އިނގިރޭސި ޕްރިމިއަރ ލީގުގެ ޓޮޓެންހަމް ހޮޓްސްޕަރ ގެ ކޯޗުކަމަށް ތަޖުރިބާކާރު ކޯޗު ހޯސޭ މޮރީނިއޯ ހަމަޖައްސައިފިއެވެ. ޓޮޓެންހަމް އިން ނެރުނު ނޫސްބަޔާނެއްގައި މިކަން އިއުލާން ކޮށްފައިވަނީ އެޓީމުގެ ކޯޗުކަމުގައި 5 އަހަރުވަންދެން ހުރި ޕޮޗެޓީނޯ މަގާމުން ދުރުކުރިތަން އެއް ދުވަސް ވެސް ފުރިހަމަ ނުވަނީސް ކަން ފާހަގަކޮށްލެވެއެވެ.

ޑިސެމްބަރު 2018 ގައި މެންޗެސްޓަރ ޔުނައިޓެޑްގެ ކޯޗުކަމުން ދުރުކުރި ފަހުން، އެއްވެސް ކުލަބަކާއި ހަވާލުނުވެ ހުރި މޮރީނިއޯ، ޓޮޓެންހަމް އާއި ހަވާލު މިވީ 2023 ގެ ނިޔަލަށް ކަމަށް ޓޮޓެންހަމްގެ ނޫސްބަޔާނުގައި ވެއެވެ.

ކުޅުނު 12 މެޗުން ލިބުނު ލިބުނު 14 ޕޮއިންޓާއެކު ލީގުގެ 14 ވަނައިގައި އޮތް ޓޮޓެންހަމް ފަހަކަށްއައިސް ލީގުގައި ދައްކަމުން އަންނަނީ ދަށް ކުޅުމެއް ކަން ފާހަގަކޮށްލެވެއެވެ. އަދި ޔުއެފާ ޗެންޕިއަންސް ލީގުގައި ބަޔާން މިއުނިކް އަތުން 7-2 ގެ ނަތީޖާއަކުން ބަލިވުމުން ޓީމުގެ ހާލަތާއި މެދު ސަޕޯޓަރުން ކަންބޮޑުވުން ފާޅުކޮށްފައިވެއެވެ.

ތިން ފަހަރު ޕްރިމިއަރ ލީގު ކާމިޔާބުކޮށްފައިވާ މޮރީނިއޯ އަށް ލަންޑަން އަކީ އާ ތަނަކަށް ނުވާނެއެވެ. މީގެ ކުރިން ޗެލްސީ ގެ ކޯޗުކަމުގައި މޮރީނިއޯ ވަނީ 5 އަހަރު ހޭދަކޮށްފައެވެ. ” ބޮޑު ސަގާފަތަކާއި، ޖޯޝުން ފުރިގެންވާ ސަޕޯޓަރުން ތަކެއް ތިބި ކުލަބަކާއި، ގުޅުމުގެ ފުރުސަތު ލިބުމުން އަހަރެން މިހުރީ ވަރަށް އުފަލުން.” ޓޮޓެންހަމް އިން ނެރުނު ނޫސްބަޔާނުގައި މޮރީނިއޯ ބުނެފައިވެއެވެ.

ޓޮޓެންހަމްގެ ޗެއާމަން ޑެނިއަލް ލެވީ ބުނެފައިވާގޮތުގައި މޮރީނިއޯ އެ މަގާމަށް އައްޔަން ކުރީ އޭނާގެ ގެ ރެކޯޑަށާއި، ހޯދާފައިވާ ކާމިޔާބީތަކަށް ބަލައި، ޕޮޗެޓީނޯ ގެ ބަދަލުގައި ޓޮޓެންހަމް ގެ ކޯޗަކަށް ގެނައުމަށް އެންމެ ރަނގަޅު މީހަކަށް ފެނުނީ މޮރީނިއޯ ކަމަށްވުމުންނެވެ. ” މޮރީނިއޯ އައްޔަންކުރުމުން އަހަރެމެންނަށް މިލިބުނީ ދުނިޔޭގެ އެންމެ ކާމިޔާބު އެއް ފުޓްބޯޅަ ކޯޗް.” ޓޮޓެންހަމްގެ ބަޔާނުގައި އެކުލަބުގެ ޗެއާމަން ޑެނިއަލް ލެވީ ބުނެފައިވެއެވެ.

މޮރީނިއޯ އަކީ ތަފާތު ދެ ކުލަބެއްގައި ޔުއެފާ ޗެންޕިއަންސް ލީގު ކާމިޔާބުކޮށްފައިވާ ކޯޗެއް ކަން ފާހަގަކޮށްލެވެއެވެ. ޕޯޗުގަލްގެ ޕޯޓޯ އާއި އެކު 2004 ވަނަ އަހަރާއި، އިޓަލީގެ އިންޓަ މިލާން އާ އެކު 2010 ވަނަ އަހަރު މޮރީނިއޯ ވަނީ ޗެމްޕިއަންސް ލީގު ކާމިޔާބުކޮށްފައެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: