ބައިސްކޯފުން ޕްރޮޑިއުސްކޮށް، މަޝްހޫރު ޑައިރެކްޓަރ އަމްޖަދު އިބްރާހިމް (އަމްޖޭ) ލިޔެ، ޑައިރެކްޓްކޮށްފައިވާ ބިރުވެރި ސިލްސިލާ ފިލްމު “ޝޫ” (Shhh) މެއި މަހުގެ 10 ން ފެށިގެން ދައްކަން ފެށުމަށް ތައްޔާރުވެއްޖެ އެވެ.

ބައިސްކޯފުން ބުނީ މިއީ ޚިޔާލީ ބިރުވެރި ސީރީޒެއް ކަމަށެވެ. މި ސީރީޒްގައި ހައްލުކުރަން ދަތި އަރަތެއް ހައްލުވެގެންދާގޮތް ބިރުވެރި ކަންތައްތަކެއްގެ ތެރެއިން ފެނިގެންދާނެ އެވެ. ނޭވާ ހިފަހައްޓައިލަންޖެހޭވަގުތު ގައިން ހީބިހި ނަގައިގެންދާނެކަމުގެ ގެރެންޓީދޭކަމަށް ވެސް ބައިސްކޯފުން ބުނެއެވެ.

“ޝޫ” (Shhh) އަކީ ބައިސްކޯފަށް އަމްޖޭ ތައްޔާރުކޮށްދޭ ބިރުވެރި ސީރީޒެކެވެ. މައިގަނޑު ތަރިންގެ ގޮތުގައި ފެނިގެންދާނީ ޝީލާ ނަޖީބް، އެރޫ، އަޒޭ އަދި ޒީނަތު އެވެ. މީގެ އިތުރުން ވަރަށް ޚާއްޞަ ކެރެކްޓަރ އަކުން މަޝްހޫރު އެކްޓަރ ޝާޒް ވެސް މި ސީރީޒުން ފެނިގެންދާނެ އެވެ.

ބިރުވެރި ފިލްމު އުފެއްދުމުގައި ރެކޯޑް ޤާއިމުކޮށްފައިވާ މަޝްހޫރު ޑައިރެކްޓަރ އަމްޖޭގެ “ޝޫ” (Shhh) ގެ ޓްރެއިލަރ އެއް ބައިސްކޯފުން މިހާރުވަނީ އާއްމުކޮށްފައެވެ. މި ޓްރެއިލަރ އިން ބިރުވެރި އެތައް މަންޒަރުތަކެއް ފެނިގެންދެއެވެ.

މި ސީރީޒްގެ ޑައިރެކްޓަރ އަމްޖޭ މުނިއަވަސް އަށް ބުނީ ޝާޒް ފެނިގެންދާނީ ބެލުންތެރިން ހީވެސް ނުކުރާފަދަ ތަފާތު މޮޅު ކެރެކްޓަރ އަކުން ކަމަށެވެ.

“ބިރުވެރި އެއްޗެއްބަލައިލަން ބޭނުންވާ ފަރާތްތަކަށް ވަރަށް ފުރިހަމަ ފިލްމަކަށް މި ފިލްމު ވާނެކަމުގެ ޔަޤީންކަން އަހަރެން ދެން.” ބިރުވެރި ސީރީޒް “ޝޫ” (Shhh) ގެ ޑައިރެކްޓަރ އަމްޖޭ ބުންޏެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: