ވީމީޑިއާގެ ފުރަތަމަ ފީޗާ ފިލްމު “ދައުވަތު” އަކީ މިހައިތަނަށް ދިވެހި ފިލްމީ ސިނަމާއަށް އައި އެންމެ އިބްރަތްތެރި ފިލްމުގެ އިތުރުން ބިރުވެރި ފިލްމެއް ބަލައިލަން ކޮންމެހެން ވެސް ބަލަން ޖެހޭ ފިލްމު ކަމަށް ފިލްމު ބެލި ގިނަ ފަރާތްތަކުން ބުނެފިއެވެ.

ފިލްމު “ދައުވަތު”ން އާންމުން ކޮންމެހެންވެސް ހޭލުންތެރިކުރުވަންޖެހޭ މުހިންމު މައްސަލައަށް ވަރަށް ރަނގަޅަށް އިންސާފުކޮށްދީފައިވާތީ ވަރަށް ގިނަ ބެލުންތެރިން ވަނީ އެކަން ފާހަގަކޮށްފައެވެ. އަދި ފިލްމު އޭގެ އެންމެ ފުރިހަމަ ގޮތުގައި ގެނެސްދިނުމަށް ޑައިރެކްޓަރުކޮށްފައިވާ ބުރަ މަސައްކަތްވެސް އާންމުން ވަނީ ފާހަގަކޮށްފައެވެ.

ފިލްމު “ދައުވަތު”ގެ ފުރަތަމަ ޝޯ ދައްކާފައިވަނީ ހައުސް ފުލްކޮށެވެ. މިހާތަނަށް 5 ޝޯގެ ޓިކެޓް މުޅިން ވިކި ހުސްވެފައިވާއިރު، އޮލިންޕަހުގައި ދެއްކުމަށް ހަމަޖެހިފައިވަނީ ޖުމްލަ 15 ޝޯއެވެ.

ތަރިންގެ އެކްޓިންނަށް ދޭން އޮތީ 100. ހުރިހާ ތަރިންގެ އެކްޓިންވެސް ވަރަށް މޮޅު

“ދައުވަތު” ބެލި ހުރިހާ އެންމެންވެސް އިއްތިފާގުވާ އެއްކަމެއް އެބައޮތެވެ. އެއީ ދައުވަތުގައި ހުރިހާ ތަރިންގެ ފަރާތުންވެސް މޮޅު އެކްޓިންއެއް ފެނިގެންގޮސްފައިވާކަމަށެވެ.

“ދައުވަތު”ގައި މަޝްހޫރު ފިލްމީ ތަރި މުހައްމަދު ފައިސަލް، ޒުވާން ފިލްމީ ތަރި އަލީ އާޒިމް (ދޮން އައްޔަ)، ކުޅަދާނަ ބަތަލާ މަރިޔަމް އައްޒަ، އަހުމަދު އީސަ (އާނަންދު) އަދި ފޯޓީޕްލަސްއިން ފިލްމީ ދާއިރާއަށް ތައާރަފްކުރި ޒިޔާދާވެސް ފެނިގެންދާނެއެވެ.

ބެލުންތެރިންގެ ނަޒަރުގައި މިއީ ދިވެހި ފިލްމެއްގައި ހުރިހާ ތަރިންގެ ފަރާތުން މި ފެންވަރުގެ އެކްޓިންއެެއް ފެނުނު ފުރަތަމަ ފަހަރެވެ. ކޮންމެ ފަންނާނެއްވެސް ވަނީ އެ ފަންނާނެއްގެ ރޯލް ވަރަށް ފުރިހަމައަށް ގެނެސްދީފައެވެ. ވަކިން ޚާއްސަކޮށް މި ފިލްމުގައި އާނަންދުގެ މޮޅުކަން ހުރިހާ ބެލުންތެރިންވެސް ވަނީ ފާހަގަކޮށްފައެވެ.

“އާނަންދު ވަރަށް މޮޅު. ހަމަ އަޖައިބުވާވަރުކޮށްލި. ހާދަ މޮޅަށޭ އޭނާގެ ބައި ގެނެސްދީފައިވަނީ. ޚާއްސަކޮށް ބުމަ ބާލައިގެން ސިހުރުވެރިއެއްގެ ރޯލް ގެނެސްދީފައިވާގޮތް ވަރަށް ފާހަގަކޮށްލެވޭ. އާނަންދު ނޫން މީހަކަށް މި ރޯލް ކުޅެވިދާނެބާއޭވެސް ހިތަށް އަރާ.” ފިލްމު ބެލުމަށްފަހު ނޫސްވެރިންނާއި ވާހަކަދެއްކި މީހަކު ބުންޏެވެ.

މީގެ އިތުރުން ފިލްމުގައި އައްޒައަކީ އެންމެ މުހިންމު ރޯލުން ފެނިގެންދާ ތަރިއެވެ. އައްޒަގެ ހިތްދަތި ދިރިއުޅުމުން ހިތް ފަޅައިގެންދާ ފަދައެވެ. އެފަކީރު ފަހުން ދިރިއުޅެންޖެހުނީ ހާދަބޮޑު ވޭނެއްގައެވެ. ހާދަބޮޑު ހިތްދަތިކަމެއްގައެވެ.

މި ހުރިހާ މަންޒަރުތަކެއްގައި އައްޒަ ފެނިގެންދަނީ ހަގީގީ މަންޒަރުތަކެއްގައި ފެންނާނެފަދަ ގޮތަކަށެވެ. އެހާވެސް އައްޒަގެ އެކްޓިން ރަނގަޅެވެ.

“އައްޒައާއި ދޭތެރޭ ބުނާނެ އެއްޗެއް. ޚާއްސަކޮށް ކްލައިމެކްސް. ފިލްމުގެ ފަހުގެ މަންޒަރުތަކުގައި އައްޒަ އެ ދައްކައިދީފައިވަނީ މީގެ ކުރިން އޭނާ ކުޅުނު ބިރުވެރި ފިލްމުތަކުގައިވެސް ނުފެންނަފަދަ މަންޒަރުތަކެއް. ބައެއް ފަހަރު ހިތަށް އަރާ އެއީ ހަމަ ހަގީގީ މަންޒަރުތަކެކޭވެސް.” އައްޒައާއިމެދު ޝުއޫރުފާޅުކުރި ބެލުންތެރިއަކު ބުނެފައިވެއެވެ.

މީގެ އިތުރުން ފައިސަލްއާއި، ޒިޔާދާ ފެނިގެންދަނީ ވަރަށްވެސް ތަފާތުކޮށެވެ. އެއީ ކުރިން ލޯބިން އުޅުނު ދެމަފިރިންނެވެ. ނަމަވެސް ސިހުރުގެ ސަބަބުން ކައިވެނި ރޫޅި، ސިހުރުވެރިޔާގެ މިލްކަކަށް ޒިޔާދާވެއެވެ. ފަހުން އޭނާ އޮންނަނީ ވާވެ، ބަލި އެނދުގައެވެ. ފިލްމުގައި އެ މަންޒަރުތައް ވަރަށް މޮޅަށް ޒިޔާދާ ގެނެސްދެއެވެ. އަދި ސިހުރުގެ ސަބަބުން އެތައް ވޭންތަކެއް އުފުލާ ފައިސަލްވެސް އޭނާގެ ކުރީގެ އަނބިމީހާގެ ހައްގުގައި މަސައްކަތްކުރެއެވެ.

ދެން އޮތީ ކުޅަދާނަ ޒުވާން ފިލްމީ ތަރި ދޮން އައްޔަގެ ވާހަކައެވެ. އައްޔައަކީ ފިލްމީ އޯޑިއެންސްގެ ބޮޑު އިތުބާރެއް އޮތް ފަންނާނެކެވެ. “ދައުވަތު” މި ފިލްމާއެކު އެ އިތުބާރު ވަނީ ބޮޑުވެފައެވެ. ކިތަންމެ މަޖާކޮށް ބައެއް ފިލްމުގައި ފެނުނު ނަމަވެސް އައްޔައަކީ ކޮންމެ ރޯލަކަށްވެސް ފިޓް މީހެއްކަން “ދައުވަތު”ން އައްޔަ ވަނީ ސާބިތުކޮށްދީފައެވެ.

ދައުވަތުގައި ފާހަގަކޮށްލެވޭ އެހެން ކަންކަން:

“ދައުވަތު” މި ފިލްމަކީ ހުރިހާ ގޮތަކުންވެސް ބަލާލަން ޖެހޭ ފިލްމެކެވެ.

ފިލްމުގައި މަންޒަރުތައް ގެނެސްދީފައިވާގޮތް ވަރަށްވެސް ހިތްގައިމެވެ. ކުޅަދާނަ ކެމެރާން ދަބާގެ މަސައްކަތަށް ތައުރީފު ހައްގެވެ. ކޮންމެ މަންޒަރެއް ހާލަތާއި އެއްގޮތަށް ގެނެސްދޭން ގިނަ މަސައްކަތްތަކެއް ވަނީ ކޮށްފައެވެ. ފިލްމުގައި މަންޒަރުތައްވެސް ނަގާފައިވަނީ އެ މަންޒަރެއް ނެގުމަށް އެންމެ ރަނގަޅު މާހައުލުތަކުގައެވެ.

މީގެ އިތުރުން މޭކަޕްގެ ހަސަންގެ މަސައްކަތަށް ހުރިހާ ބެލުންތެރިން ތައުރީފުކޮށްފައިވެއެވެ. ޚާއްސަކޮށް ޒިޔާދާ ބަލި އެދުގައި އޮންނަ މަންޒަރުތަކުގައި އޭނާގެ މޭކަޕް ވަރަށް ފާހަގަކޮށްލެވެއެވެ. މީގެ އިތުުރުން އައްޒައާއި އާނަންދުގެ ހަށިގަނޑަށް ރޫހާނީ މަޚުލޫގު ވަންނަ ވަގުތުތަކުގައި އެ ތަރިން ފެންނަ ބިރުވެރިގޮތް މޭކަޕުން މޮޅަށް ދައްކައިދީފައިވެއެވެ. އަދި ފައިސަލްވެސް ފެންނަނީ މުޅި ފިލްމުގައި ވަރަށްވެސް ތަފާތުކޮށެވެ. ހަމަ މޭކަޕުންނެވެ. މީގެ އިތުރުން އައްޒައަށް ހުވަފެނުގައި ފެންނަ ދޮންއައްޔަގެ ބައެއް މަންޒަރުތަކުގައި އައްޔަ ހުންނަ ބިރުވެރިގޮތްވެސް މޭކަޕުން ދައްކައިދީފައިވަނީ މޮޅަށެވެ.

ފިލްމުގެ ވާހަކަ އަދި ސްކްރީންޕްލޭގެ ފުރިހަމަކަން:

މިއީ ހަގީގީ ހާދިސާއެއްގެ މައްޗަށް ބިނާކޮށް ހަދާފައިވާ ވަރަށްވެސް އިބްރަތްތެރި ފިލްމެކެވެ.

މިއީ ރާއްޖޭގެ ދެކުނުގެ ރަށެއްގައި ހިނގާދިޔަ ހާދިސާއެކެވެ. އެތައް އުންމީދުތަކަކާއެކު އުފާވެރި ޖަވާޒީ ހަޔާތަށް އެދި ކައިވެނިކުރި ދެމަފިިރިންނަށް ދިމާވި ދުވަހަކުވެސް އެމީހުންގެ ހަނދާން ފިލައިގެން ނުދާނެ ހާދިސާއެކެވެ. “ދައުވަތު” މި ފިލްމުގައި މި ހާދިސާ ވަރަށް ފުރިހަމައަށް ބެލުންތެރިންނާއި ހަމައަށް ވަނީ ގެނެސްދީފައެވެ.

ވާހަކަ ލިޔެ، ސްކްރީންޕްލޭ ތައްޔާރުކޮށްފައިވަނީ ޔޫއްޕެއެވެ.

މިފަހުން ފުލުފުލުގައި ޔޫއްޕެ އިސްކިރީނަށް ގެނެސްދިން ކޮންމެ ފިލްމެއްގައިވެސް ހިމެނޭ ޔޫއްޕެގެ ވާހަކަތަކެވެ. އެހެން ފިލްމުތަކެކޭ އެއްގޮތަށް “ދައުވަތު” މިއީވެސް މޮޅު ވާހަކައެވެ. ރީތި އަދި އެހާމެ ވަރުގަދަ ޑައިލޮގުތަކެއް ހިމެނިފައިވާ މޮޅު ސްކްރީންޕްލޭއެކެވެ. އެހެންވީމަ ޔޫއްޕެގެ ވާހަކައަށް މިފަހަރުވެސް ދޭން އޮތީ 100އެވެ.

ޔޫއްޕެގެ މަސައްކަތަށް ޝުކުރު ހައްގު:

“ދައުވަތު” މިހާ ރީތި އަދި މޮޅު ފިލްމެއްގެ ގޮތުގައި ގެނެސްދިނުމުގައި ހުރިހާވެސް ޝުކުރެއް ހައްގީ ފިލްމުގެ ޑައިރެކްޓަރު ޔޫސުފް ޝަފީއު (ޔޫއްޕެ)އަށެވެ.

ފިލްމުގެ ހުރިހާ ތަރިން ފާހަގަކުރި ގޮތުގައި ފިލްމުގައި ފެނިގެންދާ މޮޅު އެކްޓިން އެގޮތުގައި ގެނެސްދެވުނީ ޔޫއްޕެގެ ކުޅަދާނަކަމުންނެވެ. ކޮންމެ މަންޒަރެއް ޑައިރެކްޓަރު ބުނެދޭލެއް ފުރިހަމަކަމުންނެވެ. ބައެއް މަންޒަރުތައް ދިހަބާރަ ފަހަރު ޖައްސަން ޖެހުނުނަމަވެސް ޔޫއްޕެ ބޭނުންވާ މަންޒަރު ނެގެންދެން ކެތްތެރިކަމާއެކު ހޭދަކުރި ވަގުތެވެ.

ފިލްމުގައި ހިމެނޭ ހުރިހާ ތަރިންވެސް ބުނީ ލިބުނު ރޯލް އޭގެ އެންމެ ފުރިހަމަގޮތުގައި ގެނެސްދެވުނީ ޔޫއްޕެ ކުރި އިތުބާރުންނެވެ. އަދި މަންޒަރުތައް ކުޅެންވީގޮތް ބުނެދިންލެއް ފުރިހަމަކަމެވެ.

ޔޫއްޕެވެސް ބުނީ “ދައުވަތު”ގެ ކޮންމެ މަންޒަރަކީވެސް އަސްލާއި އެއްގޮތަށް ގެނެސްދެވޭ މަންޒަރަކަށް ހެދުމަށް ގިނަ މަސައްކަތްތަކެއްކޮށްފައިވާނެކަމަށެވެ. ޚާއްސަކޮށް މަންޒަރުތަކުގެ ލައިޓިންނާއި، މަންޒަރުތައް ގެނެސްދީފައިވާނީވެސް ބެލުންތެރިން ވަރަށް ޝައުގުވެރިވާނެފަދަ ގޮތަކަށްކަމަށް ޔޫއްޕެ ވަނީ ބުނެފައެވެ.

އަދި ފިލްމުގައި ހިމެނޭ ތަރިންގެ ފަރާތުން އާދަޔާ ޚިލާފު މޮޅު އެކްޓިންއެއް ފެނިގެންގޮސްފައިވާކަން ޔޫއްޕެވެސް ވަނީ ފާހަގަކޮށްފައެވެ.

“ފިލްމުގައި ހިމެނޭ ކޮންމެ ތަރިއަކުވެސް ވަނީ އާދަޔާ ޚިލާފު އެކްޓިންއެއް ދައްކާފައި. އައްޒަ، ދޮންއައްޔަ، އާދަންނު، ޒިޔާދާ ކޮންމެ ތަރިއެއްވެސް ވަރަށް މޮޅު.” ޔޫއްޕެ ބުންޏެވެ.

“ދައުވަތު”ގެ 15 ޝޯ އޮލިންޕަހުގައި ދެއްކުމަށް ހަމަޖެހިފައިވާއިރު، ފިލްމުގެ ޓިކެޓް މިހާރު އޮލިންޕަހުން ދަނީ ވިއްކަމުންނެވެ. ޓިކެޓް ވިއްކަނީ ކޮންމެ ދުވަހެއްގެ ހެނދުނު 10:00 ފެށިގެން ރޭގަނޑު 10:00އަށެވެ.

މީގެ އިތުރުން އަތޮޅުތެރޭގައިވެސް ފިލްމު އެޅުވުމުގެ ފުރުސަތު އޮތީ ހުޅުވާލާފައެވެ.

މި ފާހަގަކުރެވުނު ކަންކަމަށް ބަލާއިރު، “ދައުވަތު” މިއީ ކޮންމެ މީހަކުވެސް ބަލާލަންޖެހޭ ފިލްމެކެވެ. މިއީ ދިވެހި ސިނަމާއަށް އައި އެންމެ އިބްރަތްތެރި ފިލްމެވެ. އެހެންކަމުން ހޭލުންތެރިކަން އިތުުރުކޮށްލާ، އިބްރަތް ލިބިގަތުމަށްވެސް މި ފިލްމު ބަލާލަންދާންޖެހެއެވެ.

މަޢުލޫމާތު ނެގީ: ވީނިއުސް އިން

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: