އިނގިރޭސި ބަހުގެ ފެންވަރު ރަނގަޅު ކުރުމަކީ އަޅުގަނޑުމެން ހަމަ ކޮންމެ މީހެއްގެ ވެސް އުއްމީދެއް ކަމުގައި ނޫނީ ނުވާނެކަން ކަށަވަރެވެ. އެގޮތުން އަޅުގަނޑުމެންގެ ފެންވަރު ރަނގަޅުކުރުމަށް ވަރަށް ގިނަގުނަ ކަންކަން ކޮށް އުޅެވެއެވެ.

ހެސްޓަރ އަކީ އޮސްޓްރޭލިއާ ގެ ލޯންގްޕޯރޓްސް ގޯލްޑް ކޯސްޓް ކެމްޕަސް ގެ މުދައްރިސެކެވެ. އޭނާ އަކީ ތަޢުލީމަށް ވަރަށް ބޮޑު އަހައްމިއްޔަތު ކަމެއް ދެމުން އަންނަ މީހެކެވެ. އޭނާގެ ދަރިވަރުންނަށް އެހީތެރިކަން ފޯރުކޮށްދިނުމަށްޓަކައި އަމިއްލަ ވެބްސައިޓަކާއި ބްލޮގެއް ޤާއިމުކޮށް ހިންގަމުން ދެއެވެ. އޭނާގެ ބްލޮގް ގައި 2012 ވަނަ އަހަރު ޝާއިޢު ކޮށްފައިވާ ލިޔުމެއް އަޅުގަނޑުގެ ލޮލުގައި އަޅައިގަތީ ބޮޑެތި މީހުންނަށް އިނގިރޭސި ބަހުން ވާހަކަ ދައްކަން ދަސްކޮށްދޭ ކޯހެއްގައި ކިޔަވައިދިނުމަށް ބޭނުންކުރެވިދާނެ ގޮތްތައް ހޯދުމުގެ މަސައްކަތް އަޅުގަނޑު ކުރަނިކޮށްނެވެ. މި ލިޔުމަކީ ‘އަޅުގަނޑުމެންގެ އިނގިރޭސި ބަހުގެ ފެންވަރު ރަނގަޅު ކުރުމަށް ކުރެވިދާނެ 100 ކަމެއް!’ މި މަޢުޟޫ ގައި ލިޔެފައިވާ ވަރަށް ފައިދާހުރި ލިޔުމެކެވެ. މި ލިޔުމުގެ ޒަރީޢާއިން އިނގިރޭސި ބަސް ދަސްކޮށް އުނގެނި އިތުރަށް ތަރައްޤީ ކުރުމަށް ބޭނުންވާ ފަރާތްތަކަށް ގިނަގުނަ ފައިދާ ތަކެއް ލިބިގެންދާނެ ކަމަށް އަޅުގަނޑަށް ޤަބޫލު ކުރެވެއެވެ.

1- ކުށެއް ޖެހިދާނެތީ ބިރު ނުގަންނާށެވެ. އަމިއްލަ ނަފުސަށް އިތުބާރު ކުރާށެވެ. ތިބާގެ ފަރާތުން ހެދޭ ކުށް އެހެން މީހަކަށް ރަނގަޅުކޮށްދެވޭނީ އަނެކުންނަށް ތިބާގެ ފަރާތުން ހެދޭ ކުށްތައް އަޑުއިވިގެންނެވެ.

2- އިނގިރޭސި ބަހުގެ ތެރޭގައި ތިބާގެ ވަގުތުތައް ހޭދަކުރުމަށް ވީހާވެސް ބޮޑަކަށް މަސައްކަތް ކުރާށެވެ. އިނގިރޭސި ބަހުން މީހުން ވާހަކަ ދައްކައިއުޅޭ މާހައުލެއްގައި މަޑުކޮށްލުމަށް ފުރުޞަތެއް ލިބިއްޖެނަމަ އެ ފުރުޞަތު ނަގައިނުލައި އޭގެ ބޭނުން ހިފާށެވެ. އޭރުން އެ ބަހުން ވާހަކަ ދައްކާ މީހުންގެ އަޑު އަހައިގެން ދަސްކުރެވޭނެ އެވެ. އިނގިރޭސި ބަސް އެއްމެ ރަނގަޅަށް، އަވަހަށް ދަސްކުރެވޭނީ އެ ބަހުން ވާހަކަ ދައްކައިގެން ނެވެ.

3- ކޮންމެ ދުވަހަކުވެސް ފަރިތަކުރާށެވެ. ތިބާ ކިޔެވުމަށް އަމިއްލައަށް ތާވަލެއް ތައްޔާރުކުރާށެވެ. ހަފުތާއަކު ނުވަތަ ދުވާލަކު އިނގިރޭސި ބަސް ކިޔެވުމުގައި ތިބާ ހޭދަކުރާނީ ކިހާ ވަގުތެއްކަން ކަނޑައަޅައި އެއަށް އަމަލު ކުރުމުގައި ދެމިހުންނާށެވެ. އާދަވެ ބަސް އުނގެނުމަށް މަސައްކަތް ކުރެވޭނެ ގޮތެއް ޤާއިމުކުރާށެވެ.

4- ތިބާ ތައްޔާރުކޮށްފައިވާ ތާވަލް ނުވަތަ ޕްލޭން، އާއިލާ އާއި ރައްޓެހިންނާއި ހިއްސާ ކުރާށެވެ. އެމީހުންގެ ފަރާތުން ތިބާ އުނގެނުމަށް ހިތްވަރު ލިބޭނެ ގޮތެއް ހޯދާށެވެ. އަދި އެމީހުންގެ ފަރާތުން ތިބާ ގެ ކިޔެވުމަށް ބުރޫ އަރާނެ ކަމެއް ނުކުރުމަށް އެދޭށެވެ.

5- ބަސް ދަސްކުރުމުގައި ބޭނުންކުރާ މައިގަނޑު 4 ހުނަރުގައި ހިފަހައްޓައި އެކަންކަން ފަރިތަ ކުރާށެވެ. އެ ހަތަރު ހުނަރަކީ: ކިޔުމުގެ ހުނަރު، ލިޔުމުގެ ހުނަރު، ވާހަކަ ދެއްކުމުގެ ހުނަރާއި އަޑުއެހުމުގެ ހުނަރެވެ. ތިބާ އިނގިރޭސި ބަހަށް އަހުލުވެރިވުމަށް މި ހަތަރު ހުނަރަކީ ހަމަ ކޮންމެހެންވެސް ބޭނުންތެރި ހަތަރު ހުނަރެވެ.

6- އަލަށް ދަސްވާ ބަސްތައް ނޯޓްކުރުމަށް ނޯޓްފޮތެއް ގެންގުޅޭށެވެ. އެ ބަސްތައް ބޭނުން ކޮށްގެން ޖުމްލަ ހަދައިގެން ވާހަކަ ދެއްކުމުގައި ބޭނުންކުރެވޭތޯ މަސައްކަތް ކުރާށެވެ.

7- މަދުވެގެން ދުވާލަކު އެއްފަހަރު ކޮންމެވެސް މިންވަރެއް (ފިލާވަޅެއް ނަމަވެސް) ލިޔުމުގައި ނުވަތަ ކިޔުމުގައި ބޭނުންކޮށްލާށެވެ.

8- އިމްތިހާނަކަށް ބަސްތަކެއް ދަސްކުރަން ޖެހޭނަމަ ހިތުދަސް ކުރުމަކީ އެއްމެ ޢާއްމު އެއް އުޞޫލެވެ. ނަމަވެސް އެ ގޮތަކީ ބަސްތައް ހަނދާނުގައި ގިނަދުވަހު ބެހެއްޓޭނެ ގޮތެއް ނޫނެވެ. ސަބަބަކީ އިމްތިޙާނަކަށް ދަސްކޮށްލާ އެއްޗެއްސަކީ އާއްމު އުސޫލުން ބަލާއިރު އެހާ ގިނަދުވަހު ހަނދާނުގައި ބެހެއްޓޭނެ އެއްޗެއްސެއް ނޫނެވެ.

9- ތިބާ އަށް އެއްމެ އެކަށޭނަ ވަގުތު ތަކަކަށް ކިޔެވުމުގެ ގަޑިތައް ބަހާލާށެވެ. ފަތިހާ ހޭލާ މީހެއް ނޫންނަމަ، ކިޔެވުމަށް މެންދުރު ފަހުގެ ވަގުތެއް ކަނޑައެޅިދާނެ އެވެ.

10- އަލަށް ދަސްވާ ބަސްތައް ގިނަދުވަހު ހަނދާނުގައި ބެހެއްޓޭނީ އެ ބަސް ބޭނުންކޮށްގެން ހަދާ މިސާލު ޖުމްލައެއް ހަނދާނުގައި ބަހައްޓައިގެންނެވެ.

11- އެހެން މީހެއް ލައްވައި ޓެސްޓެއް ތައްޔާރުކޮށް އެ ޓެސްޓަށް ތިބާ ތައްޔާރުވާށެވެ. އޭރުން ޓެސްޓެއް އޮންނާތީ އެކަން ސިކުނޑީގައި ބާއްވައިގެން ތަންކޮޅެއް ބޮޑަށް މަސައްކަތް ކުރުމުގެ ޖޯޝެއް ހުންނާނެ އެވެ.

12- މީގެ މާނަ އަކީ ހަމަ އެކަނި ޓެސްޓެއް އޮންނާތީ އެއަށް ތައްޔާރުވުން ނޫންކަން ސިކުނޑީގައި ބޭއްވުން މުހިއްމެވެ. ބޮޑު މަންޒަރަށް ވިސްނާށެވެ. ތިބާ އަށް ފަރިތަކަމާއި އެކު އިނގިރޭސި ބަސް ބޭނުންކުރަން އެނގުމުން ތިބާ އަށް ކުރެވިދާނެ ކަންކަން ރާވައި ޕްލޭން ކުރަމުން ގެންދާށެވެ. ތިބާގެ ދިރިއުޅުމުގެ ފެންވަރު އެކަމުގެ ސަބަބުން ކުރިއަރައިގެން ދާނެ މިންވަރު ހިތަށް ގެންނާށެވެ. އޭރުން ވާޞިލް ވުމަށް މަސައްކަތް ކުރަން ޖެހޭ ލަނޑުދަނޑިއެއް އަބަދުވެސް އޮންނާނީ ފެންނާށެވެ.

13- ވިސްނުމުގައި ބަހައްޓަންވީ ދިގު މުއްދަތަކަށް ތިބާއަށް ފައިދާ ކުރާނެ ފަދަ ލަނޑުދަނޑިއަކަށެވެ. އެ ލަނޑުދަނޑި އަށް ވާޞިލް ވުމަށް މަސައްކަތް ކުރާށެވެ.

14- ހަމަ އެހެއްމެ ކުރު މުއްދަތުގެ ލަނޑުދަނޑިތައްވެސް އެކަށައަޅާށެވެ. އެފަދަ ލަނޑުދަނޑިއެއް ޙާޞިލް ކުރެވުމުން އެކަމުގެ އަގު ތިބާ އަމިއްލައަށް ވަޒަން ކުރާށެވެ.

15- އުނގެނުމަށް ޝައުޤުވެރި ކުރުވާފަދަ މާހައުލެއް އުފައްދާށެވެ. މަޖޫބުރު ވެގެން ކުރާ ކަމަކަށް ވުރެން ބޮޑަށް ތިބާ އެކަމަށް ބޭނުންވެގެން ކުރާ ކަމަކަށް އެކަން ކުރާށެވެ. ބޮޑަށް ދަސްވާނީ ދަސްކުރުމުގެ އެދުންވެރިކަން ތިބާގެ ކިބައިގައި ބޮޑުވި ވަރަކަށެވެ.

16- އުގެނި ދަސްކުރުމަށް ތިބާއަށް އެއްމެ ފަސޭހަ ގޮތްތަކެއް ދެނެގަންނާށެވެ. ވޭތިވެދިޔަ މާޒީގައި ތިބާ އަށް އެއްމެ ކާމިޔާބުވެފައިވަނީ ކޮން ގޮތަކަށް ކިޔެވުން ބައްޓަން ކޮށްގެންތޯ ވިސްނައި އެގޮތަށް ޢަމަލު ކުރާށެވެ.

17- ތިބާ ދަސްކުރާނެ ގޮތްވެސް ކަނޑައަޅާށެވެ. ހިތުދަސްކޮށްގެންތޯ، ކިޔައިގެންތޯ، ވާހަކަ ދައްކައިގެންތޯ، ދަސްކުރާ އެއްޗެއް ޚުލާޞާ ކޮށްގެންތޯ ނުވަތަ އެހެންވެސް ގޮތެއް އިޚްތިޔާރު ކުރާށެވެ. ތިބާ އަށް އެއްމެ ރަނގަޅަށް ދަސްވާ ގޮތެއް އެނގޭނީ ހަމަ ތިބާ އަށެވެ. މަޑުމައިތިރި ތަނެއްގައި އެކަނި އިނދެގެންތޯ ނުވަތަ ގްރޫޕެއްގެ މެދުގައި މަސައްކަތް ކޮށްގެންތޯ ވެސް ކަނޑައަޅާނީ ޚުދު ތިބާ އަމިއްލަ އަށެވެ.

18- ނޭނގޭ ނުވަތަ އޮޅުން ނުފިލާ އެއްޗެއް އޮތްނަމަ، އެނގޭ މީހެއްގެ ކިބައިން އޮޅުންފިލުވާށެވެ. މުދައްރިސް ނުވަތަ އެކުގައި ކިޔަވަންދާ ކުއްޖެއް ނުވަތަ ރައްޓެއްސެއްގެ ފަރާތުން އެހީތެރިކަން ހޯދާށެވެ.

19- މުޠާލިޔާ ކުރާށެވެ. މުޠާލިޔާ ކުރާށެވެ. މުޠާލިޔާ ކުރާށެވެ. ކުރިން ދަސްވެފައިވާ ތަކެތިވެސް އަލުން މުޠާލިޔާ ކުރުމަށް ވަގުތު ހޯދާށެވެ.

20- އެއްމެ ގިނަވެގެން ތިރީސް މިނެޓަށްވުރެން ގިނައިރުވާންދެން އެކަނި އިނދެ ކިޔެވުމަކީ އެހާ ރަނގަޅު ކަމެއް ނޫނެވެ. ދޭތެރެއަކުން ވަގުތު ކޮޅެއް ހުސްކޮށްލާށެވެ. އަތްފައި ދަމާލައި ތާޒާ ވައިލިބޭ މާހައުލަކަށް ނިކުމެލާށެވެ.

ނުނިމޭ

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: