އެންމެ ކުޑައިރުން ފެށިގެން ހިންދީ ފިލްމު ބެލުމަކީ އާނަންދު ވަރަށް ފޯރިއާއެކު ކުރަމުން އަންނަ ކަމެކެވެ. ޚާއްޞަކޮށް ހިންދީ ފިލްމު ތަކެކެވެ. ހިންދީ ފިލްމު ތަކުންވެސް އާނަންދު އަށް އެންމެ ކަމުދަނީ ސުނިލް ޝެއްޓީ ގެ ފިލްމު ތަކެވެ. ސުނިލް ޝެއްޓީގެ ފައިޓް ސީންތައް ގިނައިން ހުންނަ ފިލްމެއް ވެއްޖެއްޔާ އެއީ އާނަންދު އަށް އެންމެ ކަމުދާ ފިލްމެވެ. ފިލްމު ތައް ބަލަމުން ސުނިލް ގެ އެކްޓިން ދަސްކުރަމުން އާނަންދު ގެ ރަށް، ރ. މާކުރަތުގައި މަޖަލަކަށް ފިލްމު ކުޅެވެސް އުޅުނެވެ. ކުޅެނީވެސް ސުނިލް ޝެއްޓީގެ ރޯލެވެ.

އެންމެ ކަމުދާ ބަޠަލް ގެ ފިލްމުތައް ބަލަން އިންނައިރު އާނަންދު ގެ ހިތަށް އޭރު އަރަމުންދިޔައީ އަހަންނަށް ފިލްމެއް ކުޅެވޭނެ ނަމަ ކިހާ ރަނގަޅުހެއްޔެވެ. އަހަންނަށް ފިލްމެއް ކުޅެން ޗާންސެއް ލިބޭނެބާ އެވެ.

ފިލްމު ކުޅުމުގެ ޝައުގުގައި އެހެން ހުއްޓާ އާނަންދު އާ ދިމާވީ ’އެއްގާގަނޑުން ޖަހައި ދެދޫނި މަރައިލާ‘ މަޝްހޫރު ޕްރޮޑިއުސަރ/ޑައިރެކްޓަރ/އެކްޓަރ ޙާމިދު ޢަލީ އާއެވެ. 2010 ވަނަ އަހަރު މާކުރަތު ގައި ’އުދަބާނި‘ ކުޅެންގޮސް އުޅެނިކޮށެވެ. އޭރުވެސް އުދަބާނިން ބައެއް ކުޅެން އާނަންދު އަށް ޗާންސް ލިބުނެވެ. ނަމަވެސް ހުންނަލެތް ތަންކޮޅެއް ކުޑަކަމުން އެކަން ކުރަން ނުކެރުނީ އެވެ. އޭގެ ދުވަސްތަކެއް ފަހުން އާނަންދު ބޭނުންވެގެންހުރި ފުރުސަތު ލިބުނެވެ. އާނަންދު ގެ ކިބައިން ހާމިދު އެދުނީ ފިލްމު “ލައިލާ” ގައި ސައިޑްރޯލެއް ކުޅުމަށެވެ.

ފިލްމު ކުޅުމަށް ޝައުގުވެރިކަން އުފެދުނުގޮތް އަޙްމަދު އީސާ (އާނަންދު) ކިޔައިދިނީ ފިލްމީ ވާހަކައަކުންނެވެ. ފިލްމު ’ލައިލާ‘ އަށްފަހު އާނަންދަކީ ފިލްމީ ދާއިރާއިން ފެންނަ، ފަރިތަ މޫނެކެވެ.

ފިލްމު “ލައިލާ”ގައި އާނަންދު ކުޅުނު ލޯބީގެ ރޯލުން އޭނާގެ ހުނަރުވެރިކަން ފާހަގަކުރެވިގެން ދިޔައެވެ. ނަމަވެސް ފިލްމީ މަސައްކަތާއި ދުރުގައި ދުވަސްކޮޅަކު ހުންނަން ޖެހުނެވެ. އެއަށްފަހު. މިއަދު ބެލުންތެރިންނަށް މި ފެންނަ އާނަންދު ފެންނަންފެށީ ރާއްޖޭގެ އެންމެ ހުނަރުވެރި އެކްޓަރ އަދި މޮޅު ޑައިރެކްޓަރ ޔޫސުފު ޝަފީޢު (ޔޫއްޕެ)ގެ ދެވަން ސޫރަ ދައްކައިލި ހިސާބުންނެވެ. އާދެ، ފިލްމު “ދެވަންސޫރަ” އިން އާނަންދަށް ފުރުޞަތުދިން ހިސާބުންނެވެ.

“ދެވަންސޫރަ” އިން އާނަންދު ފެންނުނީވެސް ތަފާތު ގޮތަކަށެވެ. ފުލުހެއްގެ ރޯލުންނެވެ.

އާނަންދަކީ ވަޒީފާއެއްގައި އުޅެމުން، ފިލްމީ މަސައްކަތަށް ހުންނަ ޝައުޤާއިއެކު ކުރިއަރަމުން އަންނަ ފަންނާނެކެވެ. އޭނާގެ ކެރިއަރުގައި އެންމެ މުހިންމު އެއް ފިލްމަކަށް ވާނެ ފިލްމަކީ މިމަހު 09 ގައި ރިލީޒްކުރަން ތައްޔާރުވެފައިވާ “ނަފްރަތުވުމުން” އެވެ.

ފިލްމު “ނަފްރަތުވުމުން”ގައި އާނަންދަކީ ކާކުކަން ބަލައިލުމަށް މުނިއަވަސް އިން އާނަންދާއި ބައްދަލުކޮށްލީމެވެ.

މުނިއަވަސް: ފިލްމު “ނަފްރަތުވުމުން”ގަ އާނަންދު ކުޅެފަވަނީ ކޮންކަހަލަ ރޯލެއް؟

އާނަންދު: މީގަ އިންނާނީ ވަރަށް ލޯބިން އުޅޭ ފިރިއެއްގެ ރޯލު. އެކަމަކު އަނބިމިހާގެ މަސައްކަތުން ހޯދާ ފައިސާއިން ދިރިއުޅެމުންދާ ފިރިއެއް. އަމިއްލަ އަށް މަސައްކަތެއް ނުކޮށް މުއްސަނދިވާން ބޭނުންވާ މީހެއްގެ ބައި އިންނާނީ ގެނެސްދީފަ.

ދެން، މީހަކަށް އިތުބާރުކޮށްގެން އުޅުނީމާ، އެވަރުގެ އިތުބާރެއްކުރާ އަނތަބަކާއި އެއްކޮށް އުޅުނީމަ ދިމާވާ ކަންތައްތައް މީގަ ދައްކާނީ.

މުނިއަވަސް: “ނަފްރަތުވުމުން”ގަ ކުޅެފަވާ ރޯލާ ދޭތެރޭގަ ނުވަތަ އެކްޓިންއާ ދޭތެރޭގަ ބުނެލާނީ ކީކޭ؟

އާނަންދު: ވަރަށް ހިތްހަމަޖެހޭ މީގަ އަދާކޮށްފަވާ ރޯލާމެދު. ދެން މީގަ އަސްލު ބެލުންތެރިން ޖަޖުކުރާނީ އެންމެ ބޮޑަށް ކޮންކަމެއްކަން އިމްޕްރޫވްކުރަން ހުރީ.

މުނިއަވަސް: މި ފިލްމު ބަލަންޖެހެނީ ކީއްވެގެންކަމަށް ބެލުންތެރިންނަށް އާނަންދު ބުނެލާނީ؟

އާނަންދު: މީގަ އެބަ އާދޭ ދެކަމެއް އަޅުގަނޑު ފާހަގަކޮށްލާނެ. އެއީ އާާއްމު ދިރިއުޅުމުގަވެސް މީހަކަށް ހަމަ މީހެއްދެކެ ލޯބިވެވިދާނެދޯ. އެކަމަކު ހަމަ އޭގެ އަނެއްކޮޅު، ނަފްރަތުވެސް ކުރަން ޖެހިދާނެ. ދެން މީހަކަށް އަސްލު އެހާބޮޑަށް އިތުބާރު، އަދި އެންމެ ކައިރީގަ އުޅޭ މީހަކަށްވެސް އެހާ ބޮޑަށް އިތުބާރުކޮށްފިއްޔާ ހަމަ ދިމާވެދާނެ ހިތާމަވެރިކަމެއް ކުރިމަތިވެދާނޭ. އެއީ އެއްވެސް މީހަކަށް އެހާބޮޑަށް އިތުބާރުކޮށްގެން ނުވާނެ.

މިއީ އިބްރަތެއް ހާސިލްވާނެ ފިލްމެއް. މީހަކުދެކެ ލޯބި ވެއްޖެއްޔާ އޭނާދެކެ ނަފްރަތުވާން ޖެހޭ ހާލަތެއްވެސް އައިސްދާނޭ. ދެން ކުރިން މިބުނިހެން މީހަކަށް އެހާވަރަށް އިތުބާރު ނުކުރާށޭ. އެއީ އަސްލު މި ފިލްމުން އަޅުގަނޑަށް އެންމެބޮޑަށް ދޭހަވާ އެއްޗަކީ.

“ނަފްރަތުވުމުން” ލީޑްކުރަނީ މިވަގުތު ރާއްޖޭޭގެ ފިލްމީ ދާއިރާގައި އެންމެ އަލިގަދަ އަންހެންތަރި، މަރިޔަމް އައްޒަ އެވެ. ފިރިހެން ތަރިންގެ ގޮތުގައި ލީޑްކުރަނީ އާނަންދު އާއި ޢަލީ އާޒިމް (ދޮން އައްޔަ) އެވެ. ފިލްމުގެ ޑައިރެކްޓަރ ކުޅެނީ ސައިޑް ރޯލެކެވެ.

މުނިއަވަސް: ފިލްމުގެ ޓްރެއިލަރ އިން ވަރަށް އަސަރުގަދަ، ވަރުގަދަ މަންޒަރުތަކެއް ފެނޭ. އެހެންވީމަ އެ މަންޒަރުތައް ކުޅުމުގަ ދިމާވި ކަންތައްތަކާ އޭގެ އިތުރުން ކުޅުވުމުގަ ޑައިރެކްޓަރ ޔޫއްޕެގެ ފަރާތުން ފާހަގަވި ކަންތައްތަކަށް ކީކޭބާ ބުނެލާނީ؟

އާނަންދު: ވަރަށް ރީތިކޮށް ބުނެދޭނެ ޔޫއްޕެ. ޔޫއްޕެއާއެކު މަަސައްކަތްކުރެވުނު ހުރިހައި ފިލްމެއްގަވެސް ވަރަށް ބޮޑަށް މަންްޒަރުތައް ބުނެދޭނެ. ބުނެދޭނެ މަންޒަރު އިންނަންވާނެ ގޮތްބުނެދީ ކެރެކްޓަރ ތެރެއަށް ވައްދައިދޭ ޑައިރެކްޓަރެއް. ދެން ޔޫއްޕެ ބުނެދޭގޮތަށް އެ ޕާފޯމް ކުރެވޭތޯ ވަރަށް މަސައްކަތްކުރަން.

ދެން މީގަ (ނަފްރަތުވުމުން ގަ) އުނދަގޫ ތަންކޮޅަކަށް ވެގެންދަނީ އައްޒައަށް އަނިޔާކުރަން ޖެހޭކަހަލަ ސީންތައް އަންނާތީ. އެ ބައިތައް ކުޅެން ވަރަށް އުނދަގޫވި. ދެން އައްޒައަށް އިންނާނެ މި ފިލްމު ކުޅުމުގަ އަސްލަށްވެސް އަނިޔާވެފަ މީތި ކުޅުމުގެ ތެރޭގަ. ދޮން އައްޔައަށް ވެސް އިންނާނެ އަޅުގަނޑު ފަރާތުން އަނިޔާވެފަ. އެހެންވީމަ އެއީ ވަރަށް އުނދަގޫވި ކަމެއް. އެކަމަކު އައްޒަގެ ވަރަށް ބޮޑު ސަޕޯޓެއް ލިބުނު މިކަމުގަ އެއީ އޭނަ ބޭނުންވަނީ އެންމެ ރިއަލްކޮށް އަނިޔާވެސް ފެންނަގޮތަށް ހަދަން. އެހެންވީމަ ތަދުވިޔަސް އޯކޭއޭ ރިއަލްކޮށް ދައްކާށޭ އޭނަ ބުނާނެ. ދެން އެގޮތަށް ހުންނާނެ ނަގާފަ. އެއީ އަސްލު އެންމެ ބޮޑަށް އުދަގޫވި ކަމަކީ. އަންހެނަކަށް އަނިޔާކުރަންވީމަ އެ ލިބޭ އުނދަގޫތައް ވި.

އާނަންދު ބުނީ މި ފިލްމަކީ ހަމަ ކޮންމެ މީހަކުވެސް ބަލައިލަން ޖެހޭ، އިބްރަތްތެރި މޮޅު ފިލްމެއް ކަމަށެވެ. ލޯބީގެ އަސަރުގަދަ ފިލްމުތަކަށް ލޯބިކުރާ ފަރާތްތަކަށް ވަރަށް ބޮޑަށް ކަމުދާނެ ކަމަށެވެ.

ޔޫއްޕެ ޕްރޮޑަކްޝަންގެ ފިލްމު “ނަފްރަތުވުމުން” އޮލިމްޕަހަށް އަންނަން އޮތީ އެންމެ ހަތަރު ދުވަހެވެ. މިހާރުވެސް ފިލްމުގެ ޓިކެޓް އޮލިމްޕަހުން ވިއްކަމުން އެބަދެއެވެ. ޓިކެޓް ހޯދުމަށް 7384040 އަށް ގުޅައިގެންވެސް ކުރިއަށްދެވިދާނެ އެވެ.

“ނަފްރަތުވުމުން” ގެ ރަސްމީ އޮންލައިން މީޑިއާ ޕާޓްނަރަކީ މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: