ދެ ފުރޮޅުލީ އެއްގަމު އުޅަނދުގައި ދަތުރުފަތު ކުރާއިރު ބައެއް ސަރަޙައްދު ތަކުގައި ނަމަވެސް ހެލްމެޓް އަޅަން މަޖުބޫރު ކަމެއްގެ ގޮތުގައި ނިންމެވުމަކީ ސަރުކާރުން އެޅުއްވި ވަރަށް ހަރުދަނާ ފިޔަވަޅެކެވެ.
ހެލްމެޓް އަޅަނީ ޙާދިސާއެއް ދިމާވާހިނދު ބޮލަށް ލިބިދާނެ އަނިޔާ އަކަށް ރައްކާތެރިވުމުގެ ގޮތުންނެވެ. ހެލްމެޓް އެޅުމެކޭ އެއްގޮތަަށް ދަތުރަށް ފެށުމުގެ ކުރީން ރައްކާތެރިވުމަށްޓަކައި ކުރަންޖެހޭ އެންމެ މުހިންމު ކަންތައް މާތްވެގެންވާ އިސްލާމްދީނުގައިވަނީ އަންގަވާފައެވެ. ވަރަށް ކުޑަކުޑަ ކަމެކެވެ. އެހާމެ ފަސޭހަކަމެއްވެސް މެއެވެ. އެއީތޯއެވެ. ދަތުރެއް ފެށުމުގެ ކުރިން، ދަތުރުކުރާ ސަވާރީއަށް އަރައި ހަމަޖެހިލުމަށްފަހު ކިޔަންޖެހޭ މުހިންމު ދުޢާއެކެވެ. އާދެ، ކީރިތި ޤުރުއާނުގެ މޫރިތި ދެ އާޔަތެވެ. އެއީ ދަތުރު ދުޢާ އެވެ.
ދަތުރު ދުޢާ ކިޔުމަކީ ރައްކާތެރި ނިޔާމަ ދަތުރެއް ކުރުމުގެ ހެޔޮ ތަޢުފީޤް ދެއްވުންއެދި މާތްﷲގެ ޙަޟްރަތުގައި ދަންނަވާ ދެންނެވުމެކެވެ. ރާއްޖޭގެ މަތިންދާބޯޓްތައް ދަތުރަށް ފުރާ ހިނދު ދަތުރު ދުއާ ކިޔުމަށް ހަނދާންކޮށްދިނުމަށް އެ މަތިވެރި ދުޢާގެ އޯޑިއޯ ކްލިޕެއް ޖަހަމުން އަންނަކަމީ ޒަމާނުއްސުރެން ފާހަގަވާ ކަމެކެވެ.
މި ހިސާބުން ދަތުރު ދުޢާގެ މާނަ އާއިމެދު ފުންކޮށް ވިސްނައިލަމާތޯއެވެ.
لله أكبر (ތިންފަހަރު) ކިޔުމަށްފަހު، “سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ” މިހެން ކިޔައިލުމުން ދަތުރު ދުޢާ ކިޔުނީއެވެ. ކުރުކުރު، ފަސޭހަ ދުޢާއެކެވެ. އާދެ މިއީ الزخرف ސޫރަތުގެ 13 އަދި 14ވަނަ އާޔަތެވެ.
މި ދެ އާޔަތުގެ މާނައި: “އަޅަމެންނަށް މި ތަކެތި (ސަވާރީކުރާ ތެކެތި) ޚިދުމަތްތެރިކޮށްދެއްވި ރަސްކަލާނގެ ހުސްޠާހިރުވަންތަކަމާއެވެ! އަދި އަޅަމެން އެކަމަށް ކުޅަދާނަވެގެންވާ ބަޔަކުކަމުގައި ނުވަމުއެވެ. އަދި ހަމަކަށަވަރުން، އަޅަމެންގެ ވެރިރަސްކަލާނގެ ޙަޟުރަތަށް އަޅަމެން ރުޖޫޢަވާނެކަން ކަށަވަރެވެ.”
ދަތުރު ދުޢާ ކިޔުމުގެ ފައިދާތަކުގެ ތެރޭގައި، މާތް ﷲ ތިމާގެ ދަތުރުގައި ބަރަކާތް ލެއްވުމާއި، ސަލާމަތާއި ރައްކާތެރިކަން ދެއްވުން ހިމެނެއެވެ. އަދި ހުރިހާ ވަގުތަކާއި ހުރިހާ ޙާލަތެއްގައި މާތް ﷲ ހަނދުމަކޮށް އެ އިލާހަށް ބަރޯސާވާ އަޅުތަކުންގެ ތެރެއިންވުމުގެ ފުރުޞަޠުލިބި، މާތް ﷲ ގެ ލޯބިލިބިގެންވާ އަޅުތަކުންގެ ތެރެއިން ލައްވަތެވެ.
ރަސޫލުﷲ ޞައްލަﷲ ޢަލައިހި ވަސައްލަމަ ހަދީޘް ކުރެއްވިއެވެ. ތިންމީހެއްގެ ދުޢާ މާތްﷲ ރައްދު ނުކުރައްވައެވެ. ބައްޕަ އަކު ދަރިފުޅަށް ޓަކައި ކޮށްދޭ ދުޢާ، އަދި ރޯދަވެރިޔާގެ ދުޢާ، އަދި ދަތުރުވެރިޔާގެ ދުޢާ”. އެވެ. އެހެންކަމުން ދަތުރު ދުޢާގެ މުހިންމުކަން ކިހައި މަތިވެރިތޯއެވެ.
ދަތުރަށް ފެށުމުގެ ކުރިން، ހެލްމެޓް އެޅުމުގެ އާދަ ގެންގުޅޭ ބީދައިން، މިކަމަށް އާދަވެފައި ނެތް ފަރާތްތަކުން ދަތުރު ދުޢާ ކިޔުން އާދަކުރަމާތޯއެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
