“ދަނޑުވެރި ނަފާ” ގެ ނަމުގައި ދަނޑުވެރިކަމަށް ޙާއްސަ ލޯނު ޕްރޮގްރާމެއް މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރުން ފެށުމަށް ނިންމަވައިފި އެވެ.

މިނިސްޓްރީން މިއަދު ނެރުނު ސާކިއުލާއެއްގައި ބުނީ ދަނޑުވެރިކަމުގެ ދާއިރާގެ 100 ދުވަހުގެ ވަޢުދުތަކުގެ ތެރޭގައި ހިމެނޭ “ދަނޑުވެރިކަމުގެ މަސައްކަތުގައި އުޅޭ އަމިއްލަ ފަރާތްތަކަށް މާލީ އިދާރާތަކުންނާއި ބޭންކުތަކުން ލޯނު އަދި ކްރެޑިޓް ސްކީމްތަކުގައި ބައިވެރިވެވޭނެ މަގު ތަނަވަސްކޮށްދެވޭނެ” މިވައުދުގެ ދަށުން “ދަނޑުވެރި ނަފާ”ގެ ނަމުގައި ދަނޑުވެރިކަމުގެ ސިނާޢަތުގައި ޙަރަކާތްތެރިވާ ހުރިހާ ފަރާތްތަކަށް ހުޅުވާލެވިފައިވާ ލޯނު ޕްރޮގްރާމް މިމިނިސްޓްރީ އާއި އެސް.އެމް.އީ ޑިވެލޮޕްމަންޓް ފައިނޭޝަލް ކޯޕަރޭޝަން (އެސް.ޑީ.އެފް.ސީ) ގުޅިގެންވަނީ މިއަދު ފަށާފައި ކަމަށެވެ.

ދަނޑުވެރިކަމުގެ އިޤްތިޞާދު ފުޅާކުރުމަށްޓަކައި އެމަސައްކަތްތަކަށް އިންވެސްޓް ކުރެވޭނެ މަގުތައް ރާއްޖޭގެ ހީވާގި ދަނޑުވެރިންނަށް ފަހިކޮށްދިނުމަކީ މިފަދަ ލޯން ޕްރޮޤްރާމެއް ފެށުމުގެ މައިގަނޑު އެއް މަޤްޞަދު ކަމަށް މިނިސްޓްރީން ބުނެއެވެ. މިލޯނު ޕްރޮގްރާމްގެ ދަށުން ލޯނު ދޫކުރުމުގައި އިސްކަންދޭނީ ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަމުގެ މަޝްރޫޢުތައް ހިންގުމަށެވެ. މީގެ ތެރޭގައި އަރބަން އެގްރިކަލްޗަރ، ޕްރޮޓެކްޓަޑް އެގްރިކަލްޗަރ، ޓެރެސް ނުވަތަ ވަރޓިކަލް ގާޑްނިންގ، ޕޯލްޓްރީ އަދި ކުދި ޖަނަވާރު ގެންގުޅުން، ވެލިއު އެޑިޝަން، އެގްރޮފޮރަސްޓްރީ އަދި ގަސް އުފައްދާ ނާސަރީތައް ޤާއިމު ކުރުން ފަދަ މަސައްކަތްތައް ކުރުމަށް ލޯނު ދޫކުރުން ހިމެނެއެވެ.

އެންމެ ހަ އިންސައްތަ އިންޓްރެސްޓާއި އެކު ދޫކުރެވޭ މިލޯނު ޕްރޮގްރާމްގެ ދަށުން އެންމެ މަދުވެގެން ނެގޭނީ 75,000.00 ރުފިޔާއެވެ. އަދި ގިނަވެގެން ދެ މިލިއަން ރުފިޔާ ނެގޭނެއެވެ. މިގޮތުން އަމިއްލަ ފަރުދުންނަށް 75,000.00 އާއި 500,000.00 ރުފިޔާއާއި ދެމެދުގެ ލޯނު ނެގޭނެއެވެ. އަދި ދަނޑުވެރިކަމުގައި ޙަރަކާތްތެރިވާ ކުންފުނި، ކޯޕަރޭޓިވްސް ތަކަށް 75,000.00 އާއި ދެ މިލިއަންއާއި ދެމެދުގެ ލޯނު ނެގޭނެއެވެ. ރަހުނު ނުބަހައްޓާ ލޯނު ނެގޭނެ އެންމެ މަތީ އަދަދަކީ 75,000.00 ރުފިޔާއެވެ.

ލޯން ދެއްކުމަށް ހަމަޖެހިފައިވާ ގޮތްތައްވެސް މިނިސްޓްރީގެ ސާކިއުލާގައި އާއްމުކޮށްފައިވެއެވެ. އެގޮތުން:
75,000 ރުފިޔާ: 3 އަހަރުގެ ތެރޭގައި (ހަމަހުގެ ގްރޭސް ޕީރިއަޑް)
75,000 ރުފިޔާއަށްވުރެ މަތި އަދި 500,000 ރުފިޔާއަށް ވުރެ ދަށް: 5 އަހަރުގެ ތެރޭގައި (ހަމަހުގެ ގްރޭސް ޕީރިއަށް)
500,000 ރުފިޔާ އަށް ވުރެ މަތި: 7 އަހަރު ގެ ތެރޭގައި (އެއް އަހަރުގެ ގްރޭސް ޕީރިއަޑް)

މިގޮތުން 75،000.00 ރ އާއި 500,000 ރ އާއި ދެމެދުގެ ލޯން ނަންގަވާ ފަރާތްތަކުން ލޯނުނެގުމަށް ހުށަހަޅާ ޕްރޮޖެކްޓުގެ %10 ފަންޑުކުރައްވަން ޖެހޭނީ އަމިއްލައަށެވެ. އަދި 500،000.00 ރ އަށް ވުރެ މަތީގެ ލޯންތަކަށް އެދިލައްވާ ފަރާތްތަކުން ހުށަހަޅުއްވާ
ޕްރޮޖެކްޓުގެ %15 ފަންޑުކުރައްވަން ޖެހޭނީ އަމިއްލައަށެވެ. މިފަދަ ގޮތަކަށް ލޯން ޕްރޮޤްރާމް ބައްޓަންކުރުމުގެ ބޭނުމަކީ ނަންގަވާ ލޯން ތަކަކީ ދަނޑުވެރިކަމަށް ހޭދަކުރެވޭ އަދި ދެމެހެއްޓެނިވި ވިޔަފާރި ތަކެއްކަމުގައި ހެދުމެވެ.

ލޯން ޕްރޮގްރާމަށް އެދިލައްވާ ކުންފުނި، ކޯޕަރޭޓިވްސް ތަކަކީ އެސް.އެމް.އީ ގޮތުގައި މިނިސްޓްރީ އޮފް އިކޮނޮމިކްސް ޑިވެލޮޕްމަންޓް ގައި ރަޖިސްޓްރީ ވެފައިވާ ތަނަކަށް ވުން ލާޒިމުކަމަށް މިނިސްޓްރީން ބުނެއެވެ. އަދި އަމިއްލަ ފަރުދުންނަމަ ލޯން ހަމަޖެހޭ ހިސާބުން ވިޔަފާރިއެއްގޮތުގައި ރަޖިސްޓްރީ ކުރެވި އެސް.އެމް.އީ އެއް ގޮތުގައި ރަޖިސްޓްރީ ވާންޖެހެއެވެ. މިމަރުހަލާގައި ކުރަންޖެހޭ ކަންތައްތައް ކުރުމުގައި އެފަރާތްތަކަށް އެހީތެރިވެދެވޭނެއެވެ.

ލޯން ޕްރޮގްރާމްގައި ބައިވެރިވުމަށް އެދި ހުށަހަޅާ ފޯމް އެސް.ޑީ.އެފްސީ އިންނާއި މިމިނިސްޓްރީން ލިބެންހުންނާނެއެވެ. ފޯމް ހުށަހެޅުމަށް
ހަމަޖެހިފައިވަނީ އެސް.ޑީ.އެފްސީ އަށެވެ. އިތުރު މައުލޫމާތު ހޯއްދެވުމަށް މިމިނިސްޓްރީގެ 3339261 ނުވަތަ އެސް.ޑީ.އެފް.ސީ ގެ
ނަންބަރ3306999 އަދި ވެބްސައިޓް www.sdfc.mv އިން ލިބިލައްވާނެ ކަމަށްވެސް މިނިސްޓްރީން ބުނެއެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: