1967 ވަނަ އަހަރުގެ ނޮވެމްބަރ މަހުގެ 7ގައި އެޅުވި ފިލްމް ‘ސާތު ހިންދުސްތާނީ’އިން އުފަންވި ކުޅަދާނަ އެކްޓަރ އަމީތާބް ބައްޗަން ފިލްމް ކުޅެންފެށިތާ މިއަދަށް 50 އަހަރުވެއްޖެއެވެ. ފިލްމީ ދާއިރާގައި ސާބިތުކަމާއެކު 50 އަހަރު ހޭދަ ކުރެވުނު ފިލްމީ ތަރިންގެ އަދަދު އަތުން ގުނާލެވޭހާ މަދެވެ. އެހެންނަމަވެސް ‘ބިގް ބީ’ ގެ ނަމުގައި މަޝްހޫރު އަމީތާބްގެ ވިދުމަށް ފަނޑުކަމެއް ނައިސް މިއަދާހަމައަށް ވެސް އޭނާއަކީ ބެލުންތެރިންގެ ލޯބި ހޯދަމުން އަންނަ ފަންނާނެއްކަން ފާހަގަކޮށްލެވެއެވެ. މީގެ އިތުރުން އަމީތާބަކީ ފިލްމީ ދާއިރާގައި މަސައްކަތް ކުރާ މީހުންގެ ހާއްސަ އިހްތިރާމަކާއި ލޯތްބެއް ހޯދައިފައިވާ މީހެކެވެ.

އަމީތާބްގެ ކާމިޔާބު ރަންޔޫބިލް ފާހަގަ ކުރުމަށްޓަކައި ދަރިފުޅު އަބީޝޭކް ބައްޗަންވަނީ ހާއްސަ މެސެޖެއް އިންސްޓަގްރާމް މެދުވެރިކޮށް ފޮނުވާފައެވެ.

“ހަމައެކަނި ދަރިއެއްގެ ހައިސިއްޔަތަކުން ނޫން. އެކްޓަރެއް އަދި ފޭނެއްގެ ހައިސިއްޔަތުން. އަހަރުމެން އެންމެނަށްވެސް ‘ގްރޭޓްނެސް’ އެއް ފެނުނުމުގެ ނަސީބު ލިބިއްޖެ. އަދިވެސް އިޙްތިރާމާ ލޯތްބާއެކު ދަސްކުރާން އަދި ޝުކުރު ކުރަންވެސް ބައިވަރު ކަންކަން އެބަހުރި. ފިލްމީ ދުނިޔޭގައި ކުރިއަށް އޮތްތާނގައި ބައިވަރު މީހުން އުފަލާއެކު ބުނާނެ އަހަރުމެން ބައްޗަންގެ ދައުރު ދެކުނީމޭ” އަބީޝެކް ބައްޗަން ބުނެފައިވެއެވެ.

އަބީޝެކްގެ ޕޯސްޓާއެކު ހިމަނާފައިވާ ފޮޓޯ

އުމުރުން 77 އަހަރުގެ އަމީތާބްގެ ފިލްމީ ހަޔާތުގެ ރަންޔޫބިލް ފާހަގަ ކުރަމުން ދާއިރު ކުރިއަށް އަދިވެސް އޭނާގެ މުހިންމު ފިލްމް ތަކެއް އެބަހުއްޓެވެ. މީގެ ތެރޭގައި އިމްރާން ހާޝިމީއާއެކު މަސައްކަތް ކުރުމަށް ހަމަޖެހިފައިވާ ފިލްމް “ޗެހެރޭ” އަދި އާޔޫޝުމަން ކުރާނާ އާއެކު މަސައްކަތް ކުރުމަށް ހަމަޖެހިފައިވާ ފިލްމް “ގުލާބޯ ސިތާބޯ” ހިމެނެއެވެ. އަދިވެސް އިތުރު ފިލްމްތައް ކުރިއަށް ހުރިކަމަށް ރިޕޯޓްތައް ބުނާއިރު، އަމީތާބް ގެ ފިލްމްތަކަށް ބެލުންތެރިން އިންތިޒާރު ކުރަމުން ދަނީ ކެތްތެރިކަމެއް ނެތިއެވެ.

ކުށް ފިލުވީ: އަޙްމަދު ރަޝީދު

ލިޔުންތެރިޔާގެ ފުރަމަލަ

އާމިނަތު ސަޒްރާ
މުނިއަވަސްގެ ޑެޕިއުޓީ އެޑިޓަރ ސަޒްރާ އަކީ ކުރިން ރާއްޖެ ޓީވީގައި މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ. މުނިފޫހިފިލުމުގެ ދާއިރާގެ އިތުރުން އިޖުތިމާޢީ ދާއިރާގައިވެސް ސަޒްރާ ޚާއްޞައެވެ.

ގުޅުންހުރި ލިޔުން: