“ގޮށްރާޅު” ފިލްމާއެކު ދިވެހި ސިނަމާގެ މަލަމަތި ބަދަލުކޮށްދީ ‘ފަސްތަރީގެ ބްލޮކްބަސްޓާ’ އެއްގެ ޝަރަފުވެރި ލަޤަބާއިއެކުގައެވެ. ރާއްޖޭގެ ހުރިހައި ސަރަހައްދަކަށް ގޮށްރާޅު އަރަމުންދާއިރު ފިލްމަށް އޮހެމުންދަނީ ތަޢުރީފުގެ ބަސްތަކެވެ. ވަރުގަދަ ކްރައިމް ތްރިލާ “ގޮށްރާޅު”ގައި ހިމެނޭ އެކްސްޓެންޑެޑް ޕްރިވިއުއެއް އާންމުކޮށްލައި ފިލްމު ނުބަލައި ތިބި މީހުންގެ ސްމާޓް ފޯނުތަކާއި ހަމައަށް “ގޮށްރާޅު” ގެ އަސަރު މިއަދު އަނެއްކާވެސް މިވަނީ އިތުރަށް ފޯރާފައެވެ.

ޑާކްރެއިން އެންޓަޓެއިންމަންޓުން މިއަދު އާންމުކޮށްފައިވާ ފިލްމުގެ މަންޒަރުން ފެނިގެންދަނީ ޖުމައްޔިލް ނިމާލް (އައިމަން) ރުޅި އައިސް ހުރެ ގޭންގު ބަޔަކަށް ފިސާރި ވަރުގަދައަށް ހަމަލާ ދޭ ތަނެވެ. ގޭންގްގެ މީހުންވެސް ދިފާއުގައި އެންމެ ތަންފުކެއް ދޫނުކޮށް އައިމަން އަށް ހަމަލާދޭ މަންޒަރު ސިފަކޮށްދީފައިވަނީ އަސްލާއި ނުހަނު އެއްގޮތަށެވެ. ހިންދީ ފިލްމުތަކުގައި ހުންނަ ‘ފޭކް’ ޕިޝުން ޕިޝުންގެ އަޑުތައް ނުލައި ޙަޤީޤީ ފައިޓެއްގައި ކަންތައްތައް ވެގެންދާނެ ގޮތް ފިލްމުގެ ޑައިރެކްޓަރ ޝިނާން ގެނެސްދީފައިވާލެއް ނިކަން ފުރިހަމައެވެ.

މިއަދު އާއްމުކޮށްފައިވާ މަންޒަރުތަކުން، ގޭންގު މީހުން އައިމަން އަށް ހަމަލާދީ އޭނާ ޒަހަމްކޮށްލާ މަންޒަރުފެނިގެންދާއިރު ހަސަން އިރުފާން (ހުޝާމް) ކޮންކްރިޓް ޝީޓެއްގެ ބައެއް ފަދަ އެއްޗަކުން އައިމަންގެ ބޮލަށް ވަރުގަދަ ހަމަލައެއްދޭ މަންޒަރު ވިޒުއަލް އިފެކްޓްސް ގެ ހިތްގައިމު ކަމާއެކު ފެނިގެންދަނީވެސް އެހާމެ މޮޅަށެވެ.

ފިލްމުގެ ޑައިރެކްޝަނާއި ވިޒުއަލް އިފެކްޓް ހެދީ އަޙްމަދު ޝިނާން އެވެ.

“ގޮށްރާޅު”ގެ އިތުރު ޝޯތަކެއް މި މަހުގެ 21 އިން 23 އަށް އޮލިމްޕަހުގައި ދެއްކުމަށް ވަނީ ނިންމާފައެވެ. އެ ތިން ޝޯއަށް ވެސް ޓިކެޓް ވިއްކަމުންދާއިރު 9911229 އާ ގުޅައިގެން ވެސް ޓިކެޓްގެ ކަންތައް ހަމަޖެއްސޭނެ ކަމަށް ފިލްމުގެ ޕްރޮޑިއުސަރު މުހައްމަދު އަލީ (މޮގާ) ބުންޏެވެ. އެ ތިން ޝޯ ވެސް ދައްކާނީ ރޭގަނޑު 21:00ގަ އެވެ.

މީގެ އިތުރުން އަތޮޅު ތެރޭގެ ރަށްރަށުގައިވެސް މި ފިލްމު އަންނަނީ ދައްކަމުންނެވެ. ލ. ގަމާއި ފޮނަދޫގައި މިމަހު 21 އަދި 22 ގައި ޝޯއެއް ދައްކާއިރު، އެހެން ހިސާބުތަކުގައިވެސް ފިލްމު ދައްކަމުން އަންނަކަން ފާހަގަކޮށްލެވެއެވެ.

ފިލްމުގެ ލީޑް ރޯލުން ފެނިގެންދާ ޖުމައްޔިލްގެ އިތުރުން މި ފިލްމުން ދެން ފެނިގެންދާނީ މިދާއިރާއަށް އަލަށް ތަޢާރަފްވާ ހަސަން އިރުފާން (ޒަކިއްޓެ)، އާއި ޢައިޝަތު ތަސްނީމާއެވެ. މީގެ އިތުރުން އައިމިނަތު ރަޝްފާ، ނުޒުހަތު ޝުޢައިބު (ނުޒޫ)، ޢަބްދުﷲ އަޒާން، ނާޝިތު މުޙައްމަދު އަދި ހަމްދާން ފާރޫޤްގެ އިތުރުން މަރިޔަމް ޝަކީލާ އައި އިސްމާއިލް ރަޝީދު (ކޮޕީ އިއްސެ) ފެނިގެންދެއެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: