ނިދާކޮޓަރި ތެރޭން އިވޭ އެންމެ ބިރުވެރި އަޑު، ގުގުރިދެމުމަކީ އެވްރެޖްކޮށް، ދެވަންފުރައިގެ ކޮންމެ ދެ ފިރިހެނުންކުރެ އެކަކަށާއި ހަތަރު އަންހެނުންކުރެ އެކަކަށް ނިދީގައި ކުރެވޭ ކަމެކެވެ. މިއީ އާންމު ގޮތެއްގައި ތިމާއަށް އިވޭ އަޑެއް ނޫނެވެ. މިކަމުން އުނދަގޫވާނީ ގުގުރިދަމާމީހެއްގެ ގާތުގައި ނުނިދާ އޮންނަ މީހާ އަށެވެ. މިއީ ހަމައެކަނި އުނދަގޫވާ އަޑެއްކަމުގައި ކުރިން ބެލެވުނު ނަމަވެސް، ފަހުގެ ހޯދުންތަކުން ދައްކާ ގޮތުގައި މިއީ ސީރިއަސް ސިއްހީ މައްސަލައެއް ކުރިމަތިވުމުން ދިމާވާ ކަމަކަށްވެސް ވެފައި އެބަހުއްޓެވެ. ބައިވެރިޔާއާ މައްސަލަ ޖެހޭ ކަމަކަށްވެސް މިކަން ވެއެވެ.
ގުގުރިދެމެން ދިމާވާ ސަބަބުތަކަށް ފުރަތަމަ ބަލައިލަމާ ހިނގާށެވެ. ގުގުރިދަމަން ފެށެނީ މަޑުނިދިން ގަދަނިންޖަށް ބަދަލުވާ ވަގުތު މަތީތަލީގެ މަޑުބަޔާއި ދުލާއި އަރުތެރޭގެ މަސްތައް ވާގިނެތި ނޭވާގެ ވައި ދައުރުކުރާން ފެށުމުންނެވެ. މިހެންވުމުން ގަދަ އަޑުފަށްގަނޑެއް އުފެދެއެވެ. މިއަޑުގެ ބާރުމިން ބައެއްފަހަރު 70 ޑީބީ އަށް އަރައެވެ. މިއީ ދުއްވާފައިދާ ލޮރީއަކުން އިވޭފަދަ ބާރު އަޑެކެވެ.
ކޮންމެ ދެމީހަކުން އެކަކު، އުމުރުގެ ކޮންމެވެސް ހިސާބެއްގައި ގުގުރިދަމައެވެ. ބައެއް މީހުންނަށް އަމިއްލައަށް ހޭލެވޭހާ އަޑުގަދަކޮށް ގުގުރި ދެމެއެވެ. ނަމަވެސް ގިނަ މީހުންނަކަށް އެމީހުންނަށް ގުގުރިދެމޭކަމެއް ނޭނގެއެވެ.
ގުގުރިދެމެން ދިމާވާ އެތައް ސަބަބެއް ވެއެވެ. އޭގެތެރޭގައި އަނގަ އުފެދިފައިވާ ގޮތް، ބަނގުރާ ބުއިން، ދުންފަތުގެ އިސްތިއުމާލު، އެލާޖިކްވުން، ރޯގާޖެހުމާއި ބަރުދަން އިތުރުވުން ހިމެނެއެވެ.
ގުގުރިދެމުމަށް މަގުފަހިވާ ކަންކަމަކީ ޓޮންސިލް ދުޅަވެފައިވުމާއި ނޭފަތުގެ ދެ ހިނދުރި ވަކިކުރާ ފަށަލަ ބަޅުވެފައި ވުމާއި ކުޑަދޫ ދިގުވުމެވެ. އުމުރުން 50 އަހަރަށްވުރެ މައްޗަށް ދިޔުމުން އާންމުގޮތެއްގައި ފިރިހެނުން ގުގުރިދަމައެވެ. މިއުމުރު ފުރައިގެ 60 އާއި 80 އިންސައްތަ މީހުންނަކީ ގުގުރިދަމާ މީހުންނެވެ.
ގުގުރިދެމުން މަދުކުރެވިދާނެ ކަންކަމަކީ:
– ބަރުދަން ލުއިކުރުން
– އެއް އަރިއަކަށް އޮވެގެން ނިދުން
– އެނދުގެ ބޯލާކޮޅު އުސްކުރުން
– ނޭފަތް ބޭދޭގޮތް މެދުވެރިވެފައި ވާނަމަ އެކަމަށް ފަރުވާ ކުރުން
– ދުންފަތުގެ އިސްތިއުމާލު ހުއްޓާލުން
– ރަނގަޅަށް ނިދި ހަމަކުރުން
އާންމުކޮށް ގުގުރިދެމޭނަމަ ސީރިއަސް ސިއްހީ މައްސަލައެއް ދިމާވެދާނެއެވެ. މީގެތެރޭގައި ހުއްޓި ހުއްޓިފައި ނޭވާލެވުން ހިމެނެއެވެ. މިކަމަށް އަވަހަށް ފަރުވާ ނުކުރެވިއްޖެނަމަ ހިތުގެ މައްސަލަ ދިމާވެއެވެ.
ގުގުރިދެމުން ލުއިކުރަން ކުރެވިދާނެ ކަސްރަތު:
– ތިން މިނެޓު ވަންދެން އާ އޭ އީ އޯ އޫ މިހެން ބާރަށް ކިޔާށެވެ. ދުވާލުގެ އެކި ގަޑިގަޑީގައި މިކަން ތަކުރާރު ކުރާށެވެ.
– މަތީ ދަތްޕިލައިގެ މަތީ ކައިރީގައި ދޫޖައްސާފައި ތަލީގައި ދޫޖައްސައިގެން ދޫ އެތެރެއަށް ގެންދާށެވެ. ތިންމިނެޓު ވަންދެން މިކަން ތަކުރާރު ކުރާށެވެ.
– އަނގަ ލައްޕާލާފައި ކޯފުއްޕާލާފައި ތިންމިނެޓް ވަންދެން ހިފާއްޓާލާށެވެ.
– އަނގަ ހުޅުވާފައި ތިރީ ދަތްޕިލާ ކަނާތް ފަރާތަށް ޖައްސާލާފައި 30 ސިކުންތު ވަންދެން ހުންނާށެވެ. ހަމަ މިގޮތަށް ވާތްފަރާތަށް ޖައްސާއިގެންވެސް ހުންނާށެވެ.
– ތަންމިނަށް އަނގަ ހުޅުވާފައި ކުޑަދޫ ހަރަކާތް ކުރާނޭހެން ބާރު ލާށެވެ. ކުޑަދޫ ހަރަކާތް ކުރޭތޯ ލޯގަނޑަކުން ބަލާށެވެ.
– ލަވަކިޔާ އުޅުމަކީވެސް އަރުތެރޭގެ މަސްތަކަށާއި ތަލީގެ މަޑުބަޔަށް ކަސްރަތު ލިބޭނޭ ކަމެކެވެ. ލަވަ ކިޔުމުގައި ކޮންމެ ދުވަހަކުވެސް ވަގުތުކޮޅެއް ހޭދަ ކޮށްލާށެވެ.
ލިޔުންތެރިޔާގެ ފުރަމަލަ
- އާއްމުކޮށް ނަޒީރުގެ ލިޔުންތައް ނުފެނުނަސް، ނަޒީރަކީ ތަޖުރިބާކާރު ބޭފުޅެކެވެ.
މި ލިޔުންތެރިޔާގެ ބައެއް އެހެން ލިޔުންތައް
- 29 އޮކްޓޯބަރ 2024މަޢުލޫމާތުތުނބުން ފުމުނީ ކާކު؟
- 23 ސެޕްޓެމްބަރ 2023އިޖްތިމާޢީމުށިބިހާއި ހުދުބިހުގެ ސިއްހީ ފައިދާ ތަފާތުތަ؟
- 10 ފެބްރުއަރީ 2023މަޢުލޫމާތުލުނބޯފެން – ކިހާ މުހިންމު އެއްޗެއްކަން އެނގޭތަ؟
- 9 ފެބްރުއަރީ 2023ރިޕޯޓްދޮންކޭލާއި ކިރު އެއްކުރުން ރަނގަޅުތަ؟
