އެކިއެކި ޒަމާންތަކުގައި ދިވެހިރާއްޖޭގެ އެކި ހިސާބުތަކުގައި ތަފާތު ހާދިސާތައް ހިނގާފައި އެބަހުއްޓެވެ. މީގެތެރޭގައި ބިރުވެރި ކަންތައްތަކާއި، ހެއްވާ މަޖާ ކަންތައްތަކާއި އާދަޔާޚިލާފު ވާހަކަތައް ހިމެނެއެވެ. ތުންތުންމަތިންނާއި ދޫދޫމަތިން ދެކެވެމުންދާ ވާހަކަތައްވެސް އެބަހުއްޓެވެ. މި ކިޔައިދެނީވެސް އެކަހަލަ ވާހަކައެކެވެ. މާ ކުރިއެއްވެސް ނޫނެވެ. އަދި މާ ފަހެއްވެސް ނޫނެވެ.

ރަށަކީ ދެކުނުގެ ބިންބޮޑު ރަށެކެވެ. ދުވަހަކީ އަޟްޙާ ޢީދު ދުވަހެވެ. ސަލާންގަލާން ކުރާމީހުންނާއި ގޭގެއަށް ޒިޔާރާތްކުރާ މީސްތަކުންނާއިގެން މަގުތައްވަނީ ފުރިފައެވެ. ބޮޑެތި މަގުތަކުގެ ކަންމަތި ތަކުގައި މީހުން ޖަމާވެފައި ވާތީ ފެނެއެވެ. އަޑުގަދަކަމުން ހީވަނީ ކުޑަފަރީ އޮޑިއެއް ރަށްމަތިވެގެން އުޅޭ ހެންނެވެ. ދައްކާ ވާހަކައެއް ސާފުވާވަރެއް ނުވެއެވެ. ރަށުގެ އެކި ހިސާބުތަކުގައި ހޭލަމޭލަވެގެން އުޅޭ މީހުންނާއި، ހަލަބޮލިވެގެން އުޅޭ ކުދިންގެ އަޑުން މުޅިތަން ވަނީ ގުގުމާލާފަ އެވެ. އަތިރިމަތީގައި އަދި ހޭޅިފަށުގައި ވެސް ކުދިވެރިންތައް ދުވެފުމެ ނަގަނީއެވެ. ހީވަނީ އެތައް ދުވަހަކު ކޮށީގައި ބައިތިއްބާފައި ދޫކޮށްލާފައިވާ ދޫނިތަކެއް ހެންނެވެ. ވާނީވެސް އެހެންތާއެވެ. މިއަދަކީ އަހަރުގެ ތެރޭގައި އަންނާނެ އެންމެ އުފާވެރި އެއްދުވަހެވެ.

ފަންކުޅުމާއި ފެންކުޅުން ކުރިއަށްދާއިރު ތިންމުގޯއްޔާއި މަންޑި ކުޅުމުގެ ފޯރިގަދަ ވެފައި ވެއެވެ. ނޫކަށިފުރައިގެ ވަރުގަދަަ ސިންގާތަކެއް ފަދަ ޒުވާނުން ތެލަބަގުޑި ކުޅެމުންދާއިރު، ހަލުވި ފުއްލާތަކެއް ފަދަ ޅަފުރައިގެ ކުދިންތައް ތަފާތު ކުލަތައް ގައިގާ އުނގުޅައިގެން މަގުމަތީގައި ދުވަނީއެވެ. އާނދޮގޭ ތިޔަހެނެއް ނުދެވޭނެއޭ، ޢީދުބޮލަށްގޮނޭ ކިޔާފައި، ފިރިހެންވެރިންގެ ކޮނޑުގައި އަތުން ޖަހާލައިފައި ދާ އަންހެންކުދިން ފެންނަނީ މަދެއްކޮށެއް ނޫނެވެ. މުޅި ސަރަޙައްދު ވަނީ ރައްޔިތުންނާއިގެން ރަކަރަކަ އަޅާފަ އެވެ.

ރަށުތެރޭގެ ކަންތައްތައް މިމަގުން ކުރިއަށް ދާއިރު ކަތީބު އަތޮޅުވެރިޔާއަށް ގުޅާފައި އެ ދަންނަވަނީ ކީކޭތޯއެވެ. އަސްތާ ކަމަކުދާކަށްނެތޭ ސަހަރޯއޭ، ސުބުޙާނައް ﷲ އޭ، މި ރަށަށް ކަނޑުބޭރި އަރައިފިއެވެ. ގަންނާކުރެއްވި ބިރާއެކު އަތޮޅުވެރިޔާ، ނާ ހަމަ ތެދެއްހޭ ވިދާޅުވެ ކަތީބުގެ އެ ބިރުވެރި ޚަބަރަށް އިޖާބަދެއްވައި ހަތިޔާރާއެކު ސިފައިން އެރަށަށް ފޮނުވުމުގެ އިންތިޒާމު ހަމަޖައްސަވައިފިއެވެ. ކަނޑުބޭރީގެ ނާމާންކަމުން ރަށަށް އަމާންކަން ހޯދައިދިނުމަށެވެ. ސިފައިން އެރަށަށް ފުރިތަނާ ހެން، އަނެއްކާވެސް ކަތީބު އަތޮޅުވެރިޔާއަށް ގުޅާފައި ދަންނަވައިފިއެވެ. ވަރަށް ބޮޑަށް މަޢާފަށް އެދެމެވެ. މިހާރު ވީގޮތްވެސް ސާފުވެއްޖެއެވެ. ޙަޤީޤަތުގައި ކަނޑުބޭރި އެރީއެއް ނޫނެވެ. ކުޑަކުއްޖަކު ގައިގާ ކަޅުކުލަ އުނގުޅައިގެން ދުވާތަން ފެނިފައި އަޅުގަނޑަށް އެހެން ހީކުރެވުނީއެވެ. އެގޮތަށް ސިފަކުރެވުނީއެވެ. ކަތީބުގެ މި ޚަބަރާއިއެކު ސިފައިންގެ ބޭކަލުން ވެސް، އެބޭކަލުން ތިއްބަވާ މަންޒިލަށް އެނބުރި ރުޖޫޢަވެއްޖައޫއެވެ.

ތެދެކެވެ. ފުއްޓަރު ފަރާތުން ބައްތިތަކުން ހުޅުދާން ކޮށްފައި ހުންނަ ބޮޑެތި އާގުބޯޓުތައް ފެނިފައި، ކަނޑުން ފުރޭތަ އަަރަނީކަމަށް ހީކޮށް އުޅުނު ޒަމާނެއްވެސް ވޭތުވެގެން ގޮސްފިއެވެ. ވައިރޯޅިއާއި ގަހެއް ހެލިލާ ގޮތުންވެސް އެއީ ޖިންނިއެއް ކަމުގައި ސިފަވެފައި އެބަހުއްޓެވެ. އާނއެކެވެ. އޮޅުންބޮޅުން ވުމަކީ ވެދާނެ ކަމެކެވެ. އެކަމަކު މިފަހަރު މިއޮޅުނީ މާބޮޑަށެވެ.

ލިޔުންތެރިޔާގެ ފުރަމަލަ

އަޙްމަދު ޝަބީން
އަޙްމަދު ޝަބީން
އަޙްމަދު ޝަބީން އަކީ ފެންވަރު ރަނގަޅު. ފަށުވި އަދަބީގޮތުން މުއްސަނދި ސިފަކުރުން ތަކަކާއިއެކުގައި އިޖްތިމާޢީ މައުޟޫ ތަކަށާއި އަދި އެހެންވެސް މަޢުޟޫތަކަށް ލިޔަމުން އަންނަ ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: