ރާއްޖޭގައި އެންމެ ފުރަތަމަ ދިވެހިފިލްމެއް އުފައްދާފައިވަނީ 1978 ވަނަ އަހަރު އެވެ. ޓެލެވިޛަން މޯލްޑިވްސް އިން އުފެއްދި “ޣާޒީ ބަންޑާރައިން” ފިލްމަކީ މި ދާއިރާގައި އެންމެ ފުރަތަމަ ކުރަހައިލެވުނު މަންޒަރެވެ. އެއަށްފަހު “ތިން ފިޔަވަޅު” ގެ ނަމުގައި ބޮޑުފެންވަޅުގޭ މުޙައްމަދު މުޞްޠަފާ ޙުސައިން އުފެއްދެވި ފިލްމަކީ ދެވަނައަށް އުފެއްދި ފިލްމެވެ.

ދިވެހި ފިލްމު އުފައްދަވާ ބައެއް ބޭފުޅުން ވިދާޅުވާގޮތުން ރާއްޖޭގައި އެންމެ ފުރަތަމަ އުފެއްދި ދިވެހި ފީޗާ ފިލްމަކީ ބޮޑުފެންވަޅުގޭ މުޙައްމަދު މުޞްތަފާ ޙުސައިން އުފެއްދެވި “ތިން ފިޔަވަޅު” ފިލްމެވެ. ބަހުސްކުރެވެން އޮތްކަމަށް ބައެއް ބޭފުޅުން ޤަބޫލުކުރައްވާ މަޢުޟޫއަކަށް ވާތީ އެކަމަށް އަލިއަޅުވައިލުމަށް އަޅުގަނޑުގެ ގަލަން މިވަގުތު އިންކާރު ކުރެއެވެ.

ދިވެހިފިލްމު އުފައްދަން ފެށިތާ 40 އަހަރުފުރިފައިވާ މި މުނާސަބު ދަނޑިވަޅުގައި ދިމާވާ ވަރަށް ބޮޑު އިއްތިފާޤެއް އެބައޮތެވެ. ‘ސާޅީހާއި ސާޅީސް ގުޅުމުގެ’ ބޮޑު އިއްތިފާޤެވެ. އަންނަ މާރިޗް މަހު 05 ގައި ރިލީސްކުރަން ނިންމާފައިވާ “ފޯޓީ ޕްލަސް” އަކީ ދިވެހި ފިލްމީ ތާރީޚްގައި ލިޔެވިގެންދާނެ ޚާއްޞަ ފިލްމެކެވެ. ދިވެހި ފިލްމު އުފައްދަން ފެށިތާ 40 އަހަރު ފުރި، 41 ވަނަ އަހަރަކަށް ކުރިމަތިލާފައި (ސާޅީހުން މައްޗަށް ނުވަތަ ފޯޓީ ޕްލަސް އަށް ގޮސްފައި)ވާއިރު، “ސާޅީސް” ގެ ނަން އެފިލްމުގައި ހިމެނިފައިވާ ފިލްމަކީ ރާއްޖޭގައި އެންމެ ފުރަތަމަ ނެރޭ ‘ހޮރޯ ކޮމެޑީ’ ފިލްމެވެ.

ރާއްޖޭގައި މީގެކުރިން ‘ހޮރޯ ކޮމެޑީ’ އެއް އުފެއްދިކަން އެނގޭކަށް އަޅުގަނޑު ހޯދި ހޯދުންތަކުން ފެންނާކަށް ނެތެވެ. އޮކްސްފޯޑް ބިބިލިއޮގްރަފީ ބުނާގޮތުން ‘ހޮރޯ ކޮމެޑީ’ އަކީ ބިރުވެރިކަމާއި ހެއްވާމަޖާ އެކުލެވޭ ‘ހައިބްރިޑް’ އެކެވެ. މިފަދަ ފިލްމުތަކުން ބިރުވެރިކަން ނުވަތަ ސަސްޕެންސް (ނޭވާހިފަހައްޓައިލަން ޖެހޭ މަންޒަރު)ގެ ތެރެއިން ހެއްވާ މަޖާ ކަމެއް ފެނިގެންދާނެއެވެ. މާނައަކީ އޯޑިއަންސް ހެއްވައިލާނެ އެވެ.

މިސާލަކަށް، 2016 ވަނަ އަހަރު ރިލީޒްކޮށްފައިވާ ފިލްމަކަށް ބަލައިލަމާތޯއެވެ. “ސްޕްލިޓް” އަކީ އެފަދަ ހެއްވާ މަޖާ އަދި ބިރުވެރި ވެސް ފިލްމެކެވެ. 23 ވަރަކަށް ‘ޕާސަނަލިޓީ ޑިސޯޑަރސް’ ހުންނަކަން އެނގިފައިވާ ފިރިހެނެއް، ޖަންގަލިތެރޭގައި ހުންނަ ގެއެއްގެ ތެރޭގައި 03 އަންހެން ކުދިން ކިޑްނެޕްކޮށްގެން ގެންގުޅޭ މި ފިލްމުގެ އެތަކެއް މަންޒަރެއްގައި ނޭވާ ހިފަހައްޓާލައިގެން އިންނަން ޖެހެއެވެ. ނަމަވެސް އެފަދަ ހާސްކަމެއް ނުވަތަ ބިރުވެރިކަމެއްގައި އިންދާ، ލީޑް އެކްޓަރ ކޮށްލާ ކަމަކުން ނުވަތަ އެކްޓްރެސް އެއް ކޮށްލާކަމަކުން، ހިނިއަންނަން ޖެހެނީ އެންމެ ފަހަރަކު ދެފަހަރަކު ނޫނެވެ.

ދިވެހި ފިލްމީ ދުނިޔެއިން މީގެ ކުރިން ފެނިފައިނުވާ ޖޮންރާ ‘ހޮރޯ ކޮމެޑީ’ ފިލްމެއް ބަލައިލަން ބޭނުންނަމަ، އެކަމަށް އޮތް އެންމެ ރަނގަޅު ފުރުޞަތަކީ މާރިޗް 05 ގައި އަޅުވާ “ފޯޓީ ޕްލަސް” ބަލައިލުމެވެ. މި ފިލްމުގެ ޕްރޮޑިއުސަރ އިސްމާޢީލް ޝަފީޤް ބުނާގޮތުން މިއީ “ނޯޓީ40” އަށް ވުރެން ހުރިހައި ގޮތަކުން މާ ފައްކާ ވާނެ ފިލްމެކެވެ.  “ނޯޓީ40” އާއި “ފޯޓީ ޕްލަސް” ލިޔެ ޑައިރެކްޓްކޮށް، ފިލްމުގައި މުހިންމު ރޯލެއް ކުޅޭ މަޝްހޫރު އެކްޓަރ ޔޫސުފް ޝަފީޢު (ޔޫއްޕެ)ވެސް މި ފިލްމާއިމެދު ބުނަނީ ހަމަ މިހާވަރުގަދަ ވާހަކަތަކެއްކަން ފާހަގަކޮށްލެއެވެ.

ފިލްމު އިޝްތިހާރު ކުރަމުން އަންނަނީ “ބިގެސްޓް މޫވީ އޮފް ރަ ޔަރ”ގެ ޓެގްލައިން އާއެކުގައެވެ. “ފޯޓީ ޕްލަސް“ގެ ޓީމުން މިގޮތަށް އިޝްތިހާރުކޮށްގެން ނެރުނު ފިލްމު “ނޯޓީ40” އިން ވަނީ ޔޫއްޕެ ޕްރޮޑަކްޝަން އާއި ޝައި ޕްރޮޑަކްޝަނުން ދައްކަނީ ތޯތޯ ވާހަކަތަކެއް ނޫންކަން ސާބިތުކޮށްދީފައެވެ.

ކުރިންވެސް ފާހަގަކޮށްލެވުނު ފަދައިން، ހޮރޯ ކޮމެޑީއެއް ބަލައިލަން ބޭނުމިއްޔާ، އެތަކެއް ގޮތަކުން “ސާޅީހާއި ސާޅީސް ގުޅިފައިވާ” ފިލްމަކީ “ފޯޓީ ޕްލަސް” އެވެ. ފިލްމު އެޅުވުމާމެދު ދެން އޮތީ 24 ދުވަސްކަމަށް ބަލަމާ ހިނގާށެވެ. ސާޅީހުން މައްޗަށް ދިޔައިމާ ލާނެތްވެގެން އުޅޭތަން ބަލައިލަން ވެސް މި ފިލްމު ބަލައިލަން އެބަޖެހެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: