ވީޑިއޯ ސްޓްރީމިން އެޕް ބައިސްކޯފުން ކާމިޔާބުކަމާއެކު ދައްކަން ފަށާފައިވާ “އެހެނަސް” ސީރީޒްގެ ފުރަތަ ސީޒަން ނިންމައިލީ ބެލުންތެރިންގެ ހިތުގައި އާ ސުވާލުތަކެއް އުފައްދަމުންނެވެ. ސީރީޒްގެ ދެވަނަ ސީޒަނަށް އިތުރަށް އިންތިޒާރު ކުރަން ޖެހޭފަދަ ގޮތަކަށެވެ. “އެހެނަސް”ގެ ޓީމުން މިހާރު މަސައްކަތްކުރަމުންދަނީ އެ ސުވާލުތަކުގެ ޖަވާބުތައް އުފެއްދުމަށެވެ. ސީރީޒްގެ ދެވަނަ ސީޒަންގެ އެޕިސޯޑުތައް ޝޫޓްކުރަމުންނެވެ.

މީގެ ހަފުތާއެއް ކުރިން ދެވަނަ ސީޒަންގެ މަންޒަރުތައް ނަގަން ފަށާފައިވަނީ އާ ތަރިންތަކެއް ވެސް ހިމަނައިގެންނެވެ. ފުރަތަމަ ސީޒަންގެ ދިހަ އެޕިސޯޑަށް ބެލުންތެރިންގެ ބޮޑު ތަރުހީބެއް ލިބިގެންދިޔަ އިރު، އެ ސީޒަން ނިމިގެން ދިޔައީ ލީޑް ރޯލް ނިޔާ (މުޙައްމަދު ވިޝާލް) ގެެ ހަޔާތަށް ބައިވެރިއެއް ގެނެސްފައިވާކަން އަންގަމުންނެވެ. ނިޔާ ގެ އަންހެނުން ޝާއިރާ (ޢާއިޝަތު ރިޝްމީ) އެންމެންނަށް ތަޢާރަފުވެގެން ދިއުންވީ އެތައް ހާސް ސުވާލެއް އުފެދުނު ކަމަކަށެވެ.

އައު ތަރިންތަކެއް މިފަހަރު ފެންނައިރު ފުރަތަ ސީޒަންގައި ދެއްކި ރަޔާން އެއް މި ސީޒަންގައި ނުދައްކާނެއެވެ. އިތުރަށް ފެނިގެންދާނީ ކޮން ބައެއް ކަން މިހައިތަނަށް އައިއިރު ހާމަކޮށްފައެއް ނުވެއެވެ. ނަމަވެސް މަޝްހޫރު ބައެއް ފަރާތްތަކާ ވާހަކަދައްކައި މި ސީރީޒަށް ގެންދިއުމަށް މަސައްކަތްކޮށްފައިވާކަން މުނިއަވަސް އަށް އެނގިފައިވެއެވެ.

ރަނޑު އަދި ގެވެށިއަނިޔާގެ ޝިކާރައަކަށް ވެފައިވާ ފިރިހެން ކުއްޖެއްގެ ހަޔާތް ދައްކުވައިދޭ މި ސީރީޒް އަކީ ވާހަކަ ލިޔުންތެރިޔާ އަހުމަދު އިގްބާލް (އައިކިޔު) ލިޔެ، ހުނަރުވެރި ޑައިރެކްޓަރު ރަވީ ފާރޫޤް ޑައިރެކްޓްކޮށް ގެނެސްދޭ ސީރީޒެކެވެ.

ދެވަނަ ސީޒަންގެ މަސައްކަތް މިހާރު ކުރަމުން އަންނައިރު، މި ސީޒަން ދައްކަން ފަށާނެ ތާރީޚެއް ހާމަކޮށްފައެއް ނުވެއެވެ. ނަމަވެސް މި އަހަރު ތެރޭގައި ދެވަނަ ސީޒަން ފެނިދާނެކަމުގެ އިޝާރާތެއް ޕްރޮޑަކްޝަން ޓީމުން ވަނީ ލިބިފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
މުނިއަވަސް ގެ ފައުންޑަރ އަދި އެޑިޓަރ

ގުޅުންހުރި ލިޔުން: