‏ ޔޫރޯ 2020 ކޮލިފައިންގެ ގްރޫޕް އެޗް އިން ފްރާންސް އަދި ތުރުކީ އަންނަ އަހަރުގެ ޔޫރޯ ފުޓްބޯޅަ މުބާރާތުން ޖާގަ ކަށަވަރުކޮށްފިއެވެ. 

ފްރާންސް ޔޫރޯގެ ޖާގައެއް ކަށަވަރުކުރީ ރޭ އަމިއްލަ ދަނޑުގައި މޮލްޑޯވާގެ މައްޗަށް 2-1 ގެ ނަތީޖާއަކުން ކުރިހޯދައިގެންނެވެ.

ފްރާންސްގެ ރަސްމީ ދަނޑުގައި ކުޅުނު މި މެޗުގެ ކުރީކޮޅު މޮލްޑޯވާ ވަނީ ގޯލެއްޖަހާ މެޗުގެ ކުރިހޯދާފައެވެ. މެޗުގެ 9 ވަނަ މިނެޓުގައި މި ގޯލް ކާމިޔާބުކޮށްދިނީ އެޓީމުގެ ފޯވާޑް ވޭޑިމް ރަޓާ އެވެ. މިއީ މި މެޗުގައި މޮލްޑޯވާގެ ޓީމުން ފްރާންސްގެ ގޯލަށް ފޮނުވާލި ހަމައެކަނި ހަމަލާ ކަން ފާހަގަކޮށްލެވެއެވެ. ގިނައިރު ބޯޅަ ހިފަހައްޓައިގެން ފްރާންސުން ގޯލެއް ކާމިޔާބުކުރުމަށް ކުރަމުން ދިޔަ މަސައްކަތް، ދިފާއީ ކުޅުމެއް ކުޅެމުންދިޔަ މޮލްޑޯވާ ވަނީ ހުއްޓުވާފައެވެ. މޮލްޑޯވާގެ ޑިފެންސް ފޫއަޅުވާލާ ފްރާންސަށް ގޯލެއް ކާމިޔާބު ކުރެވުނީ މެޗުގެ 35 ވަނަ މިނެޓުގައެވެ. މޮލްޑޯވާގެ ކީޕަރު ދިފާއުކުރި ބޯޅައެއް އަތުން ދޫވުމުން އެ ފުރުސަތުގެ ބޭނުން ހިފާ ރަފޭލް ވަރާން ވަނީ ގޯލެއް ކާމިޔާބުކޮށް މެޗުގެ ނަތީޖާ ހަމަހަމަ ކޮށްދީފައެވެ. 

ދެވަނަ ހާފުގައި ފްރާންސަށް ތިން ޕޮއިންޓް ހޯދައި، ޔޫރޯ ގެ ޖާގަ އެއް ކަށަވަރުކޮށްދިނީ މެޗުގެ 79 ވަނަ މިނެޓުގައި ލިބުނު ޕެނަލްޓީއަކުން އޮލިވިއޭ ޖިރޫ އެވެ. މި ޕެނަލްޓީ އަކީ ފްރާންސްގެ ޑިފެންޑަރު ލޫކަސް ޑީނޭ އަށް މޮލްޑޯވާގެ ޕެނަލްޓީ އޭރިޔާ ތެރެއިން ކުރި ފައުލަކާ ގުޅިގެން ލިބުނު  ޕެނަލްޓީއެކެވެ. ގުރޫޕްގެ އެއްވަނައިގައި ފްރާންސް އޮތީ ކުޅުނު 9 މެޗުން 22 ޕޮއިންޓް ހޯދައިގެންނެވެ.

ގުރޫޕް އެޗް ގައި ރޭ ކުޅުނު އެހެން މެޗުތަކަށް ބަލާއިރު ތުރުކީ އަދި އައިސްލެންޑް ބައްދަލުކުރި މެޗު 0-0 އިން އެއްވަރުވެ ޔޫރޯ ގެ ޖާގައެއް ތުރުކީ އަށް ވަނީ ކަށަވަރުވެފައެވެ. ކުޅުނު 9 މެޗުން 20 ޕޮއިންޓް ހޯދައިގެން ގްރޫޕްގެ ދެވަނައިގައި ތުރުކީ އޮތްއިރު، އައިސްލެންޑް އޮތީ 16 ޕޮއިންޓާއެކު ގްރޫޕްގެ ތިންވަނައިގައި އެވެ. 

އަލްބޭނިއާ އަދި އެންޑޯރާ ބައްދަލުކުރި މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ. އަލްބޭނިއާގެ ގޯލުތައް ކާމިޔާބުކޮށްދިނީ ބެކިމް ބަލަޖް އަދި ރޭ މަނަޖް އެވެ. އެންޑޯރާގެ 2 ގޯލުވެސް ކާމިޔާބުކޮށްދިނީ ކްރިސްޓިއަން މާޓިނޭޒް އެވެ. އަލްބޭނިއާ 13 ޕޮއިންޓާއެކު ގްރޫޕްގެ ހަތަރުވަނައިގައި އޮތްއިރު، 4 ޕޮއިންޓާއެކު ފަސްވަނައިގައި އޮތީ އެންޑޯރާ އެވެ. އަދި، 3 ޕޮއިންޓާއެކު ގްރޫޕްގެ ފުލުގައި އޮތީ މޮލްޑޯވާއެވެ.

ސްޕެއިން، ބެލްޖިއަމް، އިޓަލީ، ޕޮލެންޑް، ޔޫކްރޭން، ރަޝިއާ، އިންގްލެންޑް އަދި ޗެކް ރިޕަބްލިކް އަންނަ އަހަރު އޮންނަ ޔޫރޯ ފުޓްބޯޅަ މުބާރާތަށް މިހާތަނަށް ވަނީ ކޮލިފައިވެފައެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: