މަޝްހޫރު ޑައިރެކްޓަރު އަމްޖަދު އިބްރާހީމް (އަމްޖޭ)ގެ 52 ވަނަ ޑައިރެކްޝަން ހިމެނޭ ފިލްމް “ރޭވުމުން” ބައިސްކޯފުގައި ސްޓްރީމްކުރަން ނިންމައިފިއެވެ. ބައިސްކޯފު މެދުވެރިކޮށް “ރޭވުމުން” ބަލައިލެވޭނީ މި މަހުގެ 25 ވަނަ ދުވަހުން ފެށިގެންނެވެ.

އަމްޖޭ ގެ އަމިއްލަ ސްކްރީންޕްލޭ އަކަށް ކުޅެފައިވާ “ރޭވުމުން” ގެ ލީޑް ރޯލް ކުޅެފައި ވަނީ މުހައްމަދު މަނިކާއި އަލަށް ތައާރަފުވާ ނާޖިހާ (ނާޖި) އެވެ. ފިލްމްގެ ކާސްޓުންގެ ތެރޭގައި ފައުޒިއްޔާ ހަސަން، އަހުމަދު ޝާޒް (ތަބޫޖެ) އަދި މަރިޔަމް ޝަކީލާ، ހަސަން މަނިކް (ރޯނު) އަދި ނާޝިދާ ފަދަ ތަރިން ހިމެނެ އެވެ.

“މި ސްޓޯރީ ހަދާފަ މިއޮތީ ފްރޮންޓްގަ ލޯބީގެ ހާދިސާ ތަކެއް، ކަޕްލް އެއް އުޅެމުންދާއިރު ފަހަތުން ހިނގަމުންދާނީ ބިރުވެރި ހާދިސާ ތަކެއް. ދެން ހަމަ ސައިޑް ސްޓޯރީއެއް ގޮތުގަ މި އަންނަނީ އަޅުގަނޑާ ޝަކީލާ އާ ދެމީހުންގެ ސީން ތަކެއް މި އަންނަނީ. އެއީ ގެވެށި އަނިޔާ އޭގަ ވަރަށް ބޮޑަށް ދައްކައިދޭނެ. އެހެންވީމަ ވަރަށް ބޮޑަށް ތަޅާފޮޅުމާ މިކަހަލަ ކަންތައްތައް އޮންނާނެ. އެކަމަކު މި ދިވެހިކޮށް ތަޅާނީވެސް. އެހެންވީމަ އޯޑިއަންސް މި ސްޓޯރީ ވަރަށް ބޮޑަށް ހިފަހައްޓާ ވަރަށް ބޮޑު އެއްޗެއްގެ ގޮތުގަ މި އިންނަނީ މި ސްޓޯރީ.” ފިލްމާމެދު މި ފިލްމުގައި މުހިންމު ރޯލެއް އަދާކޮށްފައިވާ ޝާޒް މުނިއަވަސް އަށް ދިން އެކްސްކްލޫސިވް އިންޓަވިއުއެއްގައި ބުނެފައިވެއެވެ.

ފިލްމު ކެމެރާ ކޮށްފައިވަނީ މުހައްމަދު އަބޫބަކުރު (މާއެނބޫ) އެވެ. ފިލްމު ޕްރޮޑިއުސް ކޮށްފައިވަނީ ޖޭޒް އެންޓަޓެއިންމެންޓުން ނެވެ.

އޮލިމްޕަހުގައި “ރޭވުމުން”ގެ12 ޝޯ ދެއްކިއެވެ. އޭގެ އިތުރުން ހުޅުމާލޭ ޝްވެކާއި އަތޮޅުތެރޭގެ ބައެއް ރަށްރަށުގައިވެސް ދައްކާފައިވެއެވެ. މި ދުވަސްކޮޅަކީ ބައިސްކޯފު މެދުވެރިކޮށް ދިވެހި ފީޗާ ފިލްމުތައް ރިލީޒްކުރުން އިތުރުވެފައިވާ ދުވަސްކޮޅެއްކަން ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: