އިންޑިއާގެ ނިއު ދިއްލީގައި ބޭއްވުމަށް ހަމަޖެހިފައިވާ މިއަހަރުގެ އޭބީޔޫ އިންޓަނޭޝަނަލް ޑާންސް ފެސްޓިވަލްގައި ރާއްޖެ ތަމްސީލުކުރުމަށް ރަސްރަނި ގްރޫޕް މިއަދު އިންޑިއާއަށް ފުރައިފިއެވެ.

އޭބީޔޫ ފެސްޓިވަލްގައި ރާއްޖެ ތަމްސީލުކުރަން ފުރާފައިވަނީ ހަ ނެށުންތެރިންގެ މައްޗަށް އެކުލެވިގެންވާ ރަސްރަނި ގްރޫޕެވެ. ރަސްރަނި ގްރޫޕް މި ފެސްޓިވަލްގައި ބައިވެރިކޮށްފައިވަނީ، މީގެ ދެމަސްކުރިން ޕަބްލިކް ސަރވިސް ވީޑިއާ، ޕީއެސްއެމްއިން ކުރިއަށްގެންދިޔަ އޮޑިޝަނަކުން ހޮވިގެން ކަމަށް މަޢޫލޫމާތު ލިބެއެވެ.

މި ފެސްޓިވަލަކީ ދިވެހިންގެ އަމިއްލަވަންތަކަމާއި ދިވެހި ރީތި ސަޤާފަތް ދައްކުވައިދޭން ލިބޭ ރަނުގެ ފުރުޞަތެއްކަމަށް ޕީއެސްއެމްގެ ސީނިއަރ އެގްޒެކެޓިވް ޕްރޮޑިއުސަރ، އައިޝަތު ޝައްފާ ޝާހިދު ވިދާޅުވެއެވެ. އެގޮތުން އެއް މަސްދުވަހުގެ ތަމްރީންނަށްފަހު ރަސްރަނި ގްރޫޕުންވެސް މިއަހަރު ހުށަހަޅައިދޭނީ ދިވެހި ސަޤާފީ ކުލަތައް ފެނިގެންދާނެ ނެށުމެއްކަމަށް ޝައްފާ ވިދާޅުވިއެވެ.

އިންޑިޔާގެ ނިއު ދިއްލީގައި ކުރިއަށްގެންދާ ދެވަނަ އޭޝިޔާ ޕެސިފިކް ބްރޯޑްކާސްޓިންގ ޔޫނިއަން، އޭބީޔޫގެ އިންޓަރނޭޝަނަލް ޑާންސް ފެސްޓިވަލަކީ އޭޝިޔާ ޕެސިފިކް ސަރަޙައްދުގެ އެއް ޤައުމު އަނެއް ޤައުމުގެ މެދުގައި ހުރި ތަފާތުތަކާއި ޤައުމުތަކުގެ އާދަކާދާއާއި ސަޤާފީ ކަންކަން އެއް ޤަޢުމު އަނެއް ޤައުމަށް އަންގައިދީ ގުޅުން ބަދަހިކުރުމުގެ ބޭނުމުގައި ކުރިއަށްގެންދާ ފެސްޓިވަލެކެވެ.

އޭބީޔޫ އިން ދަނީ މެންބަރު ޤައުމުތަކުގެ ލަވަކިޔުމާއި އެކި ފަންނުގެ ހުނަރު ދައްކުވައިދިނުމަށްވެސް ފެސްޓިވަލްތައް ބާއްވަމުންނެވެ.

ރަސްރަނި ގްރޫޕާއެކުގައި މަޝްހޫރު ނެށުންތެރިޔާ ޖާދުﷲ ވެސް ބައިވެރިވެއެވެ.

https://www.youtube.com/watch?v=olUS7Vz4dnQ

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: