ޖޭމު ދޮންކަމަނަގެ ލަވަތަކުގެ ތެރެއިން އެންމެ މަޝްހޫރު އެއް ލަވަ “ނާނާ” އަކީ ހަމަ ކޮންމެ ދިވެއްސަކުމެ ދަންނާނެ ލަވައެކެވެ. މި ލަވައިގެ ކަވަރ ވާޝަންއެއް މަރިޔަމް އުނޫޝާ(ކިޑީ) އާއި އޭނާގެ މަންމަ ފާތުމަތު ޝަފީޤާގެ އަޑުން މިއޮތީ އިއްވާލާފައެވެ.

“މަޑުން އޮވެ ނިދާލާތޯ ކިޔޭ ކިޔޭ ނާނާ” ގެ މި ހިތްގައިމު ވާޝަން މިމަހުގެ 28 ގައި ސައުންޑްކުލައުޑަށް ލާފައިވާއިރު، މި ލަވައަށް އަންނަނީ އެތައް ބައެއްގެ ތައުރީފު އޮހެމުންނެވެ. “ނާނާ”ގެ އާ ވާޝަން އަށް މިޔުޒިކް ތައްޔާރުކުރީ “ބާރޗީ” އެވެ.

އުނޫޝާގެ މި ލަވަ ޚާއްސަކޮށްފައިވަނީ ހުރިހައި މައިންނާއި ދަރިންނަށެވެ. މިއީ އުނޫޝާ މަންމައަކަށް ވީ ފަހުން އޭނާގެ އަޑުން އިވިގެންދިޔަ ފުރަތަމަ ލަވައެވެ. މަޝްހޫރު ލަވަކިޔުންތެރިޔާ އަދި މޯލްޑިވިއަން އައިޑަލް ތިން ސީޒަންގެވެސް ފަނޑިޔާރުކަން ކޮށްފައިވާ އުނޫޝާާ އާއި ހަމީޝްގެ ހަޔާތަށް ބަހާރުމޫސުމް ގެނެސްދިން ދަރިފުޅު ލިބުނީ 12 މެއި2019 ގައެވެ.

“ނާނާ” ލަވަ ސައުންޑްކްލައުޑަށް ލާފާއިވަނީ އުނޫޝާ މާބަނޑު ދުވަސްވަރު ބަގީޗާއެއްގެ ތެރޭގައި ހުރި ގޮނޑިއެއްގައި އިށީންދެލައިގެން އިންއިރު، އުނޫޝާގެ ފުރަގަހުގައި ހުއްޓިލައިގެން އޭނާގެ މަންމަ ޝަފީޤާގެ ގަޔާއި ކައިރިކޮށްލައިގެން ހުންނަ ވަރަށް ހިތްގައިމު ފޮޓޯއަކާއި އެކުގައެވެ.

“މަޑުން މި އޮވެ ނިދާލާތޯ ކިޔޭ ކިޔޭ ނާނާ، މަވީ މަވީ ލޯބިން ނަޔާ ރާގުގާކި ނާނާ,” މިއީ މަޔަކު އޭނާގެ ބަނޑުން ވިހެއި ދަރިޔަކު ނިންދަވަން އޮވެ ކިޔައިދިން ނާނާއެވެ. މި ނާނާގައި މައިމީގެ ހިތުގައި ދަރިޔަކަށް އޮތް ލޯތްބާއި، އޭނާގެ ދަރިޔަކީ ރައްޔިތުންގެ ގަދަރާއި، މަތިވެރި ޝަރަފް ގައުމަށް ހޯދައިދޭނެ ދަރިޔަކަށް ވުމަށް އުންމީދު ކުރާ ވާހަކަތައް ގެނެސްދީފައިވެއެވެ. ހަލާލު މަސައްކަތުން ތާހިރު ދިރިއުޅުމަކާއެކު އުފާވެރި ހަޔާތެއް އޭނާގެ ދަރިއަށް އެދޭ ކަމުގައި ބުނެއެވެ. “ނާނާ” ލަވައިގެ ހިތްގައިމު ޅެން ހަދާފައިވަނީ ވެސް ޖޭމު ދޮންކަމަނަ އެވެ.

https://www.youtube.com/watch?v=ziYT3qN2bu8

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: