ޔަމަންކަރައިގެ ރަސްމަތި ޢާއިލާގެ ބޭކަލެއްކަމުގައިވާ ވާއިލު ބުން ޙަޖަރު އިސްލާމްވެގެން މަދީނާ އަށް ވަޑައިގަތުމުން ރަސޫލާ صلى الله عليه وسلم ވާއިލުބުނު ޙަޖަރަށް ވަރަށްބޮޑަށް ކަމޭ ހިއްތެވިއެވެ . ރަސްމަތި ދިރިއުޅުމާއި ވެރިކަން ދޫކޮށް އިސްލާމް ވެގެން މަދީނާ އަށް ހިޖުރަ ކުރުމުން ، އެކަމުގެ އަގު ވަޒަންކުރެއްވުމުގެ ގޮތުން ރަސޫލާ صلى الله عليه وسلم އެކަލޭގެފާނަށް ބިމެއް ހަދިޔާ ކުރެއްވެވިއެވެ. އެބިން އޮތްތަން ދައްކަން ވާއިލް އާއެކު މުޢާވިޔަތުގެފާނު ފޮނުއްވިއެވެ. އޭރު މުޢާވިޔަތުގެ ފާނަކީ އިންތިހާއަށް ފަޤީރު ބޭފުޅެކެވެ. އަރާނެ ފައިވާން ޖޯޑުކޮޅެއްވެސް މުޢާވިޔަތުގެފާނަށް ލިބިވަޑައިގެންފައި ނުވެއެވެ. އެހެންވެ މުޢާވިޔަތުގެފާނު ވާއިލަށް ދެންނެވިއެވެ. ”ޖަމަލުމަތީގައި ތިބާގެ ފަހަތްޕުޅުގައި ދަތުރުކުރުމުގެ އިޒުނަފުޅު ދެއްވަފާނަންތޯއެވެ“ ވާއިލު ޖަވާބުދެއްވިއެވެ. ”ރަސްމަތިބޭފުޅުންނާއެކު އެއްސަވާރީއެއްގެމަތީގައި ދަތުރުކުރުމަކީ ތިބާފަދަ ނިކަމެއްޗަކާއި އެކަށީގެންވާ ކަމެއްނޫނެވެ“ މުޢާވިޔަތުގެފާނު ނިކަމެތި ކަމާއެކު އާދޭހުގެ ރާގެއްގައި ވިދާޅުވިއެވެ. ”އެހެންވިއްޔާ ތިބާގެ ފައިވާންޖޯޑުކޮޅު އަހަރެންނަށް ދޭށެވެ.“ ވާއިލު ޖަވާބުދެއްވިއެވެ. ”ރަސްމަތި ބޭފުޅުންގެ ފައިވާނަށް އެރުން ތިބާފަދަ ނިކަމެއްޗަކާ އެކަށީގެނެއްނުވެއެވެ“
ކޮންމެއަކަސް އެދުވަހު މުޢާވިޔަތުގެފާނު ވާއިލްއާއެކު ރަސޫލާ صلى الله عليه وسلم ހަދިޔާކުރެއްވި ބިމާ ހިސާބަށް ވަޑައިގަތީ ހުސްފަޔާ ހިންގަވާފައެވެ.
ޒަމާނާއެކު ދުވަސްތަކާއި ޙާލަތު ފުރޮޅުނެވެ. މިއަދު މުސްލިމުންގެ ޚަލީފާ އަކީ އިއްޔެ ދެރަ ނިކަމެއްޗެއް ކަމުގައިވީ މުޢާވިޔަތުގެފާނެވެ. ދުވަސްތަކުގެތެރެއިން ދުވަހެއްގައި ވާއިލު ބުނު ޙަޖަރު އިސްލާމީ ޚިލާފަތުގެ ވެރިރަށް ކަމުގައިވާ ދިމިޝްޤަށް ވަޑައިގަތެވެ. އޭރު ވާއިލަކީ އަށްޑިހައިން މައްޗަށް ގޮސްފައިވާ މުސްކުޅިއެކެވެ. ދިމިޝްޤުގައި ވާއިލު ހުންނެވި ހުންނެވުމުގައި އެއްދުވަހަކު ޚަލީފާގެ ދަރުބާރަށް ވަޑައިގަތެވެ. ވާއިލު ފެނުމާއެކު މުޢާވިޔަތުގެފާނު އިށީނދެގެން އިންނެވި ތަޚްތު ކޮޅުން ތެދުވެވަޑައިގެން އެތަޚްތުކޮޅުގައި އިށީނުމަށް ދެންނެވިއެވެ. އަދި ވާއިލު އިސްލާމްވެގެން މަދީނާއަށް އައި ދުވަހުގެ ޙާދިޘާގެމަތިން ހަނދާންކޮށްދެއްވިއެވެ. ވާއިލު ދެންނެވިއެވެ. ”އެދުވަހަށް އެނބުރި ދެވޭނެ ނަމަ އަހަރެން ތި މާތް ސާހިބު އުފުލާހުށީ އަހަރެންގެ ދެ އަތުންނެވެ. “
ޙިލްމުވެރިކަމުގެ މަތިވެރި ނަމޫނާ އެއް ދެއްކެވުމަށްފަހު ، މުޢާވިޔަތުގެފާނު އަދި އެހިސާބުން ނިންމަވާ ނުލައްވައެވެ. ވާއިލަށް ފައިސާގެ އެހީއެއްވެސް ދެއްވެވިއެވެ.
ވާހަކައިން ލިބޭ ބައެއް ޢިބުރަތްތައް:
އެއްވެސް މީހަކާމެދު ނިކަމެތިކޮށް ނުދެކޭށެވެ. މިއަދު ނިކަމެތި ކުރެވުނު މީހާގެކިބައިން މާދަމާ އެހީތެރިކަމަށް އެދެން ޖެހިދާނެއެވެ.
ތިބާއާމެދު ގޯސްކޮށް ކަންތައް ކުރެވުނަސް ތިބާއަށް ބާރުލިބޭދުވަހު ޙިލްމުވެރިކަން އިސްކުރާށެވެ.
ހިތާމައާއި ހިތްދަތިކަން އަބަދަށް ދެމިގެން ނުވެއެވެ. އިއްޔެހިތާމައާއި ނިކަމެތިކަމުގައި އުޅުނު ކިތައް މީހުން މިއަދު އުފާވެރިކަމާއި ފާގަތިކަމުގައި އެބައުޅޭހެއްޔެވެ؟
މީސްތަކުންގެ ހާލަތު ތަދުމަޑުކަމާއި ފާގަތިކަމުގައި ފުރޮޅެމުން ދެއެވެ. ތަޤްވާވެރިން ގެ މަންހަޖަކީ ފާގަތިކަމުގައި ޝުކުރުވެރިވުމެވެ. އަދި ތަދުމަޑުކަމުގައި ކެތްތެރިވުމެވެ.
ރެފަރެންސް : – އަލްބިދާޔާ ވައްނިހާޔާ
އައްތާރީޚުލްކަބީރު
ޞަޙީޙު އިބުނުޙިއްބާން 7205
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 26 ޖޫން 2020މަޢުލޫމާތުމަދީނާއަށް ބޮޑު އެތެއް ވަދެގެން އައި ހިނދު..
- 12 މެއި 2020އިޖްތިމާޢީމާތް ﷲ ގެ ރިވެތި ސިފަފުޅުތަކުން “އަލިވިލުމެއް”
- 27 އޭޕްރިލް 2020ވާހަކަޔޫނުސް ޢަލައިހިއްސަލާމްގެ ވާހަކަ
- 22 އޭޕްރިލް 2020ރިޕޯޓްމުސްލިމެއްގެ އަބުރަށް އަރައިގަތުމަކީ ކިހާ ބޮޑު ފާފައެއްކަން އެނގޭހެއްޔެ؟
