ޓީބީ ޖެހިފައި ހުރިކަން ފަސޭހައިން ދެނެގަނެވޭނެ ހަތަރު މެޝިން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހެލްތު މިނިސްޓްރީ އަށް މިއަދު ހަދިޔާކޮށްފި އެވެ.

ރާއްޖޭގެ ހޮސްޕިޓަލް ތަކުގައި ޓިބީ ބަލި ދެނެގަތުމަށް ޓެސްޓް ކުރުމުގެ ނިޒާމު އިތުރަށް ހަރުދަނާ ކުރުމުގެ ގޮތުން ޑަބްލިއު އެޗް އޯ އިން މިނިސްޓްރީ އޮފް ހެލްތަށް ހަދިޔާ ކުރައްވާ ‘ޖީން އެކްސްޕާރޓް މެޝިން’ތައް ހަވާލުކުރެއްވީ އެކަމަށްޓަކައި މިއަދު ބޭއްވުނު ރަސްމިއްޔާތެއްގައެވެ.

މިކަމާއި ގުޅިގެން ނޫސްވެރިންނަށް މަޢުލޫމާތުދެއްވަމުން ހެލްތު މިނިސްޓްރީން ވިދާޅުވީ ޖީން އެކްސްޕަރޓް މެޝިން ބޭނުންކޮށްގެން ޓީ.ބީއަށް ހެދޭ ޓެސްޓުން، އެންމެ ދެ ގަޑިއިރުގެ ތެރޭގައި މީހެއްގެ ކުޅުގައި ޓީ.ބީގެ ޖަރާސީމު ހުރިތޯއާއި، ޓީ.ބީއަށް ބޭނުންކުރެވޭ ބައެއް ބޭހަށް ރެސިސްޓެންޓްކަން ނުވަތަ ނޫންކަން ދެނެގަނެވޭނެކަމަށެވެ. މިއީ މިހާރު ކުރެވޭ ޓެސްޓްތަކާއި، އަޅާ ބަލާއިރު ވަރަށްބޮޑު ކުރިއެރުމެކެވެ. އާއްމުކޮށް ޓީ.ބީ ބަލި ޖެހިފައިވޭތޯ ބަލަނީ ތިން ދުވަސް މަތިން ކުޅުނަގައި، އޭގައި ޖަރާސީމު ހުރިތޯ ބެލުމާއި، އެކްސްރޭ އިންނެވެ. އެހެންނަމަވެސް ‘ޖީން އެކްސްޕާރޓް މެޝިން’ ބޭނުންކޮށްގެން ހެދޭ ޓެސްޓް ތަކުން އަވަހަށް ޓެސްޓްގެ ނަތީޖާ ލިބި، ބަލިމީހާގެ ހަށިގަނޑުގައި ބޭހަށް ނުގުޑާ ޓީ.ބީ ގެ ޖަރާސީމް ހުރިކަން ނުވަތަ ނެތްކަން ވެސް އެނގިގެންދާނެކަމަށް މިނިސްޓްރީން ވަނީވިދާޅުވެފައެވެ. އަދި މިކަމުގެ ސަބަބުން، ބަލި މީހާއަށް ދޭން ޖެހޭ ފަރުވާ ވީހާވެސް އަވަހަށް ފެށި، ޓީ.ބީ ބަލިން ބަލިމީހާ އާއި މުޖްތަމައު ރައްކާތެރިކުރުމަށް ކުރެވޭ މަސައްކަތްތަކަށް އިތުރު ބާރެއް ލިބިގެންދާނެއެވެ.

ދިވެހިރާއްޖެއަކީ ޓީބީ ނައްތާލުމަށް ޤައުމީފެންވަރުގައި އަހައްމިޔަތުކަން ދީފައިވާ ޤައުމެއްގެ ގޮތުގައި ސަރަޙައްދީ ފެންވަރުގައި ފާހަގަވެފައިވާ ޤައުމެކެވެ. މިގޮތުން 2022ވަނަ އަހަރުގެ ނިޔަލަށް ރާއްޖެއިން ޓީބީ ނައްތާލުމަށް ޤައުމީ އިސްތިރާޖީއެއް އެކުލަވައިލާ ފެބްރުއަރީ 2018 ގައި މި ކަމުގެ މަސައްކަތްތައް އިފްތިތާޙް ކުރެވެފައިވެއެވެ.

ޓީބީ އަށް ޓެސްޓް ކުރެވޭ އެންމެ ފަހުގެ ވަސީލާތްތައް ބޭނުންކޮށްގެން ޓީބީ ބަލި ދެނެގަނެ ފަރުވާގެ ކަންތައް ކުރިޔަށް ގެންދިއުމުގެ ގޮތުން މިސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނިގެން ހދ. ކުޅުދުއްފުށީ ރީޖަނަލް ހޮސްޕިޓަލް އާއި ގދ. ޢަބްދުއްޞަމަދު މެމޯރިއަލް ހޮސްޕިޓަލުގައި ‘ޖީން އެކްސްޕާރޓް މެޝީން’ ބެހެއްޓި ޚިދުމަތް ދޭން ވަނީ ފެށިފައެވެ. މީގެ ކުރިން ‘ޖީން އެކްސްޕަރޓް މެޝިން’ގެ ޚިދުމަތް ދެމުން ގެންދިޔައީ ހަމައެކަނި އައި.ޖީ.އެމް.އެޗްގައެވެ.

މިނިސްޓްރީން ވިދާޅުވިގޮތުގައި ރާއްޖެއިން ޓީބީ ނައްތާލުމުގެ މަސައްކަތަށް ލަފާ ދިނުމަށް މިނިސްޓަރ އޮފް ހެލްތުން ވަނީ ‘ހައި ލެވެލް ނެޝަނަލް ސްޓިއަރިންގ ކޮމިޓީ’އެއް އެކުލަވާލައްވައިފައެވެ. މީގެ އިތުރުން ޓީބީ އާއި ބެހޭ މަޢުލޫމާތު ފަތުރާ، ގިނަ އަދަދެއްގެ ބަޔަކު ޓީބީ އަށް ސްކްރީންކޮށް، އަދި ފަރުވާ ދިނުން ހިމެނޭގޮތަށް ކުރިޔަށް ގެންދާ ޤައުމީ ކެމްޕޭނެއް ދުނިޔޭގެ ޓީބީ ދުވަހު ފެށިފައި ވާކަމަށްވެސް ވަނީ މަޢުލޫމާތު ދެއްވާފައެވެ.

ޓީ.ބީ އަކީ ބަލީގެ ކުރީކޮޅު ދެނެގަނެވި، ރަނގަޅަށް ފަރުވާ ފުރިހަމަ ކޮށްފިނަމަ މުޅިން ފަސޭހަ ކުރެވޭ ބައްޔެކެވެ. އަދި ބަލިން ރައްކާތެރިވުމަށް އެޅޭނެ ފިޔަވަޅުތައްވެސް އެބަހުއްޓެވެ. އެހެންކަމުން ރާއްޖެއިން ޓީ.ބީ ނައްތާލުމަށް ކުރެވޭ މަސައްކަތުގެ މައިގަނޑު އަމާޒަކީ ބަލި ޖެހިފައިވާ މީހުން ދެނެގަތުމާއި، އެކަށީގެންވާ ފަރުވާ ފޯރުކޮށްދިނުމާއި، ބަލީގެ ޖަރާސީމުގެ އަސަރުކޮށް އެހެންނަމަވެސް ބަލި ނުޖެހި ތިބި މީހުން (ލޭޓެންޓް ޓީ.ބީ) ދެނެގަނެ، އެމީހުންގެ ހަށިގަނޑުން ޖަރާސީމު ނައްތާލުމަށް ފަރުވާ ކުރުމާއި، ބަލިން ރައްކާތެރިކުރުމަށް އަޅަންޖެހޭ ފިޔަވަޅުތައް އަޅަން މަގުފަހިކޮށްދީ، ބައްޔާމެދު މުޖުތަމައު ހޭލުންތެރި ކުރުވުމެވެ.

ޓީބީ އަކީ، އެބަލިން ރައްކާތެރިކޮށް، ބަލިޖެހޭ މީހުން އަވަހަށް ދެނެގަނެ، ފުރިހަމަ ފަރުވާ ދެވިއްޖެ ނަމަ، އެކަމަށް ޚަރަދުކުރާ ކޮންމެ ޔޫއެސް ޑޮލަރަކަށް، ރިޓަރން އޮން އިންވެސްޓްމެންޓް ނުވަތަ ފައިދާގެ ގޮތުގައި 43 ޑޮލަރުޖެހޭ ކަމެއް ކަމަށް ދިރާސާތަކުން ދައްކައެވެ. އެހެންކަމުން ރާއްޖެއިން ޓީ.ބީ ނައްތާލުމަށް މިކުރެވޭ މަސައްކަތް ކާމިޔާބު ވެއްޖެނަމަ، މިއީ ހަމައެކަނި ސިއްހީ ގޮތުން ލިބޭ ކުރިއެރުމެއްގެ އިތުރަށް، ގިނަގުނަ އިޤްތިސާދީ ފައިދާވެސް ލިބިގެން ދާނެ ކަމެކެވެ.

އެހެންނަމަވެސް މިކަން ކާމިޔާބު ކުރުމުގައި އެކި ދާއިރާތަކާއި، އަމިއްލަ ޖަމުޢިއްޔާ ތަކާއި، ކުންފުނި ތަކާއި، ވަކިވަކި ފަރުދުންގެ އެއްބާރުލުމާއި އެހީތެރިކަމަށް މިނިސްޓްރީން ވަނީ އެދިވަޑައިގެންފައެވެ.

ލިޔުންތެރިޔާގެ ފުރަމަލަ

ފާތިމަތު ފަޔާޒާ

ގުޅުންހުރި ލިޔުން: