“ފިނިފެންމަލާ ރޯޅިން ނަށާލާ ފިޔަތައް ތި ނާޒުކު ފެނިފާ އަހަންނަށް

ޖަޒުބާތުގާ ދެން ސިއްރެއް ބުނަންހޭ ތިޔަމާ މަށަށް ހާދަހާ ރީއްޗޭ”

މިއީ ފިލްމު “ފޯޓީ ޕްލަސް“ގައި ސާޅީހުން މައްޗަށް ދިޔައިމަ ލާނެތްވެގެން އުޅޭ އެއް ކެރެކްޓަރ، ވިރުވައި އަޅާލާ ޅެންބައިތެކެވެ. މަޝްހޫރު އެކްޓަރ އަޙްމަދު ސައީދު، ކޮންމެވެސް ބިޓެއް ސެޓްކުރުމަށް ޅެންބައިތެއް ‘ފަޅާލަނީ’ އެވެ. މި ފިލްމުގައި ސައީދުގެ ކެރެކްޓަރގެ ގޮތުން މިފަދަ މޮޅެތި ޅެންބައިތުތައް، ދޭތެރެއަކުން ފަޅާލާފައި ވިރުވާ އަޅާލާކަމަށް “ފޯޓީ ޕްލަސް” ގެ ފޭސްބްކް ޕޭޖުން ރޭ ނެރެފައިވާ ވީޑިއޯކޮޅުން ދޭހަވެއެވެ. ނަމަވެސް މި ވާނުވާއެއް އެނގޭނީ 05 މާރިޗްގައި ފިލްމު ބަލައިލުމުން ދޯއެވެ.

މާވަރުގަދަ ޅެންބައިތެއް ސައީދު ކިޔާ ސީންއަށް ފަހުން، ދެން ފެނިގެންދަނީ ޝީލާ އާއި އަޒޫ ކޮންމެވެސް މީހެއްގެ އަސަރުގަދަ އަޑުގެ ޖާދޫގައި ޖެހިގެން އުޅޭ މަންޒަރެކެވެ.

“އޭނަގެ އެހެރަ އަސަރުގަދަ އަޑު.” އުނދޯއްޔެއްގައި އިނދެފައި ތެދުވެ އޮޅެމުން ނިއުޅެމުން ޝީލާ ތުއިގޮތަކަށް ބުނެލައެވެ.

“އޭނަގެ އެހެރަ ޖަޒުބާތީ ބަލައިލުން… ހިތަށް އަރާ ހަމަ، (އަސަރުގަދަ އަޑެއް ލައްވައިލަމުން) -” އެހެން އުނދޯއްޔެއްގައި އިން އަޒޫވެސް ތެދުވެ ދެކޮލުގައި އަތްއަޅައި، ހީރޯޅިއަޅަމުންދާ ހާލުގައި ކޮންމެވެސް މީހެއްގެ ޖަޒުބާތީ ބަލައިލުމަކަށް ތަޢުރީފު ކުރަން ފަށައެވެ. ވަކިހިސާބަކުން، ކަމަކަށް ގެއްލިފައި އިނދެ ޝީލާ “ކީކޭ ހިތަށް އަރަނީ؟” އޭ ބުނެ އަޒޫގެ ވާހަކައަށް ސުވާލު ކުރެއެވެ.

“ހިތަށް އަރަނީ…” އަޒޫ ތުއިވެލަމުން ކިޔައިދޭން ފަށައެވެ. ނަމަވެސް ކުޑަކޮށް ހަސަދަވެރި ރާގެއްގައި “ކީކޭ ހިތަށް އަރަނީ؟” އޭ ބުނެ ޝީލާ ސުވާލުކުރެއެވެ.

މިއީ މިހައިތަނަށް އެންމެ ގިނަ ތަރިން ހިމަނައިގެން ކާމިޔާބު ފިލްމު ހެދުމުގެ މަސައްކަތް ކުރަމުން އަންނަ ޕްރޮޑިއުސަރު އިސްމާއީލް ޝަފީގް އަދި ޔޫއްޕެއާއި އޭނާގެ ޓީމުން ނެރުމަށް ތައްޔާރުވެފައިވާ ހޮރޯ ކޮމެޑީ “ފޯޓީ ޕްލަސް” ގެ ނުރަސްމީ ޓީޒާއެކެވެ.

“ފޯޓީ ޕްލަސް”ގެ ޓިކެޓް ވިއްކުން ކޮންމެ ދުވަހަކު މެންދުރު ފަހު 2:00 އިން ހަވީރު 6:00 އަށް އަދި ރޭގަނޑު 8:00 އިން 10:00 އަށް ވަރަށް ބާރަށް ކުރިއަށް އެބަދެއެވެ. ޓިކެޓް ވިއްކަނީ 100ރ. އަށެވެ. ޓިކެޓް ބްކިން ހެއްދުމަށް 7384040 އަށް އެސްއެމްއެސް ކުރުމުން ޓިކެޓް ލިބުމުގެ އިންތިޒާމު ހަމަޖެހޭނެއެވެ. ޓިކެޓް ވިއްކަން ފެށި ނަމަވެސް “ފޯޓީ ޕްލަސް”ގެ ހޮޓްލައިނަށް ގުޅައިގެން މިހާރުވެސް ޓިކެޓް ބުކިން ހެއްދޭނެ ކަމަށް ފިލްމުގެ ޕްރޮޑިއުސަރ ޝަފީޤް ބުނެއެވެ.

އިސްމާޢީލް ޝަފީޤް ބުނީ އޮލިމްޕަހުގައި މި ފިލްމުގެ 20 ޝޯ ދައްކަން އަމާޒު ހިފާފައިވާ އިރު، މާލެ އާއި ހުޅުމާލޭގެ ޝްވެކް ސިނަމާގައި ވެސް “ފޯޓީ ޕްލަސް” އަޅުވަން ވާހަކަ ދައްކަމުން އަންނަ ކަމަށެވެ. އަތޮޅު ތެރެއިން އެންމެ ފުރަތަމަ ފިލްމު އަޅުވަން ހަމަޖެހިފައި ވަނީ ހދ. ކުޅުދުއްފުށީގައި އަންނަ މަހު 17ގަ އެވެ.

“ފޯޓީ ޕްލަސް” އަކީ 2016 ގައި ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް އަދި މުހިއްމު ރޯލެއް ވެސް ކުޅުނު ކޮމެޑީ ފިލްމު “ނޯޓީ 40” ގެ ދެވަނަ ބައެވެ.

ފިލްމު ޝޫޓްކޮށްފައިވަނީ ތ. ބުރުނީގައެވެ. ފިލްމުގެ މައިގަނޑު ތަރިން ކަމަށްވާ ޔޫއްޕެ، އަލީ ސީޒަން، މުހައްމަދު މަނިކް، އަހުމަދު ސައީދާއި އޭނާގެ އަންހެނުން ފާތިމަތު އަޒީފާ (އަޒޫ) އަދި އަލީ އާޒިމް (ދޮންއައްޔަ) މި ފިލްމުން ފެނިގެން ދާނެ އެވެ. މީގެ އިތުރުން މަޝްހޫރު ތަރިންގެ ތެރޭގައި ޝީލާ ނަޖީބް، މުހައްމަދު ފައިސަލް، މަރިޔަމް ޝަކީލާ އަދި އަހުމަދު އީސަ (އާނަންދު) ވެސް ހިމެނެ އެވެ. “ފޯޓީ ޕްލަސް” އަށް ޚާއްޞަކޮށްގެން ބޭއްވުނު އޮޑިޝަނަކުން ހޮވުނު އާ ތަރިންތަކެއްވެސް މި ފިލްމުގައި ފެނިގެންދާނެ އެވެ.

“ފޯޓީ ޕްލަސް” އިން ފިލްމީ ދާއިރާއަށް އަލަށް ނިކުންނަ ފަންނާނުން – ފޮޓޯ: ފޯޓީ ޕްލަސް

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: