމެ އަވަހަކަށް ޓިކެޓް ނެގުމަށްވެސް ހަނދާންކޮށްދިނެެވެ.

“40+” އަކީ ޔޫއްޕެގެ ޑައިރެކްޝަންގެ ދަށުން ހަދާފައިވާ ކާމިޔާބު ކޮމެޑީ ފިލްމު “ނޯޓީ40” ގެ ސީކުއަލް އެކެވެ. ނަމަވެސް މިފަހަރު ފިލްމުގެ ޓީމުން ގެނެސްދޭ “40+” އަކީ ރާއްޖޭގައި މީގެ ކުރިން ނެރެފައިވާ ނުވާ ‘ޖޮންރާ’ އެއް ކަމަށްވާ ހޮރަރ ކޮމެޑީއެކެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: