މިއީ 2019 އަހަރުގެ ބައިނަލްއަގުވާމީ މާދަރީ ބަހުގެ ދުވަހުގެ މުނާސަބަތުގައި ޔުނެސްކޯގެ ޑިރެކްޓަރ ޖެނެރަލް މިޒީ އޯޑްރޭ އަޒޯލޭ ދެއްވި ޚިޠާބެވެ.

ދިވެހިބަހަށް ތަރުޖަމާ ކުރެއްވީ ދިވެހިބަހުގެ އުސްތާޒެއް ކަމަސްވާ މަޑުލު މުޙައްމަދު ވަޙީދު އެވެ.

“އަޅުގަނޑުމެންގެ ބަސް ކަރުނަ އަޅަނީ އެ ބަހުގެ ދަރީން އެ ބަސް އެކަހެރިކޮށްފައި ދާތީ! އެ ބަސް އަމިއްލައަށް އުޅޭން ދިމާވެފައިވާ އުނދަގޫތަކާ ހަވާލުކޮށްފައި ދާތީ!”
(ސެނެގާލުގެ ޅެންވެރިޔާ އުސޭނޯ ގޭ ކޯސަންގެ ޅެމަކުން ނަގައިފައި)

ޔުނެސްކޯއިން ދެކެނީ ކޮންމެ މާދަރީ ބަހަކީ ވެސް އެނގި ފާޅުވުމާއެކު އާންމު ދިރިއުޅުމުގައި އެ ބަހަކަށް ދޭންވާ ސަމާލުކަން ހުރިހައި ދާއިރާއަކުން ވެސް ދޭން ޖެހޭނެ ބަހެއް ކަމުގައެވެ. އެހެންނަމަވެސް ކަންތައް ހުރީ އެހެނަކުން ނޫނެވެ. ކޮންމެ މާދަރީ ބަހަކީ ގައުމީ ބަހެއްގެ ގޮތުގައި ބަލައިގެންފައިވާ ބަހެއް ނޫނެވެ. އަދިކިއެއްތަ ރަސްމީ ބަހެއްގެ ދަރަޖަ ދީފައި ވާ ބަހެއް ވެސް ނުމެ ނޫންމެއެވެ. އަދި ތަޢުލީމު އުނގަންނައި ދޭ ބަހެއްގެ މަގާމު އޮތް ބަހެއް ވެސް ނޫނެވެ. މި ހާލަތަކީ މާދަރީ ބަހެއްގެ އަގު ނެތެމުން ގޮސް އެންމެ ފަހުން ބަސް ވެސް ނެތިގެން ހިނގައިދާނެ ހާލަތެކެވެ.

ބައިނަލްއަގުވާމީ ފެންވަރުގައި މިއަދު އަޅުގަނޑުމެން ފާހަގަ މިކުރާ ވިހިވަނަ މާދަރީބަހުގެ ދުވަހުގައި އަޅުގަނޑުމެން ހަނދާން ބަހައްޓަން ވީ ކަމެއް އެބަ އޮތެވެ. އެއީ ކޮންމެ ބަހަކީ ވެސް މުހިންމު ބަހެއް ކަމެވެ. އަދި ކޮންމެ ބަހަކީ ވެސް ސުލްހަ ގާއިމު ކުރުމަށާއި ދެމެހެއްޓެނިވި ތަރައްޤީއަށް ޓަކައި މުހިންމު ބަހެއް ކަމެވެ. މާދަރީ ބަހަކީ ލިޔަންކިޔަން ދަތުމަށް ޓަކައި މުހިންމު ވަސީލަތެކެވެ. އެހެނީ ތައުލީމު ލިބި ދިނުމުގެ ފުރަތަމަ އަހަރުތަކުގައި ކިޔުންތެރިކަމާއި ލިޔުންތެރިކަމުގެ ހުނަރުތައް އަށަގަތުމުގައި ފަހިކަން ފޯރުވައި ދޭ ބަހަކަށް މާދަރީ ބަސްވުމެވެ. ހަމަ އެހެންމެ ލިޔަންކިޔާށާއި ވިޔަ ކުރާން ދަސްކޮށް ދިނުމުގައި އެހީތެރި ވެދޭ ބަހަކީ ވެސް މާދަރީ ބަސް ކަމަށް ވުމެވެ. މިއީ، ކޮންމެ މީހަކު ވެސް އެ މީހެއްގެ އަމިއްލަ ނަފުސުގެ ގާބިއްލިއްޔަތު ތަރައްގީ ކުރުމުގެ ހުނަރުތަކުގެ ބިންގަލެވެ. މާދަރީ ބަހަކީ އުފެއްދުންތެރި ސިންދަފާތާއި ކާކުވަންތަކަން ތަފާތު ގޮތަކަށް ހާމަކޮށް ދިނުމުގެ އިތުރަށް، އެއީ އިލްމާއި އާ އީޖާދުތަކުގެ ވަސީލަތެއް ވެސް މެއެވެ. ކުރާން ހުރި ކަންތައްތައް ވަރަށް ވެސް ގިނައެވެ. އުނގެނޭ ދަރިވަރު އުނގެނުމަށް ޓަކައި މަދު ހާލަތެއްގައި މެނުވީ އޭނާގެ މާދަރީ ބަހެއް ބޭނުމެއް ނުކުރެއެވެ. އިސްކޫލު ދައުރުގެ ފުރަތަމަ އަހަރުތައް ފާއިތު ވަނީ ކަންކަން އެ ހާލަތުގައި ވަނިކޮށެވެ. ޔުނެސްކޯ އިން ހާމަކުރައްވާ ގޮތުގައި ދުނިޔޭގެ އާބާދީގެ ކޮންމެ ސަތޭކައަކުން 40 މީހުންނަކީ އެ ބައި މީހުންނަށް އެނގޭ ބަހަކުން ނުވަތަ ވާހަކަ ދައްކައި އުޅޭ ބަހުން ތައުލީމު ހާސިލު ކުރުމުގެ ފުރުސަތު ނުލިބޭ މީހުންނެވެ. މި ހާލަތު މި ގޮތަށް މެދުވެރިވެފައި ވަނީ، ކުރެވިފައިވާ ދިރާސާތަކުން މާދަރީ ބަހެއްގެ އިލްމު އެނގިފައި ވުމަކީ އާންމު އުނގެނުމަށް އެހީތެރިވެދޭ ކަމެއް ކަމުގައި އަންގައިދީފައި ވަނިކޮށެވެ. އަދި މާދަރީ ބަސް އެނގުމަކީ އެހެން ބަސްބަސް ދަސްކުރާން ފަސޭހަ ވާ ކަމެއްކަމަށް ވެސް އަންގައިފައި ވަނިކޮށެވެ.

ޤައުމުތަކުގައި ދިރިއުޅޭ އަޣުލަބިއްޔަތުގެ ހިއްސާގައި ޝާމިލްވުން ނުލިބޭ މީސްތަކުން ނުވަތަ ވެހީންގެ ހައްގުތައް ރައްކާތެރިކޮށް ދިނުމާ ބެހޭ އދ.ގެ ގަރާރުގައި ބަޔާން ކުރައްވައިފައިވާ ގޮތަށް، ވެހީން އެ ބައިމީހުން އަމިއްލަ ބަހުން ތައުލީމު ހާސިލުކުރާން ބޭނުންވާ ކަން އަބަދުވެސް ހާމަ ކުރެއެވެ. 2019ވަނަ އަހަރަކީ ވެހީން މޮށެ އުޅޭ ވެހި ބަސްބަހަށް ޚާއްޞަ ކުރައްވައިގެން ފާހަގަކުރައްވާން ހަމަޖައްސަވައިފައިވާ އަހަރު ކަމަށް ވާތީ މި އަހަރުގެ ބައިނަލްއަގުވާމީ މާދަރީބަހުގެ ދުވަހުގެ ޝިޢާރަކަށް ކަނޑަ އަޅުއްވައިފައި ވަނީ “ތަރައްޤީއަށާއި އަމަންއަމާންކަން ގާއިމު ކުރުމަށާއި ސުލްހައަށް ޓަކައި ވެހި ބަސްބަސް މުހިންމު” މިއެވެ.

ދުނިޔޭގެ އެކިއެކި ގައުމުތަކުގައި ދިރިއުޅޭ ވެހީން 370 މިލިއަން މީހުންނާއި އެބައި މީހުން މޮށެ އުޅޭ ބަސްބަހަކީ ދުނިޔޭގައި ދިރި އޮތް 7000 ބަހުގެ ތެރެއިން އެއް ބައެވެ. މި ފަދަ ވެހީންގެ ތެރެއިން ގިނަ މީހުންނަކީ އެކަހެރި ކުރުމާއި ތަފާތު ކުރުމުގެ ހިތްދަތިކަން ތަހައްމަލު ކުރާ މީހުންނެވެ. އެ ބައި މީހުން ދިރި އުޅެނީ ވަރަށް ފަގީރު ހާލަތުގައެވެ. އަދި އެމީހުންނަކީ އިންސާނީ ހައްގުތަކުން މަހުރޫމު ވެފައިވާ މީހުން ވެސް މެއެވެ.

ދެމެހެއްޓެނިވި ތަރައްގީގެ ހަތަރުވަނަ ލަނޑުދަނޑިއާއި މަގުސަދުތަކުގެ ތެރޭގައި ބަޔާން ކުރައްވައިފައި ވަނީ އެކަކު ވެސް ބާކީ ވިޔަ ނުދެއްވާނޭ ކަމަށެވެ. އެހެންކަމުން، ވެހި އާބާދީތަކަށް އެ ބައިމީހުންގެ މާދަރީ ބަހުން އެބައި މީހުންގެ ދަރީންނަށް ތައުލީމު އުނގެނުމުގެ ފުރުސަތު އޮންނާން ވާނެއެވެ. މިހެން ވުމުން ބައިނަލްއަގުވާމީ މާދަރީ ބަހުގެ ދުވަހު ޔުނެސްކޯގެ މެންބަރު ދައުލަތްތަކަށާއި އަޅުގަނޑުމެންގެ ބައިވެރިންނަށާއި އުނގަންނައި ދިނުމުގެ މަސްލަހަތުވެރީންނަށް އަޅުގަނޑު ދައުވަތު މިއަރުވަނީ ވެހި ނަސްލުތަކުގެ މީހުންގެ ހައްގުތައް ލިބިދިނުމަށް ޓަކައި އެ ކަން ފާހަގަކުރައްވައި އަޑު އުފުއްލަވައި ބާރު އެޅުއްވުމެވެ.

ނޯޓު: ވެހީން ތަނެއްގެ އުފަން މީހުން، އަހުލުވެރީން، ފަންނަކަށް ހޭނިފައިވާ މީހުން.
ޤައުމުތަކުގައި ދިރިއުޅޭ އަޣުލަބިއްޔަތުގެ ހިއްސާގައި ޝާމިލްވުން ނުލިބޭ މީސްތަކުން
ވެހިބަސް: އެމީހަކު ނިސްބަތްވާ ރަށެއްގެ ނުވަތަ ޖަމާއަތެއްގެ ނުވަތަ އަވަނެއްގެ މީހެއްގެ އަމިއްލަ ބަސް.
ޤައުމުތަކުގައި ދިރިއުޅޭ އަޣުލަބިއްޔަތުގެ ހިއްސާގައި ޝާމިލްވުން ނުލިބޭ މީސްތަކުންގެ އަމިއްލަ ބަސް

ލިޔުންތެރިޔާގެ ފުރަމަލަ

ރަން ގަލަން
ރަން ގަލަން
މުހިންމު ބޭނުންތެރި ލިޔުންތައް އެކިއެކި ވަޞީލަތް ތަކުން ނަގައިގެން، ލިޔުމުގެ އަސްލު މުސައްނިފް ލިޔުއްވި ލިޔުމެއްކަން އެނގޭ ގޮތަށް 'ރަން ގަލަން' ޕޯސްޓް ކުރާނެ އެވެ.

ގުޅުންހުރި ލިޔުން: