​‎3 ނޮވެމްބަރ 1988ވީ ބުރާސްފަތި ދުވަހަކީ ދިވެހިންގެ ހިތުން ދުވަހަކުވެސް ފިލައިގެން ދާނެ ދުވަހެއް ނޫނެވެ. ބިރުވެރިކަމާ ނާމާން ކަމުން ފުރިގެންވި ދުވަހެކެވެ. އެއީ ފަހުގެ ތާރީޚެއްގައި ދިވެހިން ދެކެފައި ނުވާ އެތައްކަމެއް ތަޖުރިބާ ކުރަން ޖެހުނު އަސަރުން ފުރިގެންވީ ދުވަހެކެވެ. 

‎އެހެންނަނަމަވެސް އެ ދުވަހަކީ ދިވެހިން، ދިވެހި ޤައުމާ އިސްލާމް ދީނުގެ ދިފާއުގައި ފިދާވާނެކަމާއި އެ ހިތްވަރު ދިވެހިންނާ ދިވެހި އަސްކަރިއްޔާގައި ހުރިކަން ހާމަ ކޮށްދޭ އަލިގަދަ ހެއްކެކެވެ. ދިވެހި ޤައުުމުގެ މާޒީގައި ތިއްބެވި ފަޚުރުވެރި ދޮންބަންޑާރައިންނާ ބޮޑުތަކުރުފާނާ އަލިރަސްގެފާނު ފަދަ ދަރިން އަދިވެސް ތިބި ކަން ހާމަކޮށްދޭ އަލިގަދަ ދަލީލެކެވެ. އެންމެ ފަހު ވަގުތުވެސް މިފަސްގަނޑާ އަޅުގަނޑުމެންގެ އިސްލާމް ދީނުގެ އަދުއްވުންނަށް ދިވެހި ބިމުން ކުނޑިފުކެއްވެސް ދޫނުުކުރާނެކަން އަންގައިދޭ ވަރުގަދަ ހެއްކެކެވެ. 

ހިތާމައަކީ ފާއިތުވެ ދިޔަ މާޒީން މިޤައުމާއި އިދިކޮޅަށް ހިންގި މިފަދަ ކޮންމެ އުދުވާނެއްގެ މުގުލުގައި މިޤައުމުގެ ދަރިއަކު ނުވަތަ ދަރިންތަކެއް ތިބިކަމެވެ. އެގޮތުން މި ހާދިސާގައި ވެސް އެންމެ އިސްކޮށް ހުރީ ހ. ހާޖަރާގޭ ޢަބްދުﷲ ލުތުފީ ކިޔާމީހެކެވެ. އެހެންނަމަވެސް ލުތުފީގެ މަކަރުވެދި އަމިއްލަ އެދުމުން ފުރިގެންވާ ރޭވުން ކާމިޔާބު ނުވިކަމަށް ޓަކައި ﷲ އަށް ހަމްދުކުރަމެވެ. އަދި ދިވެހި ސިފައިން އެ ދެއްކެވި ހިތްވަރަށް ފަށްފަށުން ޝުކުރު ދަންނަވަމެވެ. 

ކަމެއްގެ ކާމިޔާބީ އެއްގެ ފަހަތުގައި ފޮރުވިފައި ވާނެ އެތައް ސިއްރުތަކެއް ވާނެއެވެ. އެހެންކަމުން މިދުވަހުވެސް އޭގެ އެތައް ކަމެއް ހިނގާފައި ވެއެވެ. ޢަދުއްވުންގެ ރޭވުންތައް ފޭލްވާނެ އެތައް ކަމެއް މެދުވެރި ކުރެއްވިއެވެ. އޭގެ އެންމެ ބޮޑު ސަބަބަކީ އަޅުގަނޑުމެން އެ ބޭފުޅަކަށްޓަކައި ފަޚުރުވެރިވާ ކޯޕްރަލް ޝަހީދު ހުސެން އާދަމް އެވެ. އެ މަޙްރޫމަށް ސުވަރުގޭގެ މަތިވެރި ނިޢުމަތް މިންވަރުކޮށްދެއްވާން ދޭވެ.

އަޅުގަނޑު މިވާހަކަ މިގޮތަށް މިފާހަގަ ކޮށްލީ އެކަމާ ގުޅޭ ގޮތުން އަޅުގަނޑަށް ލިބުނު ހެކިތަކަށް ބިނާ ކޮށް އަޅުގަނޑަށް ވެސް އެކަން ފާހަގަ ވާތީއެވެ. ހަނގުރާމައެއްގެ ކާމިޔާބީ އެންމެބޮޑަށް ގުޅިފައި ވަނީ އިދިކޮޅު މީހުނަށް ފުރަތަމަ ދޭ ރައްދާ އެވެ. އެހެންކަމުން އެދުވަހު ދުޝްމަނުންގެ ފުރަތަމަ ބަޑީގެ އަޑާ އެކު ހުސެން އާދަމް ދިން ވަރުގަދަ ރައްދަކީ ދުޝްމަނުންގެ މުޅި ‘އެތި’ ނާކާމިޔާބު ވުމުގެ އަސްލެވެ. އަނެއް ސަބަބުކަމަށް އަޅުގަނޑަށް ބޮޑަށް ގަބޫލު ކުރެވޭ އެއްކަމަކީ ދުޝްމަނުންތެރޭން މަދު ބައެއް ފިޔަފާ ތިބީ އަސްކަރީ ގޮތުން ތަޖުރިބާ ނެތްބައެއް ކަމަށް ވުމެވެ.

ދުޝްމަނުންގެ ތަޖުރިބާ މަދުކަން ދޭހަކޮށްދޭ ހެއްކެއްގެ ގޮތުން އިސްލާމީ މަރުކަޒާވީ ފަރާތުން، ފާރުން ބާގަނޑު ހަދަން ޖެހި އާރު.ޕީ.ޖީ 7 ފުދެ އެވެ. އާރު.ޕީ.ޖީ 7 އެއީ އެ ގޮއްވައިލުމަށްޓަކައި ވަކި ދުރުމިނެއް ބޭނުންވާ އެއްޗެކެވެ. އެހެންކަމުން މާ ކައިރިން ޖެހުމަކީ އޭގެ މައުލޫމާތު އެ ބޭނުންކުރި ބައެއްގެ ކިބައިގައި ނެތްކަން ދޭހަ ކޮށްދޭ ކަމެކެވެ. އަޅުގަނޑަށް މައުލޫމާތު ލިބުނު ގޮތުން އެދުވަހު ބޭނުން ކޮށްފައި ހުރި ބައެއް ގްރެނޭޑް ވެސް ހުރީ ޕިން އުފުރައިނުލައެވެ. އެހެން ކަމުން ދުޝްމަނުންގެ އަޝްކަރީ ހުނަރު ހުރިވަރު ސާފު ވެއެވެ. 

މިހުރިހާ ކަމެއް މިގޮތަށް ދިޔަ އިރު ސަފައިންގެ ކެރުމާ ހިތްވަރަކީ މުޅި ޢުދުވާން އަޅުގަނޑުމެނަށް ކާމިޔާބު ވުމުގެ އެންމެ ބޮޑު ސަބަބެވެ. އޭރު ދިވެހި އަސްކަރިއްޔާ އަކީ ވެސް މިހާރުގެ އަސްކަރިއްޔާ އާއި އަޅައިބަލާފައި ވަރަށް ދަށް ޒަމާނެކެވެ. އެއް އަތުގެ އިނގިލިން ގުނާލެވޭ ވަރު މަދު ބަޔަކު ފިޔަވާ އެވެ. އެހެން ނަމަވެސް އެ ހުރިހާ ގޮންޖެހުމެއް ނައްތައިލީ އެ ބޭފުޅުންގެ ގައުމީ ވަންތަ ކަމުގެ ޖޯޝާ ދީނީ ވަޙްދަތަށް އޮތް ލޯތްބެވެ. އެއަށްވުރެ މާތް އެއްޗެއް ކޮބައިތޯއެވެ. އެ ބޭފުޅުންގެ އެ ވާޖިބު، އެންމެ ފުރިހަމަ ގޮތުގައި އަދާނުކުރި ނަމަ އަޅުގަނޑުމެން މިގައުމު މި މިނިވަން ކަން މަތީނޯންނާނެއެވެ. އެހެންކަމުން އެ ޢުދުވާނުގައި ޤައުމަށްޓަކައި އެ ކޮށްދެއްވި ވަރުގަދަ ޖިހާދަށް ޝުކުރު އަދާކުުމަކީ ކޮންމެ ދިވެހި ދަރިއެއްގެ ވާޖިބެކެވެ. އެ ޢުދުވާނުގައި ގައުމަށްޓަކައި ޝަހީދުވެގެން ދިޔަ އެންމެހައި އަބުތާލުންނަށް ސުވަރުގޭގެ މަތިވެރި ނިޢުމަތް މިންވަރުކޮށްދެއްވައި އެ ބޭފުޅުންގެ އާއިލާ ތަކަށް ކެތްތެރިކަން ދެއްވާން ދޭވެ.  މި ލޮބުވެތި ވަޠަން ތާ އަބަދަށް މިނިވަން ކަންމަތީ ލަހައްޓަވާށިއެވެ.

ލިޔުންތެރިޔާގެ ފުރަމަލަ

މޫސާ ނަޒީރު
ކޮލަމިސްޓެއްގެ ގޮތުގައި އީސަދަރި ލިޔާނީ އިޖްތިމާޢީ އަދި ތަރައްޤީ އާއި މުޖުތަމަޢު ހޭލުންތެރި ކުރުވުމުގެ ލިޔުންތަކެވެ.

ގުޅުންހުރި ލިޔުން: