އާދޭހެވެ. ތަޢުލީމުން، ތަމްރީނު ލިބިގަނެގެން މެނުވީ، ތަރުތީބު މަގުން ނަފުސު ތަރުބިއްޔަތެއް ނުކުރެވޭނެއެވެ. އަދި ކިއެއްތަ ޙަޔާތުގެ ތަސްވީރު ކުރެހޭނެ، ފުރިހަމަ ތަސައްވުރެއް ވެސް ކުރެވެނީ، ތަޢުލީމީގޮތުން ޤާބިލް މީހަކަށް ވެވިގެންނެވެ. ދުނިޔެވީ ކަންތައްތައްތަކާއިމެދު ތަދުބީރު ކުރެވޭނީވެސް ހަރުދަނާ ވިސްނުމަކާއި، ޙިކުމަތެއް ހުރެގެންނެވެ. ޝައްކެއްނެތެވެ. ސިކުނޑިއަށް އާރޯކަންލިބި ތާޒާވެ ހަރުދަނާ ފިކުރެއް ކުރެވޭނީވެސް، ތަޢުލީމީ ސިކުނޑިއެއްގެ ވެރިއަކަށެވެ. ތަނެއްދޮރެއް ނޭނގޭމީހާ އަބަދުވެސް ޖެހޭނީ ތަޤްލީދު ކުރާށެވެ. އަދި ހަމައެހެންމެ ތަންދޮރު އޮޅުންފިލާ އަމިއްލަވަންތަ ކަމެއް ލިބޭނީވެސް، ތަޢުލީމަށް ތަރުޙީބު ދެވުނު މިންވަރަކުންނެވެ. ތަސައްރަފު ފުދި ތިމާގެ ޒުވާންކަމުގެ އިރު ފެނުން ތިރިނުވަނީސް ތަޢުލީމު ލިބިގަންނާށެވެ. އެހެނީ، ޅައުމުރުގައި ދަސްކުރާ އެއްޗެހި ހިލައިގާ ކަނޑައި ނަގައިފައި ހުންނަ ފަދައިން ހިތުތެރޭގައި ލިޔެވިފައި ވާނެއެވެ. އަދި ދެވަންފުރާގައި ވިސްނުމުގެ ބާރުގަދަވާނެއެވެ. ދަންނައެ އެންމެ މާތް މީހަކީ ތަކުލީފު ތަކާއި އެކުގައިވެސް ތަޢުލީމު ޙާސިލުކުރާ މީހާއެވެ. ޤައުމެއް ތަމައްދުނުވެ ތަހުޒީބުވެދަނީވެސް އެޤައުމެއް ޢިލްމީގޮތުން ކުރިއެރުމުންނެވެ. މި ބީދައިން ބަލާއިރު، އިންސާނާ ތަހުޒީބުވަނީވެސް، ތަޢުލީމު ލިބިގެންނެވެ. މަންމަގެ އުނގުން ފެށިގެން ކަށްވަޅަށް ދާންދެންވެސް ޢިލްމު އުނގެނޭށޭ ބުނަނީ މިހެންވެގެންނެވެ.

މިއަދު މިކުޑަކުޑަ މާލްދީބުވެސް މިވަނީ، ޢިލްމީ ގޮތުން އެތައް ހަރުފަތްތަކެއް ގިރާކޮށް ޢިލްމީގޮތުން ކުރިއަރާފައިވާ ޤައުމަކަށް ވެފައެވެ. އެހެންނަމަވެސް ދަންނަވަންތޯއެވެ. ކޮންމެ ކަމެއްގައިވެސް ހެވާއިނުބައި އޮންނާނެއެވެ. ޢިލްމުގެ އެތައް ވައްތަރެއްވާ ފަދައިން، ޢިލްމުގެ ތެރޭގައިވެސް ރަނގަޅާއި ނުބައި އޮންނާނެއެވެ. އެދުރުންނާއި ރޯނުއެދުރުން ވާ ބީދައިންނެވެ. މިއަދު މިޤައުމުވެސް މިވަނީ އެފަދަ ހައިޖާނުގަނޑެއްގެ ތެރޭގައެވެ. މާ ބޮޑަށް އެނގިގެން ތިމާއަށް ތިމާއަކީ ކާކުކަން އޮޅުންނުފިލާ މީހުންވެސް މަދެއްނޫނެވެ. ތަނެއްދޮރެއް ނުއެނގި ހާސާރު ދަމާ މީހުންވެސް މަދެއްނޫނެވެ. އެފަދަ މީހުންގެ ކަމަކަށް ވާނީ، ޢިލްމަށް ޖޯކުޖަހައި ހަޖޫޖެހުމެވެ.

އާދެ! ތިޔައިން ކޮންމެ ބޭފުޅަކަށްވެސް އެނގިވަޑައިގަންނަވާނެ ފަދައިން ދިވެހިބަހުގެ އެކަޑަމީއިން ވަނީ، މިފަހަކަށްއައިސް ޗާލު ބަސްތަކެއް ވުޖޫދަށް އުފަންކުރުވާފައެވެ. އެކަމަކުވެސް ވަލުބުޑުނުކެނޑި ތިބި ބަޔަކުވަނީ، މިއަގުހުރި މަސައްކަތްޕުޅުތަކަށް ހަޖޫޖަހާފައެވެ. އެއްވެސް ވަސްވާހެއް ނެތެވެ. ޢިލްމު ލިބޭނީ ޢިލްމަށް އިހްތިރާމް ކޮށްގެންނެވެ. ޢިލްމުވެރިންނަށް އިހްތިރާމް ކޮށްގެންނެވެ. ޢިލްމުވެރިންގެ ރައުޔު ތަކަށް ޤަދަރު ކުރެވިގެންނެވެ. ޢިލްމުވެރިންގެ ބަސްތައް ކަނުލައި އަޑުއަހައިގެންނެވެ. އަދި ދަންނަވަންތޯއެވެ. ޢިލްމު ލިބޭނީ ތިމާއާ އެއް ފެންވަރެއްގެ މީހުންގެ ގާތުން އޮޅުންފިލުވައިގެންނެވެ. ތިމާއަށްވުރެ ދަށް ފެންވަރުގެ މީހުންގެ ގާތުންވެސް އޮޅުންފިލުވައިގެންނެވެ.

ކަންމިހެން ހުރިއިރު ޢިލްމު ހޯދުމަށް ލަދުވެތިވުމެއް ނެތެވެ. ލަދަކާއި ހުރެ ތަދެއް ނުފިލާނެއެވެ.
ވަހުމެއް ނެތެވެ. ހަމަ ޔަޤީނެވެ. އިންސާނާގެ ޙަޔާތުގެ އެއްމެ މުހިއްމު ރުކުނަކަށް ވާނީ ތަޢުލީމެވެ. މީގެ ސާފު ހެއްކަކަށް ކީރިތި ޤުރުއާނުގެ ޢަލަޤް ސޫރަތް ފުދެއެވެ. އަދި ކިއެއްތޯއެވެ! އަސްޙާބު ބޭކަލުންނާއި، ތާބިޢީ ބޭކަލުންނާއި، ތަބަޢަ ތާބިޢީ ބޭކަލުން އަދި ހަމަ އެހެންމެ ސަލަފުއްޞާލިހުން ޢިލްމަށް ދެއްވި އަހައްމިއްޔަތު ތާރީޚުން ފެންނަން އެބައޮތެވެ. އެންމެ ޙަދީޘެއް ހޯދުމަށްޓަކައިވެސް، ބައެއް ބޭކަލުންވަނީ ދިގު ދަތުރު ތަކެއް ކުރައްވާފައެވެ.

އާދެ! އަޅުގަނޑުގެ ޅައުމުރުގައި ވަރަށް ގިނައިން އަޑުއިވޭ ލަވައެއްގެ ތަންކޮޅެއް ހަނދާންއެބަހުއްޓެވެ. “ނޭނގުމަށްވުރެ ވަކިން ދެރަކަމެއް ހަމަނެތޭ” މިއީ ތެދެއްނޫންތޯއެވެ. ދަންނަ މީހާއާއި ނުދަންނަ މީހާ ހަމަހަމަ ވާނެތޯއެވެ. ޢިލްމު ނުލިބޭ ޖާހިލު މީހަކަށް ވުރެ ވަކިން ބޮޑު ދެރަމީހެއް ހުންނާނެތޯއެވެ.

ލިޔުންތެރިޔާގެ ފުރަމަލަ

އަޙްމަދު ޝަބީން
އަޙްމަދު ޝަބީން
އަޙްމަދު ޝަބީން އަކީ ފެންވަރު ރަނގަޅު. ފަށުވި އަދަބީގޮތުން މުއްސަނދި ސިފަކުރުން ތަކަކާއިއެކުގައި އިޖްތިމާޢީ މައުޟޫ ތަކަށާއި އަދި އެހެންވެސް މަޢުޟޫތަކަށް ލިޔަމުން އަންނަ ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: