މިއަދަކީ ބައިނަލްއަގުވާމީ އެއާރ ޓްރެފިކް ކޮންޓްރޯލަރުންގެ ދުވަހެވެ. ​ކޮންމެ އަހަރެއްގެވެސް އޮކްޓޫބަރު މަހުގެ 20ވަނަ ދުވަހަކީ ބައިނަލްއަގުވާމީ ގޮތުން ފާހަގަކުރާ އެއާރ ޓްރެފިކް ކޮންޓްރޯލަރުންގެ ދުވަހެވެ.

މި ދުވަސް ފާހަގަކުރަނީ އެއާރ ޓްރެފިކް ކޮންޓްރޯލަރުން ކުރަމުންގެންދާ ބުރަ، އަދި އެހާމެ ޒިންމާދާރު މަސްޢޫލިއްޔަތުގެ އަގުވަޒަންކުރުމުގެ ގޮތުންނެވެ. އަނެއްކާވެސް އެއާރ ޓްރެފިކް ކޮންޓްރޯލަރުންގެ ދުވަހެއް އައިސް ކުރިމަތިވީއެވެ. ސުވާލަކީ ރާއްޖޭގައި މިބުރަ މަސްއޫލިއްޔަތު އަދާ ކުރާ އެތައް ދިވެހިންނެއް އުޅޭއިރު އެމީހުން އެކުރާ ބުރަ މަސައްކަތުގެ އަގުވަޒަންކުރެވޭބާއެވެ؟ ރަސްމީގޮތެއްގައި މިދުވަސް ފާހަގަ ކުރުމަށް އެއްވެސް ކަމެއް ކުރެވޭބާވައެވެ؟

ރާއްޖޭގެ އެއާރ ޓްރެފިކް ކޮންޓްރޯލަރުން އަމިއްލަ ޖީބުން ޗަންދާ ނަގައިގެން ނުވަތަ ކުންފުނިން ހޭދައެއް ކޮށްގެން ދުވަސް ފާހަގަކޮށްލުން ފިޔަވައި މި މުނާސަބާ ފާހަގަކުރާ އެހެން ގޮތެއް ނެތެވެ. އެ ދުވަސް ފާހަގަކުރާ އެހެން ބައެއް ނެތެވެ. ކަމާބެހޭ އިދާރާ ތަކުން ދުވަހުގެ ހެޔޮއެދުންތައް ފޮނުވުމަށް އެންމެ ކުޑަމިނުން ޓްވީޓެއް ކޮށްލުން ފަދަ އާދައިގެ ކަމެއްވެސް ކޮށްނުލާ ކިތަންމެ އަހަރެއް ވޭތުވެ ހިނގައްޖެއެވެ.

އެއާރ ޓްރެފިކް ކޮންޓްރޯލަރުންނަކީ މީހުންގެ ލޮލުގައި އަޅައިގަންނަ ފަދަ މާހައުލެއްގައި މަސައްކަތްކުރާ ބައެއް ނޫނެވެ. އެއީ އުޅޭ ބައެއްކަން ނުވެސް އެނގޭ ބައެކޭވެސް ދެންނެވިދާނެއެވެ. ކޮންމެ ދުވަހެއްގެ ކޮންމެ ހިނދުކޮޅަކީ ދުނިޔޭގެ އެކި ކަންކޮޅުތަކުގައި އެއާރ ޓްރެފިކް ކޮންޓްރޯލަރުން އެމީހުންގެ ޒިންމާ އުފުލުމުގައި ހަރަކާތްތެރިވަމުން އަންނަ ވަގުތެކެވެ.

ރައްކާތެރިކަމާއެކު ފަސިންޖަރުން ބޭނުންވާ މަންޒިލްތަކަށް ވައިގެ މަގުން ގެންގޮސްދިނުމުގައި މަގުދައްކައިދޭ މުރުޝިދުންނަކީ އެއާރ ޓްރެފިކް ކޮންޓްރޯލަރުންނެވެ. ކުރިންވެސް ފާހަގަކުރެވު ފަދައިން، ގިނަ ހާލަތްތަކުގައި އެއާރ ޓްރެފިކް ކޮންޓްރޯލަރުންނަކީ އެހެން މީހުންނަށް ނުފެންނަ މާހައުލެއްގައި ތިބެ މަސައްކަތްކުރާ ބައެކެވެ. އެހެން ބައެއްގެ ލޮލުގައި އަޅައިނުގަންނަ ބައެކެވެ. ކަރަންޓެކޭ އެއްފަދައިންނެވެ. ނަމަވެސް މައްސަލައެއް ދިމާވާ ނާދިރު ހާލަތްތަކުގައި އެއާރ ޓްރެފިކް ކޮންޓްރޯލަރުންނަކީ އުޅޭ ބައެއްކަން ފާހަގަކުރެވެއެވެ. ތުހުމަތުގެ އިނގިލި ދިއްކުރެވެއެވެ.

އެއާރ ޓްރެފިކް ކޮންޓްރޯލަރުންނަކީ ވެސް ދަތުރުފަތުރުކުރާ އާއްމުންނެކޭ އެއްފަދައިން އިންސާނުންނެވެ. އެމީހުންނަކީ ރޭގަނޑު ވެސް، ހަފުތާ ބަންދުގައި ވެސް، މުލަ ރޯދައާއި ޢީދު ހައްޖާ އަދި ސަރުކާރު ބަންދު ހުރިހައި ދުވަހެއްގައި ވެސް ވަޒީފާގެ ޒިންމާ އަދާކުރަމުން އަންނަ ބައެކެވެ. އެމީހުންގެ ވެސް އާއިލާތައް ހުރެއެވެ. އުފަންދުވަހުގެ ހަފުލާތަކާއި ކައިވެނީގެ ޕާޓީތަކާއި ގާތްތިމާގެ މީހުންނާއި ރައްޓެހިންގެ ޖަނާޒާތައް ވެސް އެވެރިންނަށް އޮންނަނީ ގުރުބާންކޮށްލަން ޖެހިފައެވެ.

ކަން މިހެން އޮތްނަމަވެސް، އެމީހުންނަކީ ވެސް އެމީހުންގެ ވަޒީފާ ދެކެ ނުހަނު ލޯބިވާ ބައެކެވެ. ރެއާދުވާލުގެ ކޮންމެ ވަގުތެއްގައިވެސް އެމީހުންގެ ޢަޒުމާއި ހިތްވަރުން ދައްކައިދެނީ ޒިންމާ އަދާކުރުމަށް ފަސްޖެހުމެއް ނެތި ތައްޔާރަށް ތިބޭކަމެކެވެ. އެއާރ ޓްރެފިކް ކޮންޓްރޯލަރުންނަކީ ވައިގެދަތުރުފަތުކުރުމުގެ ރައްކާތެރި އަދި ނިޔާމަ ނިޒާމެއްގެ ވަރަށް މުހިންމު އުންސުރެކެވެ. މިއީވެސް އިންސާނީ ވަޞީލަތް އިންތިހާއަށް ބޭނުންވާ ދާއިރާއެކެވެ. ވައިގެދަތުރުފަތުކުރުމުގެ ދާއިރާގައި މަސައްކަތްކުރާ ތަމްރީނު ލިބިފައިތިބި މީހުން މަދުވުމުގެ މައްސަލައަކީ މުޅި ބައިނަލްއަގުވާމީ މުޖުތަމަޢުން އެކަން ފާހަގަކުރާ ކަމެކެވެ. އޭގެ ތެރޭގައި އެއާރ ޓްރެފިކް ކޮންޓްރޯލަރުން ވެސް ހިމެނެއެވެ. ނަތީޖާއެއްގެ ގޮތުން، މިވަގުތު އެ ވަޒީފާގައި އުޅޭ ކޮންޓްރޯލަރުންނަށް އެކަމުގެ ބުރަ އުފުލަން މަޖުބޫރުވެއެވެ. ވަޒީފާއާ ބެހޭ ޤާނޫނާއި ޚިލާފަށް މަސައްކަތްކުރަން ޖެހުމަކީވެސް ކުރިމަތިވެފައިވާ މައްސަލައެކެވެ.

ވައިގެދަތުރުފަތުރާބެހޭ އިދާރާތަކުން އެއާރ ޓްރެފިކް ކޮންޓްރޯލަރުންގެ ޕްރޮފެޝަނަލިޒަމް އަށް ސަޕޯޓްދޭން ޖެހޭކަމަށް މިއަދުގެ މުނާސަބަތުގައި ބައިނަލްއަގުވާމީ އެއާރޓްރެފިކް ކޮންޓްރޯލަރުންގެ ޖަމިއްޔާ (އިފަޓްކާ)ގެ ރައީސް ވަނީ ގޮވާލައްވާފައެވެ. އެމީހުންގެ ޕްރޮފެޝަނަލިޒަމް ކުރިއަރުވާ ހިތްވަރުދޭންޖެހޭ ކަމަށާއި ވަކިވަކި އެއާރ ޓްރެފިކް ކޮންޓްރޯލަރުންނަކީ މި ނިޒާމުގެ އެންމެ މުހިންމު ފަރާތްތައް ކަމަށްވެސް ވިދާޅުވެފައިވެއެވެ. މިއަދަކީ ބައިނަލްއަގުވާމީ ގޮތުން ފާހަގަކުރާ އެއާރ ޓްރެފިކް ކޮންޓްރޯލަރުންގެ ދުވަހެވެ. އެއާޓްރެފިކް ކޮންޓްރޯލްގެ ދުވަހެއް ނޫނެވެ.

ދުވަހުގެ މުނާސަބާގައި ރައްޖެއާއި ދުނިޔޭގެ ހުރިހައި އެއާރ ޓްރެފިކް ކޮންޓްރޯލަރުންނަށް ދުވަހުގެ ތަހުނިޔާ ފޮނުވަމެވެ.

ލިޔުންތެރިޔާގެ ފުރަމަލަ

އާމިނަތު ސަޒްރާ
މުނިއަވަސްގެ ޑެޕިއުޓީ އެޑިޓަރ ސަޒްރާ އަކީ ކުރިން ރާއްޖެ ޓީވީގައި މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ. މުނިފޫހިފިލުމުގެ ދާއިރާގެ އިތުރުން އިޖުތިމާޢީ ދާއިރާގައިވެސް ސަޒްރާ ޚާއްޞައެވެ.

ގުޅުންހުރި ލިޔުން: