މިއީ، 1988 ނޮވެމްބަރު 3ވަނަ ދުވަހުގެ ޢުދުވާނީ ހަމަލާއާއި އެދުވަހު، އިސްލާމް ދީނާއި ދިވެހި ޤައުމުގެ ދިފާޢުގައި ޝަހީދުވެދިޔަ ދިވެހީންގެ ހަނދާން އައުކޮށްލުމުގެ ގޮތުން މަޝްހޫރު ޅެންވެރިޔާ އިއްޒާ އަހުމަދު ނިޒާރު ހައްދަވާފައިވާ ޅެމެކެވެ. މުނިއަވަސްގެ ކިޔުންތެރިންނާއި ހަމައަށް މި ޅެމުގެ ލިޔުމާއި އޯޑިއޯ/ވީޑިއޯ ހުށައަޅައިލަމެވެ.
ނަސްރުގެ ދުވަހުގެ ހެޔޮއެދުމާއި ތަހުނިޔާ، އިއްޒަ އާއި މުނިއަވަސް ޓީމުގެ ފަރާތުން އެންމެހައި ލޮބުވެތި ދިވެހިންނަށް އަރިސްކުރަމެވެ.
ޅެން ހެއްދެވީ: އިއްޒާ އަހުމަދު ނިޒާރު
ނިދިފައިވި ފަސްގަނޑެއް ސިހި، ހޭލެއްވި އަޑެކެ ބިރުވެރި
އެދިމާއަކަށް އެ އަޑު އައި، ކެރި ދިން ޖަވާބު މަތިވެރި
އުދަވާން އެއައި އިރަށް ވެސް، މަޑުޖެހެވުނޭ އެތަން ފެނި
ޢުދުވާނު ފަތުރަމުން އައި، އަނދިރީގެ ސާލު މޮޅިވެރި
މަތިއުކުޅު ދެއްކި ބަޑިޔާ، އުންޑައިގެ ބާރު ދައްކާ
ކަތިލަން މި ޤައުމު ހިތުލީ، ޣައްދާރުނޭ މަކަރުވެރި
ފިސްކޮށްލިޔަސް ހެވޭ ބުނެ، ކުރިމަތިލި ނަޞްރު ހޯދަން
އިސްނެގި ދަރިންތަކެއް އޭ، ޤައުމިއްޔަތަށް އަދަބުވެރި
ވަޠަނީ ޖިހާދަކަށް އެދި، ވެދުމަށް ފުރާނަ ދިނުމުން
ބަޠަލުންނަކީ ތިއީއޭ މުޅި ދީބު ދުށް ފަޚުރުވެރި
ހުއްޖަތްތަކެއް ނުދައްކާ، ފަސްގަނޑު ދިފާޢުކުރުމުން
ޙުއްބުލް ވަޠަންގެ ތިޔައީ، އަބުޠާލުނޭ ޤަދަރުވެރި
ޙަމަލާތަކާ އެ ޢުދުވާން، މާޒީވެގެން ހިނގައްޖޭ
ނަމަވެސް ޚިޔާނަތެއް އޭ، ދިވެހިން ކުރާނެ ކުށްވެރި
އެކިގޮތްގޮތުން ޚިޔާނާތް، ޤައުމުގެ ކަރާމަތަށްވީ
ވަކި ނަފުސަކާ ނަމަށްވުރެ، މިބިމާއި ދީން ޝަރަފުވެރި
3 ނޮވެމްބަރު 2019
ލިޔުންތެރިޔާގެ ފުރަމަލަ
- މުހިންމު ބޭނުންތެރި ލިޔުންތައް އެކިއެކި ވަޞީލަތް ތަކުން ނަގައިގެން، ލިޔުމުގެ އަސްލު މުސައްނިފް ލިޔުއްވި ލިޔުމެއްކަން އެނގޭ ގޮތަށް 'ރަން ގަލަން' ޕޯސްޓް ކުރާނެ އެވެ.
މި ލިޔުންތެރިޔާގެ ބައެއް އެހެން ލިޔުންތައް
- 11 ފެބްރުއަރީ 2024ރިޕޯޓްއައިބައިފިލި : ދިވެހިބަހުން ގެއްލެމުންދާ އަގުބޮޑު މުދަލެއް
- 31 ޖެނުއަރީ 2024އަދަބިއްޔާތުފަޚުރުވެރި ދިވެހިބަސް
- 3 ނޮވެމްބަރ 2023އަދަބިއްޔާތުދިވެހިން ކުރާނެ ކުށްވެރި
- 31 އޮކްޓޯބަރ 2023ހާދިސާދިރާސާ ނަޒަރަކުން ތިނެއް ނޮވެމްބަރުގެ ޢުދުވާނީ ޙަމަލާ
