މުރަނގަ ފަތަކީ ދިވެހިން ވަރަށް ދަންނަ، އާއްމު ފަތެކެވެ. އެހައި އާއްމު ފަތަކަށް ވާއިރުވެސް، މިއީ ކިހައި ގިނަގުނަ ފައިދާތަކެއް އޭގައި އެކުލެވޭ ފަތެއްކަން ފަހަރެއްގައި ނޭނގި އޮވެދާނެ އެވެ. ނުވަތަ އެނގުނު ކަމުގައި ވިޔަސް، މި ފަތް ފިލުވައިގެން ކެއުމަކީ ފަސޭހަ ކަމަކަށް ނުވާތީ އާއްމުކޮށް ކައި ނޫޅެނީ ކަމަށްވެސް ވެދާނެ އެވެ.

ދިވެހީން މުރަނގަ ފަތް ތެލުލައިގެން ކާ ކަމީ ދެބަސް ވެވެން ނެތް ހަގީގަތެކެވެ. ނަމަވެސް މިހެން މުރަނގަ ފަތް ކެއުމަކީ އެ ފަތުގައި އެކުލެވިގެންވާ ފައިދާހުރި ކާނާގެ ބައިތައް ނެތިކޮށްލުމަށްފަހު ކެއުން ކަން އަހަރެމެން ވިސްނައިނުލަނީ ބާވައެވެ.

މުރަނގަ ފަތަކީ އެތަކެއް ޤަރުނެއް ވާންދެން ބޭސްވެރިކަމުގައި ވެސް ބޭނުން ކުރަމުން އަންނަ ފަތެކެވެ. ދިވެހި ބޭސްވެރިކަމުގައި ނުވަތަ ޔޫނާނީ ބޭސްވެރިކަމުގައި މުރަނގަ ފަތަކީ 300 އަށްވުރެން ގިނަ ބަލިބައްޔަށް ފަރުވާ ދިނުމަށް ބޭނުންކުރެވޭ ފަތެކެވެ.

މުރަނގަ ފަތުގައި މަތީ މިންވަރަކަށް ކެލްސިއަމް، ޕޮޓޭސިއަމް، ވިޓަމިން ސީ، ޕްރޮޓީންސް، ބީޓާ-ކެރޮޓީން އާއި އަދިވެސް އިތުރު ބައިތައް ހިމެނެއެވެ.

ފައިދާއިން ފުރިފައިވާ ފަތެއް

މުރަނގަ ފަތަކީ ވިޓަމިން ތަކާއި، މިނަރަލް ތަކުގެ އިތުރުން އެމައިނޯ އެސިޑްގެ ބާވަތްތަކުން ފުރިފައިވާ ފަތެކެވެ. ހިއްކާފައިވާ މުރަނގަ ފަތުގެ 100 ގްރާމުގައި އަންނަނިވި ފައިދާތައް އެކުލެވެއެވެ.

– ކެރެޓުން ލިއްބައިދޭ ވިޓަމިން އޭ އަށްވުރެން 10 ގުނަ އިތުރު

– ދޮންކޭލުން ލިއްބައިދޭ ޕޮޓޭސިއަމް އަށްވުރެން 15 ގުނަ އިތުރު

– ކިރުން ލިއްބައިދޭ ކެލްސިއަމް އަށްވުރެން 17 ގުނަ އިތުރު

– އޮރެންޖުން ލިއްބައިދޭ ވިޓަމިން ސީ އަށްވުރެން 12 ގުނަ އިތުރު

– ސްޕިނޭޗުން ލިއްބައިދޭ ދަގަނޑުގެ ބަޔަށްވުރެން 25 ގުނަ އިތުރު

އެންޓިއޮކްސިޑެންޓްސް

މުރަނގަ ފަތަކީ އެންޓިއޮކްސިޑެންޓެއްގެ ގޮތުގައި ބޭނުންކޮށްލަން ވަރަށް ރަނގަޅު ވަސީލަތެކެވެ. ވިޓަމިން ސީ، ކްލޮރޯޖެނިކް އެސިޑް، ބީޓާ-ކެރޮޓިން އަދި ކުއެރސެޓިން އަކީ މި ފަތުގައި އެކުލެވޭ އެންޓިއޮކްސިޑެންޓްސް ގެ މާއްދާ ތަކެވެ. ކްލޮރޯޖެނިކް އެސިޑަކީ ހަށިގަނޑުގައި ހުންނަ ސެލްތަކަށް ހަކުރުގެ މާއްދާ ދަމައިގަތުން ލަސްކޮށްދޭ އެއްޗެއްކަން ވަނީ ސާބިތުވެފައެވެ. މިކަމުގެ ސަބަބުން ލޭގެ ޕްރެޝަރު ހުންނަ މިންވަރު ދަށްކޮށްދެ އެވެ.

ލޭގައި ހުންނަ ހަކުރުގެ މިންވަރު ދަށްކޮށްދޭ

މުރަނގަ ގަހުގައި ހުންނަ ފައިދާހުރި މާއްދާއެއް ކަމަށްވާ އައިސޯތިއޯސައިނޭޓްސް އަކީ ހަކުރުބަލިން ދުރުކޮށްދިނުމުގެ ސިފަތައް ލިބިފައިވާ މާއްދާއެކެވެ. ދިރާސާތައް ދައްކާގޮތުން، ހިއްކާފައި ހުންނަ މުރަނގަ ފަތުގެ 7 ގްރާމް ކޮންމެ ދުވަހަކު އެއްފަހަރު 3 މަސް ދުވަސް ވާންދެން ކެއުމުން، ލޭގައި ހުންނަ ހަކުރުގެ މިންވަރު 13.5 އިންސައްތައަށް ދަށްކޮށްދެ އެވެ. މިއީ ހުސްބަނޑާ ހުރެ ޓެސްޓް ކުރުމުން ދައްކާ ނަތީޖާއެވެ.

ދުޅަކަން ފިލުވައިދިނުމާއި ފާރު ހިއްކައިދޭ

މުރަނގަ ފަތުގައި ހުންނަ އައިސޯތިއޯސައިނޭޓްސް، ފްލެވެނޮއިޑްސް އާއި ފިނޯލިކް އެސިޑަކީ ދުޅަ ފިލުވުމާއި ފާރު ހިއްކައިދިނުމަށް ބާރު އަޅައިދޭ މާއްދާ ތަކެކެވެ. އެހެންކަމުން، ގޮހޮރުގައި އުފެދޭ ފާރު ހިއްކުމަށް މުރަނގަ ފަތަކީ ޒަމާނުއްސުރެން ބޭނުންކުރަމުން އަންނަ އެއްޗެކެވެ. ޗިސްމޭ ދުޅަވުމުން ރައްކާތެރި ކުރުމަށްވެސް މުރަނގަ ފަތް ބޭނުންކުރެއެވެ. ރޯކޮށް ކެއުމަށާއި ސަޓަނި ހަދައިގެން ވެސް މުރަނގަ ފަތް ބޭނުންކުރެވިދާނެ އެވެ. މިއީ ހަމުގެ ތެތްކަން ހިފެހެއްޓުމަށް ވަރަށް ބަރާބަރު އެއްޗެކެވެ. ފަންގަސް އިން ޖެހޭ ބަލިބައްޔާއި ހުޅުހުޅުގައި ރިއްސުން ފިލުވުމަށްވެސް މުރަނގަ ފަތް ބޭނުންކުރެވިދާނެ އެވެ.

ފައިދާހުރި މިންވަރަކަށް ސަރުބީ (ކޮލެސްޓްރޯލް) ހިފަހައްޓައިދޭ

މުރަނގަ ފަތަކީ ސަރުބީގެ މިންވަރު ދަށް ކުރުމަށްވެސް ނުހަނު ބޮޑަށް ބާރު އަޅައިދޭ އެއްޗެކެވެ. ހިތުގެ ބަލިތައް ކަމަށްވާ ކާޑިއޯވަސްކިއުލަރ ބަލިތަކުން ދުރުކޮށްދިނުމަށްވެސް މުރަނގަ ފަތަކީ މުހިންމު ދައުރެއް އަދާކޮށްދޭނެ އެއްޗެކެވެ.

ވިހަގަދަ އާރސެނިކުން ރައްކާތެރިކޮށްދޭ

މުރަނގަ ފަތާއި މުރަނގަ ތޮޅީގެ އޮށަކީ އާރސެނިކް ގައި ހުންނަ ވިހަކަން ފިލުވައިލަދޭ އެއްޗެކެވެ. ކާނާގެ ބައެއް ބާވަތް ތަކަކީ ބައެއް ފަހަރަށް އާރސެނިކުން ތަޣައްޔަރު ވެފައިވާ ތަކެއްޗެވެ. އެގޮތުން ހަނޑުލާއި ދަނޑިއަލުތްވަކީ ފާހަގަކޮށްލެވޭ ދޭއްޗެވެ.

މުރަނގަ ފަތުން ފެން ސާފުކޮށްދޭ

މުރަނގަ ފަތަކީ ފައިބަރުގެ މާއްދާ ނުހަނު މަތީ މިންވަރަކަށް އެކުލެވޭ ފަތެއްކަމުން، މި ފަތް ކެއުމުން ގޮހޮރު ސާފުކޮށްދެ އެވެ. މި ފަތުގައި އެކުލެވޭ އައިސޯތިއޯސައިނޭޓްސް އަކީ ބަލި ޖައްސާ ޖަރާސީމާއި ހަނގުރާމަ ކުރުމުގެ ކުޅަދާނަކަން ލިބިފައިވާ މާއްދަ އެކެވެ. އެހެންކަމުން ގޭހުގެ އުނދަގޫ ވުމާއި، ގޮހޮރާއި ބަނޑުގެ ކެންސަރު ޖެއްސުމަށް މަސައްކަތްކުރާ ހެލިބޯބެކްޓަރ ޕައިލޯރީ ނައްތައިލުމުގެ ޤާބިލުކަން ލިބިފައި ވެއެވެ.

މީގެ އިތުރުން މުރަނގަ ގަހުގެ އޮށަކީ ފެން ސާފުކޮށްދިނުމަށް ނުހަނު ބޮޑަށް ބާރުއަޅައިދޭ އެއްޗެއްކަން ވެސް ވަނީ ހޯދިފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: