| MUNIAVAS

‘ދަ ޓައިގަރ ލިލީސް‘ ދަންނަން ހެއްޔެވެ؟ ހަމަގައިމުވެސް ނ. ވެލިދޫ ޢީދު ކުޅިވަރު 1440 ބަލަމުންދާ ފަރާތްތަކަށް ‘ދަ ޓައިގަރ ލިލީސް’ މިއީ އައު ނަމަކަށް ނުވާނެއެވެ. ދައްކަން މިއުޅެނީ ‘ދަ ޓައިގަރ ލިލީސް’ އިން ތައްޔާރުކޮށް އާއްމުކޮށްފައިވާ ވަރަށް ފޯރިގަދަ، ވަރަށް ފައްކާ ޢީދު ލަވައެއްގެ ވާހަކައެވެ. “އީދޭ މީ” ގެ ނަމުގައި ‘ދަ ޓައިގަރ ލިލީސް’ ޔޫޓިއުބް ޗެނަލަށް މިމަހު 10 ގައި އަޕްލޯޑްކޮށް، އާއްމުކޮށްފައިވާ މި ލަވައަށް އަންނަނީ ވަރަށް ބޮޑު ތަރުހީބެއް ލިބެމުންނެވެ.

‘ދަ ޓައިގަރ ލިލީސް’ އަކީ ޕީޓަރޕޭން ކާޓޫނުން އެ ފެންނަފަދަ ހިތްގައިމު، ޒުވާން ހަ އަންހެންކުދިން ހިމެނޭ ‘ކޮމްޕެނީ ބޭސްޑް ޕްރޮފެޝަނަލް ޑާންސް ގްރޫޕް’ އެކެވެ. 2018 ގައި ހިންގަން ފަށާފައިވާ ނެށުމުގައި ހަރަކާތްތެރިވާ މި ގްރޫޕާއި ‘ހަނާމީ އިވެންޓްސް އެންޑް ޕާރފޯމިން އާރޓްސް’ އާއި އެކުގައި ހުށައަޅައިދީފައިވާ “ޢީދޭ މީ” ލަވަ އަކީ މަޝްހޫރު ލަވަކިޔުންތެރިޔާ މީރާ މުޙައްމަދު މާޖިދުގެ ހިތްގައިމު އަޑުން ކިޔައިދީފައިވާ ލަވައެކެވެ.

‘ދަ ޓައިގަރ ލިލީސް’ގެ ފުރަތަމަ މިއުޒިކް ވީޑިއޯ ލަވަ ރިލީޒްވުމާއެކު އެމީހުން ވަނީ މި ލަވަ ބެލުންތެރިންނާއި ހަމައަށް ގެނެސްދިނުމުގައި އެހީތެރިވި ހުރިހައި ފަރާތްތަކަށް ޝުކުރު އަދާކޮށްފައެވެ. އެގޮތުން މީރާ މުޙައްމަދު މާޖިދު، މި ލަވައިގެ ކޮންސެޕްޓާއި ލަވައިގެ ވީޑިއޯ ހެދުމުގައި ބައިސްކޯފު ޓީމުން ކޮށްދީފައިވާ މަސައްކަތަށާއި ފިހާޅޮހި އައިލެންޑް ރިޒޯޓްގެ މުވައްޒަފުންނާއި މި ލަވަ އުފެއްދުމުގައި އެހީތެރިވި ހުރިހައި ފަރާތްތަކަށް ޝުކުރުއަދާކޮށްފައެވެ.

“ޢީދޭ މީ”ގެ ހިތްގައިމު ކޮރިއޮގްރަފީ ހެދީ ސޮއްޕެ އެވެ. ކޮސްޓިއުމް ފޯރުކޮށްދިނީ ހަސަން އާދަމް އާއި އަޙްމަދު އިޤްބާލް އެވެ. ‘ދަ ޓައިގަރ ލިލީސް’ގެ ނިސްވާނީ ހަ ކުދިންގެ މޭކަޕްކޮށްދިނީ މަޝްހޫރު މޭކަޕް އާޓިސްޓު ޙަސަން އާދަމް އެވެ. ކެމެރާ އަދި ލައިޓިން ހެދީ ރަފްހާން އާއި އައިމަން އެވެ. ޑްރޯން މަންޒަރުތައް ނެގީ ސެން އެވެ.

‘ދަ ޓައިގަރ ލިލީސް’ގެ “ޢީދޭ މީ” ޕްރޮޑިއުސްކުރީ އާމިނަތު ފަރީނާ އެވެ. ޑައިރެކްޓްކުރީ މަޝްހޫރު ވާހަކަލިޔުންތެރިޔާ އަޙްމަދު އިޤްބާލް (އައި ކިޔޫ) އެވެ. ލަވައިގެ މަންޒަރުތައް ނަގާފައިވަނީ ފިހާޅޮހި އައިލެންޑް ރިޒޯޓްގައެވެ. މި ލަވައިން ‘އޮޔާ ވޯޓަރ ސްޕޯޓްސް’ އާއި ފިހާޅޮހި ބޮޑުބެރު ގްރޫޕްވެސް ފެނިގެންދެއެވެ.