ސެޕްޓެމްބަރު 2ވަނަ ދުވަހު ރިލީސްކުރި ފިލްމު “ބަވަތި“ގެ ޝޯވްތައް އައްޑޫ ސިޓީގައި އެޅުވުމަށް ތައްޔާރުވެއްޖެއެވެ.

މާލޭގައި ހައުސްފުލް ޝޯވްތަކެއް ދެއްކުމަށްފަހު އައްޑޫ ސިޓީއަށް “ބަވަތި” މިސްރާބުޖަހާފައިވާއިރު، ފިލްމު އައްޑޫގައި އެޅުވުމަށްހަމަޖެހިފައިވަނީ ސެޕްޓެމްބަރު 26 އަދި 27 ގައެވެ.

އައްޑޫ ސިޓީއިން “ބަވަތި” ފިލްމު ބަލާލުމަށް ބޭނުންވާ ފަރާތްތަކުން ޓިކެޓް ހޯދުމަށް 9403737 ނަމްބަރަށް ގުޅުމަށް ފިލްމުގެ ޕްރޮޑަކްޝަން ޓީމުން ވަނީ އެދިފައެވެ.

އަލަށް ފީޗާ ފިލްމު ޑައިރެކްޝަނަށް ނުކުތް، އިލްޔާސް ވަހީދު ލިޔެ ޑައިރެކްޓްކޮށްފައިވާ ސަންޕެންސް ތުރިލާ ފިލްމު “ބަވަތި”އަކީ މިފަހަކަށް އައިސް ދިވެހި ސިނަމާގައި އެޅުވި އެންމެ ތަފާތު އެއް ފިލްމެވެ. “ބަވަތި”ގެ ލީޑް ކުޅެފައިވަނީ ހުނަރުވެރި އެކްޓިންއެއް ދައްކަމުން އަންނަ ނުޒުހަތު ޝުއައިބު އާއި އަލަށް ފީޗާ ފިލްމަކުން ތައާރަފްވި އެކްޓަރު އަޙްމަދު އިފްނާޒް އެވެ. މި ފިލްމަކީ އިފްނާޒްގެ ފުރަތަމަ ފިލްމު ނަމަވެސް ފިލްމުގައި އޭނާވަނީ ބެލުންތެރިން ހައިރާންކޮށްލާފަދަ އެކްޓިންއެއް ދައްކުވައިދީފައެވެ.

“ބަވަތި” ފިލްމު އައްޑޫ ސިޓީގައި އެޅުވުމަށް ތައްޔާރުވަމުންދާއިރު، މި ފިލްމު އެޅުވުމަށް ހަމަޖެހިފައިވަނީ އައްޑޫ ސިޓީގެ ބޮނޑޮގޭ ސިނަމާގައެވެ.

“ބަވަތި” ފިލްމުގެ ވަދާއީ ޝޯވްތައް މިހާރު ކުރިޔަށްދާއިރު، ދާދިފަހުން އައި ފިލްމްސް އިން ވަނީ ބެލުންތެރިންނަށް ފިލްމުގެ ތަފާތު އަސަރުގަދަ ޓްރެއިލާއެއް ދޫކޮށްލާފައެވެ.

ފިލްމު “ބަވަތި”ގެ ކެމެރާ މަސައްކަތް ކުރީ އެ މަސައްކަތަށް ނަމޫނާ ދައްކަމުން އަންނަ، ހުނަރުވެރި ސިނަމޮޓޮގްރާފަރ ވިޝާން (ކަނޑި) އެވެ. އަދި “ބަވަތި “ގެ ޕްރޮޑިއުސަރުންގެ ގޮތުގައި އިލްޔާސާ އެކު އާސިމް ޢަލީ އާއި އަޙްމަދު ވަހީދު ހަރަކާތްތެރިވާއިރު، ފިލްމުގެ ޓެކްނިކަލް މަސައްކަތްތަކުގައި ހަރަކާތްތެރިވެފައިވަނީ ހުނަރުވެރި ފަރާތްތަކެކެވެ. އެގޮތުން ފިލްމުގެ ޕޯސްޓް ޕްރޮޑަކްޝަން އާއި ވިޝުއަލް މަސައްކަތް ކޮށްފައިވަނީ މިހާރު ބައިސްކޯފްގައި ގެނެސްދެމުންދާ ރާއްޖޭގެ ފުރަތަމަ ސިޓްކޮމް ސީރީޒް ’ކަރުހަކުރު‘ އުފެއްދުމުގައި ހަރަކާތްތެރިވަމުންދާ ’އޯކޭޒް އިންކް“ އެވެ.

ފިލްމު ”ބަވަތި”ގެ ރަސްމީ އޮންލައިން މީޑިއާ ޕާޓްނަރަކީ ’މުނިއަވަސް’ އެވެ.

ލިޔުންތެރިޔާގެ ފުރަމަލަ

މަރިޔަމް ޢަދީލާ
މަރިޔަމް ޢަދީލާ އަކީ ލިޔުންތެރިކަމަށް ލޯބިކުރާ، ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: