މީގެ އެއްދުވަސް ކުރިން ފޭސްބްކް ތެރެއިން ރައްޓެއްސަކު ޖަހާފައިވާ އޮތް އަދާހަމައަށް ފެނުނެވެ. “އެންމެން ކުއްލިއަކަށް ހާދަ މުސްކުޅިވެއްޖޭ” ޖަހާފައި އޮތުމުން “އެޔޯ” އޭ ޖަހައި ޖަވާބެއް ދިންއިރު، މިވަނީ ކީއްކަމެއް ކުޑަކޮށްވެސް ރޭކައެއް ނުލައެވެ. ނަމަވެސް ރޭގެ ވަގުތެއްގައި ތަންކޮޅެއް ރަނގަޅަށް ފޭސްބްކް ހާވައިލުމުން ފެންނަން ފެށީ މުސްކުޅިންތަކެއްގެ ފޮތޯ ތަކެކެވެ. މީހުންގެ ފޭސްބްކް ޕްރޮފައިލްއަށްވެސް އެފަދަ ފޮޓޯތައް ލައިފައި ހުއްޓާ ފެނުނެވެ.

އިތުރަށް ފޭސްބްކް ހާވަމުން ދަނިކޮށް ފެނުނީ ކޮއްކޮއަކު އޭނާގެ ފޮޓޯއެއް ބޭނުންކޮށްގެން އޭނާ މުސްކުޅިވުމުން ހުންނާނެ ގޮތުގެ ފޮޓޯއެއް ލައިފައި ހުއްޓައެވެ. އެ ފޮޓޯ ފެނުމުން ވަގުތުން ހަނދާންވީ މަރުޙޫމް ބައްޕަގެ މަތިންނެވެ. ރަނގަޅަށް ބަލައިލިއިރު މިއީ ‘ފޭސްއެޕް’ ކިޔާ އެޕެއް ބޭނުންކޮށްގެން ހަދާފައިވާ ފޮޓޯއެކެވެ. ލަހެއް ފަހެއްނެތި އަހަރެންވެސް، އަހަރެންގެ ދެ ފޮޓޯއެއް އެ އެޕް ބޭނުންކޮށްގެން ހެދީމެވެ. ސަހަރޯއެވެ. އަނެއްކާވެސް ފެނުނީ އަހަރެންގެ ބައްޕަގެ ސޫރައެވެ. މިއީ ‘ފޭސްއެޕް’ ގެ ނަމުން ނަންދީފައިވާ މޯބައިލް އެޕްލިކޭޝަނެއްގެ މޮޅުކަމެވެ.

ކޮންމެއަކަސް އަހަރެންގެ މުސްކުޅި ދައުރުގެ ފޮޓޯ ފޭސްބްކަށް އަޕްލޯޑްކޮށްލީމެވެ. އަހަރެންގެ ބައްޕަ ދަންނަ ގިނަމީހުން ބުނަނީ އަހަރެންގެ އެ ފޮޓޯއިން ހީވަނީ ހަމަ އަހަރެންގެ ބައްޕަ ފެންނަހެން ކަމަށެވެ.

‘ފޭސްއެޕް’ މިއީ ރަޝިޔާގެ ވަޔަރލަސް ލެބް ކިޔާ ކުންފުންޏަކުން އުފައްދާފައިވާ އެޕްލިކޭޝަނެކެވެ. މި އެޕްން މީހާ މުސްކުޅިކޮށްލުމުގެ އިތުރުން، ޒުވާންވެސް ކޮށްލެވެއެވެ. ހިނިތުންވުން ނުހުންނަ މޫނުތަކަށް ހިނިތުންވުންވެސް ގެނެސްދެއެވެ. މީގެ އިތުރުން މީހާގެ މިންތި ނުވަތަ ޖެންޑަރ ވެސް ބަދަލުކޮށްލައެވެ. އެމެރިކާގެ ރައީސް ޑޮނަލްޑް ޓްރަމްޕްގެ ރުޅިވެރި މޫނަށް ހިތްގައިމު ހިނިތުންވުމެއް ގެނެސްފައިވާ ފޮޓޯތައް ވެސް މި އެޕް ބޭނުންކޮށްގެން ލައްކަ ގިނަ މީހުން ހަދާފައި އެބަހުއްޓެވެ.

‘ފޭސްއެޕް’ އާއިމެދު ތަފާތު ފާޑުކިޔުންތައްވެސް ބޭރުގެ އެކި މަޖައްލާތަކާއި ނޫސްތަކުން ފެންނަ ލެއް މަދެއް ނޫނެވެ. އެޕް އުފައްދާފައިވާ މީހުން އެ އެޕް ބޭނުންކުރާ ފަރާތްތަކުގެ ޒާތީ މަޢުލޫމާތުތައް ނުހައްޤު ގޮތެއްގައި ބޭނުންކުރަމުން އަންނަކަމުގެ ތުހުމަތުތައްވެސް އަންނަނީ ކުރަމުންނެވެ. އެމެރިކާގެ މަޝްހޫރު ސިޔާސީ ބޭފުޅަކުވަނީ މި އެޕްގެ މައްސަލަ ބަލައިދިނުމަށްއެދި އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި)އަށް ވެސް ހުށައަޅާފައެވެ.

ސުވާލަކީ މި އެޕްލިކޭޝަނުން އުފައްދާ ފޮޓޯގެ ނަތީޖާ ކިހައިވަރަކަށް ދިމާވޭތޯ ނުވަތަ ނޫންތޯއެވެ. ބީބީސީންވަނީ މިކަން ބެލުމަށްޓަކައި މަޝްހުރު ސެލެބްރިޓީންތަކެއްގެ އެހާރާއި މިހާރުގެ ފޮޓޯތައް ބޭނުންކޮށްގެން މި އެޕްލިކޭޝަނުން ނެރޭ ނަތީޖާގެ ޞައްޙަކަން ހުންނަ މިންވަރު ވަޒަންކޮށްފައެވެ.

މަޝްހޫރު ލޯޑް އޮފް ދަ ރިންގްސް އިން ފެނިގެންދާ ގަންޑަލްފް ނުވަތަ ސަރ އިއާން މެކެލިންގެ ފޮޓޯ ބޭނުންކޮށްގެން ކުރި ޓެސްޓްގެ ނަތީޖާ އަށް 10 ން 10 ލިބުނެވެ. އެ ޓެސްޓްގައި ބޭނުންކުރީ އިއާންގެ އުމުރުން 20 އަހަރުގައި ނަގާފައިވާ ފޮޓޯއަކާއި އުމުރުން 75 އަހަރުގައި ނަގާފައިވާ ފޮޓޯއެކެވެ. މެދުގައި އެވަނީ އެޕް ބޭނުންކުރުމުން އައި ނަތީޖާއެވެ.

ސަރ ޑޭވިޑް އެޓެންބްރޯގެ އުމުރުން 39 އަހަރުގެ ފޮޓޯއަކާއި 93 ވަނަ އަހަރުގެ ފޯޓޯއެއް ބޭނުންކޮށްގެން ހެދި ޓެސްޓްގެ ނަތީޖާ ތިރީގައި އެވަނީއެވެ. މިފަހަރުވެސް މެދުގައި އެ އިން ފޮޓޯއަކީ އެޕް ބޭނުންކޮށްގެން ލިބުނު ނަތީޖާއެވެ. މިފަހަރު މި ފޮޓޯއަށް ލިބުނު ރޭޓިންއަކީ 10 ން 07 އެކެވެ.

ނަމަވެސް މިފަހަރު ބޭނުންކޮށްފައިވާ ސެލެބްރިޓީގެ ފޮޓޯގެ ނަތީޖާ އަށް ލިބުނީ އެންމެ 02 ޕޮއިންޓެވެ. މިފަހަރު ބޭނުންކުރީ ކުރީގެ މަޝްހޫރު އެކްޓްރެސް ޑޮލީ ޕާރޓޮންގެ ފޮޓޯއެވެ. ޑޮލީގެ އުމުރުން 30 ވަރަކަށް އަހަރުގެ ފޮޓޯއަކާއި އުމުރުން 73 އަހަރުގެ ފޮޓޯއެއް ބޭނުންކުރެވުނެވެ. މެދުގައި އެވަނީ އެޕް އިން ލިބުނު ނަތީޖާއެވެ.

ހޮލީވުޑްގެ މަޝްހޫރު އެކްޓަރ އާނޯލްޑްގެ ފޮޓޯއަށް ލިބުނީ 10 ން 08 އެކެވެ. 1976 ގައި އާނޯލްޑް ނަގާފައިވާ ފޮޓޯއަކާއި 2019 ވަނަ އަހަރު އޭނާގެ އުމުރުން 74 އަހަރުގައި ނަގާފައިވާ ފޮޓޯއެއް ބޭނުންކުރެވުނެވެ. މެދުގައި އެވަނީ އެޕްން ދެއްކި ނަތީޖާއެވެ.

ޖޭމްސް ބޮންޑްގެ ފިލްމުތަކުން މަޝްހޫރުކަން ލިބިފައިވާ އެކްޓްރެސް ޑޭމީ ޖޫޑީ ޑެންޗް ގެ އުމުރުން 33 އަހަރުގެ ފޮޓޯއަކާއ ި84 އަހަރުގައި ނަގާފައިވާ ފޮޓޯއެއް ބޭނުންކޮށްގެން ހެދި ޓެސްޓްގެ ނަތީޖާއިން ލިބުނީ 06 ޕޮއިންޓެވެ.

ދެން މިއޮތީ އަހަރެންގެ އަމިއްލަ ފޮޓޯއެވެ. އެންމެންވެސް ބުނަނީ އަހަރެންގެ ފޮޓޯއާއި އަހަރެންގެ ބައްޕަ ދުނިޔޭގައި ހުރިއިރު އެ ހުރި ގޮތާއި ވަރަށް ވައްތަރުކަމަށެވެ.

ފޭސްއެޕަށް ތަންކޮޅެއް ތަފްޞީލުކޮށް ބަލައިލަމާ!

ފޭސްއެޕް މިއީ އައު އީޖާދެއް ނޫނެވެ. މީގެ ދެ އަހަރު ކުރިންވެސް ނޫސްތަކުގެ ސުރުޚީތަކަށް މި އެޕްގެ ވާހަކަވަނީ އަރާފައެވެ.

މި އެޕް މަސައްކަތް ކުރަނީ އާޓިފިޝަލް އިންޓެލިޖެންސް (އޭއައި)ގެ އެހީގައެވެ. އެޕަށް ލާ ފޮޓޯގެ އެލޮގްރިދަމް ނެގުމަށްފަހު ޚިޔާލީ މަންޒަރެއް އަލުން ކުރަހާލަދެއެވެ. އެގޮތުން ތިމާ މުސްކުޅިވީމާ ހުންނާނެ ގޮތް، ނުވަތަ ޒުވާން އުމުރު ހުންނާނެ ގޮތް ނުވަތަ ހިނިތުންވުމެއްގައި ހުންނާނެ ގޮތުގެ ތަޞައްވުރެއް އެކުލަވައިލާ އަލުން އައު ފޮޓޯއެއް ޖެނެރޭޓްކޮށްދެއެވެ.

މަޢުލޫމާތު: ބީބީސީ އޮންލައިން

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: