ރާއްޖޭގެ އެންމެ ފުންނާބު އުސް ވާހަކަލިޔުންތެރީންގެ ލިސްޓުގެ އެންމެ ކުރީ ސަފުން ޖާގަ ހޯދާނެ ދެ ބޭފުޅުންނަކީ ފާތުމަތު ނަހުލާ (ނަހޫ) އާއި އިބްރާހިމް ވަހީދު (ބިންމާ) ކަމާމެދު އެއްވެސް ޝައްކެއް ނެތެވެ. ދާދިފަހުން، މި ދެ ލިޔުންތެރީން އެއް ސުފުރާމަތީން ކޮފީބޮއެ، އެކުގައި ނަގާފައިވާ ފޮޓޯއެއް އާއްމުކުރުން ވެގެން ދިޔައީ ގިނަ ބައެއްގެ ސަމާލުކަން ލިބުނު ކަމަކަށެވެ.
ނަހޫ އާއި ބިންމާ، ތިބީ އެކުގައި ‘ބައިސްކޯފު’ގެ ބޮޑު ޕްރޮޖެކްޓެއްގައި މަސައްކަތްކުރަން ތައްޔާރަށެވެ. މިކަން އެކި މީހުންނަށް ބަލައިގަނެވެނީ އެކި ގޮތަށެވެ. ދެމީހުން އެކުގައި މަސައްކަތްކުރަން ފެށުމަކީ ގިނަބަޔަކު ބަލައިގަންނަ ކަމެއްކަން މާރަނގަޅަށްވެސް އެނގެއެވެ. ނަމަވެސް ނަހޫ އާއި ބިންމާގެ ފޮޓޯ އާއްމުވުމުން އެކަން ނައްސި ގޮތަކަށް ބަލައިގެންފައިވާ މަދު ބަޔަކު ނަމަވެސް އަޅުގަނޑުމެންގެ މުޖުތަމަޢުގައި ތިބިކަން ފާހަގަކޮށްލެވެއެވެ.
ނަހޫ އާއި ބިންމާގެ ފޮޓޯއަކާއެކު، ނަހޫ ލިޔެފައިވާ ސްޓޭޓަސް އެއްގައި ލިޔެފައިވާ ލިޔުންކޮޅެއް އަޅުގަނޑަށް ފާހަގަކުރެވުނެވެ.
“އަމިއްލަ ކުރިއެރުމަށްޓަކައި އަނެކާގެ ކުރިއެރުމަށް ހުރަސްއަޅާނަމަ އަމިއްލަ ނަފުސާމެދު އިތުބާރެއް ނެތީ. ފެށުނީއްސުރެން އަހަންނާ ބިންމާއަކީ ވާދަވެރީން. އެހެނަސް، އެއްވެސް ހާލެއް އެއްވެސް ގޮތަކަށް އަހަރުމެން އެކަކު އަނެކަކު ދަށްކޮށްލުމަށް މަސައްކަތް ނުކުރަމު. އަދި ކިއެއްތަ، އަހަރުމެންނަކީ އެކަކު އަނެކަކަށް އިތުބާރުކުރާ ގާތް ދެ ރަހުމަތްތެރީން. އަހަރުމެންނަކީ އެކަކު އަނެކަކުގެ ކާމިޔާބީއަށް އިހްތިރާމުކޮށް އެކަން ފާހަގަކުރާ ދެމީހުން، އެކަމުގެ ސަބަބަކީ އަހަރުމެން ދެމީހުންނަކީ އަމިއްލަ ނަފުސާމެދު އިތުބާރުކުރާ ދެމީހުން. އަލްހަމްދުލިﷲ.” ނަހޫގެ މެސެޖްގެ ޚުލާޞާއަކީ މިއީއެވެ. ނަމޫނާ ވާހަކަކޮޅެކެވެ.
މި ޕޯސްޓާމެދު ނަހޫ ބުނީ ދާއިރާގެ މީހުން، އެކަކު އަނެކަކާއި ވިއްދާލައިގެން ކުރިއެރުމެއް ނުލިބޭނެ ކަމަށެވެ. ނަހޫ ދެކެނީ އަނެކާގެ ކުރިއެރުމުން ތިމާއަށް ވާނެ އެއްވެސް ގެއްލުމެއް ނޯންނާނެ ކަމަށެވެ.
“ކިތަންމެ ޒަމާނެއް ވިޔަސް ކުރިއެރުމެއް ނުލިބެނީ ހަސަދަވެރިކަން ބޮޑުވީމަކަން ބައެއް މީހުން ގަބޫލުކުރަން އެބަޖެހޭ. ހަސަދަވެރި ވިސްނުން ދޫކޮށްލާށޭ އަޅުގަނޑު ދަންނަވާނީ.” ނަހޫގެ މި ވިސްނުމަކީ ކޮންމެ ދާއިރާއަކުންވެސް ކުރިއެރުން ހޯދުމަށް މަސައްކަތްކުރާ ފަރާތްތަކަށް ދެވޭނެ އެންމެ ރަނގަޅު ނަސޭހަތްކަމާމެދު އެއްވެސް ޚިލާފެއް ނެތެވެ.
ނަހޫ އާއި ބިންމާ އިބްރާހީމް ވަހީދު މީގެ ކުރީންވެސް އެކީގައި މަސައްކަތްކޮށްފައިވެއެވެ. ރާއްޖޭގައި އުފެއްދި އެންމެ ކާމިޔާބު އެއް ސީރީޒް ކަމަށްވާ “ކައްތިރި” އުފެއްދުމުގައި މި ދެ ލިޔުންތެރީން މަސައްކަތްކުރީ ގުޅިގެންނެވެ. އެކަކު އަނެކަކުގެ އެހީތެރިކަން ހޯދައިގެންނެވެ. އެކަމުގެ ފޮނިކަން ފެނިގެންދިޔައީ “ކައްތިރި” ޑްރާމާ އިންނެވެ.
“އަހަރެން އެއްޗެއް ލިޔަމުންދާއިރު އައިޑިއާއެއް އަހައިލަން ވިޔަސް ޑިސްކަސް އެއް ކޮށްލަން ވިޔަސް އިބްސޯ (ބިންމާ) އަށް ގުޅަން. ފެކަލްޓީގެ ޑިގްރީ ކްލާސްތަކަށް ސްކްރިޕްޓިން ލެސަންސް ނަގައިދޭން ދާއިރުވެސް އެހީއެއް ބޭނުންވެއްޖެއްޔާ ބިންމާގެ އެހީތެރިކަން ލިބޭ.” ނަހޫ އާއި ބިންމާގެ ޕްރޮފެޝަނަލް ގުޅުމުގެ ވާހަކަ އާއްމުކޮށް ނުދެއްކިޔަސް މުނިއަވަސް އާ ނަހުލާ މިއަދު ހިއްސާކުރީ ވަރަށް އިބްރަތްތެރި، މުހިންމު ވާހަކަކޮޅެކެވެ. މިއީ ކޮންމެ ދާއިރާއެއްގައި މަސައްކަތްކުރާ ފަރާތްތަކުންވެސް ގެންގުޅެންޖެހޭ ރިވެތި އުޞޫލެއް ނޫންތޯއެވެ. ރިވެތި ނަމޫނާއެއް ނޫންތޯއެވެ.
ނަހޫގެ ޚުލާޞާ މެސަޖަކީ ދާއިރާއަކުން ކުރިއަށްދާން ބޭނުންނަމަ، ހަސަދަވެރި ނުވާށެވެ. ހަސަދަވެރި ވިޔަސް، ގަދައަޅައި ހެޔޮ ނިޔަތުގައި މަސައްކަތްކުރާ މީހަކަށް ލިބޭނެ ދެރައެއް ނޯންނާނެއެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
