ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިލަދުންމަޑުލު ދެކުނުބުރީ މަނަދޫގައި ބޭއްވެވި ‘މިލަދެކުނު އަދަބީ ޢީދު 2019’  ނިންމުމުގެ ޖަލްސާ ޝަރަފުވެރިކޮށްދެއްވައިފިއެވެ.

މިލަދެކުނު އަދަބީ ޢީދު 2019 ގެ ނިމުމުގެ ރަސްމިއްޔާތު ޝަރަފުވެރިކޮށްދެއްވުމަށްޓަކައި ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިޙް މިލަދުން މަޑުލުދެކުނުބުރީ މަނަދޫއަށް ވަޑައިގަތުމުން ސަގާފީ ހަރަކާތްތަކާއިއެކު ވަރަށް ހޫނު މަރުޙަބާއެއް އެމަނިކުފާނަށް ދަންނަވައިފިއެވެ.

މަނަދުއަށްވަޑައިގަތުމުން އެންމެފުރަތަމަ އެމަނިކުފާނަށް މަރުޙަބާ ދެންނެވީ ކަނބަލުންގެ ކުރުފަލިޖެހުމުގެ ފަރިހަރަކާތަކުންނެވެ. މި ޢީދުގައި ބައިވެރިވިފަރާތްތަކުންނާއި މަނަދޫގެ ރަށްޔިތުންގެ ފަރާތުން އެމަނިކުފާނަށް ހޫނުމަރުޙަބާއެތް ދަންނަވާފައިވާއިރު ކަނބަލުންގެ ދިގުމަގު ހިނގުމާއި، ދަފިނެގުމުގެ ސަގާފީ ހަރަކާތްތައްވެސް ކުރިއަށްގެންގޮސްފައި ވެއެވެ.

މި އަދަބީ ޢީދުގެ ނިންމުން ފާހަގަކުރުމަށްޓަކައި މަނަދޫބަދަރު ސަރަހައްދުގައި ރޭ ބޭއްވިޖަލްސާ ރައީސް އިބްރާހިމް މުޙައްމަދު ޞާލިޙު ވަނީ ޝަރަފުވެރިކޮށްދެއްވާފައެވެ.

ރޭ މަނަދޫ ބަނދަރު ސަރަޙައްދުގައި ބޭއްވެވި މި ޖަލްސާގައި، ރައީސުލްޖުމްހޫރިއްޔާ ވަނީ މި ޢީދުގެ އަދަބީ އެކި މުބާރާތްތަކުން 1ވަނަ ޙާސިލްކުރި ދަރިވަރުންނާއި ސްކޫލްތަކަށް ހަނދާނީ ލިޔުމާއި އިނާމު ޙަވާލުކޮށްދެއްވާފައެވެ. މީގެ އިތުރުން މި އަދަބީ ޢީދުގައި ތަރި ލިބުނު ސްކޫލުތަކަށް އިނާމު ދެއްވީ ވެސް ރައީސުލްޖުމްހޫރިއްޔާއެވެ.

މިފަހަރުގެ އަދަބީ ޢީދުގައި ކުރިއަށްދިޔަ އެކިއެކި އަދަބީ މުބާރާތްތަކުގައި ނ. އަތޮޅުގެ 10 ރަށެއްގެ 10 ސްކޫލަކުން ޖުމްލަ 200 އަށްވުރެ ގިނަ ދަރިވަރުންނާއި އާންމުންގެ ތެރެއިން 19 މީހުން ބައިވެރިވެފައިވެއެވެ.

މި އަދަބީ ޢީދުގައި ކުރިޔަށްގެންދިޔަ ބައެއް ޙަރަކާތްތަކުގެ ތެރޭގައި ތުއްތުކުދިންގެ ސަގާފީ ހަވީރަކާއި، ޚާއްޞަ ފޮތް މައުރަޒަކާއި، ޅެންވެރިކަމުގެ ހުނަރު ދަސްކޮށްދިނުމާއި، ސަރުކާރުގެ މުއައްސަސާތަކަށް ދިވެހިބަސް ހެޔޮގޮތުގައި ބޭނުންކުރާނެ ގޮތް ދަސްކޮށްދިނުމާއި، ދަރިވަރުންނާއި މުދައްރިސުންނަށް ވާހަކަދެއްކުމުގެ ހުނަރުދަސްކޮށްދިނުން ހިމެނެއެވެ.

ރައީސުލްޖުމްހޫރިއްޔާގެ އަރިހުގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނާއި، ދިވެހިބަހާއި ތާރީޚަށް ލޯބިކުރައްވާ ގިނަ އަދަދެއްގެ ބޭފުޅުން މި ޖަލްސާގައި ބައިވެރިވެވަޑައިގެންނެވިއެވެ.

އަދަބީ ޢީދަކީ ދިވެހިބަހާއި އަދަބިއްޔާތާއި ތާރީޚަށް ދަރިވަރުންނާއި އާންމުން ހޭލުންތެރިކުރުވައި، އެ ކަންކަމަށް އޮންނަ ޝައުޤުވެރިކަމާއި ލޯބި އިތުރުކުރުމުގެ މަޤްޞަދުގައި ކޮންމެ އަހަރަކު ދިވެހި ބަހުގެ އެކެޑަމީން ބާއްވަމުން އަންނަ އަދަބީ ޙަރަކާތެކެވެ. މި ޢީދަކީ މި ސެޕްޓެމްބަރ މަހުގެ 11 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށް ނ. މަނަދޫގައި ކުރިޔަށްގެންދިޔަ އަދަބީ ޢީދެކެވެ. މިއީ ދިވެހިބަހުގެ އެކެޑަމީއިން ޤައުމީ ފެންވަރުގައި ބާއްވާ 5ވަނަ އަދަބީ ޢީދެވެ. މީގެ ކުރިން މި އަދަބީ ޢީދު ބާއްވާފައިވަނީ ގއ، ގދ، ޅ އަދި މ އަތޮޅުގައެވެ.

ލިޔުންތެރިޔާގެ ފުރަމަލަ

ފާތިމަތު ފަޔާޒާ

ގުޅުންހުރި ލިޔުން: