ޔަޒީދާގެ ދެކޮއްކޮ ކަމުގައިވާ ލަމްޔާ އާއި ލުހްޔާ، ކަމާލިޔާ ގޮވައިގެން ޔަޒީދާމެން އުޅޭގެއަށް އައީ އިރުއޮއްސޭން ކައިރިވުމުން ނެވެ. އިރުއޮއްސުމުގެ ތަންކޮޅެއް ކުރިން ކަމާލިޔާ ގެއަށް ގެންނަން ޔަޒީދާ ބުނެފައި އޮންނާތީ އެންމެން ވެސް އެކަމަށް ވަރަށްބޮޑު ސަމާލުކަމެއް ދެއެވެ. އެފަދަ މުހިންމުކަމެއް އެވަރުގެ ބޮޑު އިސްކަމެއް ދީގެން ކުރަމުންދާތީ އެންމެވެސް ޔަޒީދާއަށް ތަޢުރީފްކުރެއެވެ.

ގޭތެރެއަށް ވަންނަމުން ދޮންތާއޭ ގޮވާލިނަމަވެސް ޔަޒީދާގެ ޚަބަރެއް ނުވިއެވެ. ޖަވާބެއް ނުދިން ނަމަވެސް މިގަޑީ ޔަޒީދާ ބޭރަށް ނުދާނެކަން އެކުދިންނަށް ޔަގީނެވެ. ދެތިން ފަހަރަކު ގޮވާލުމުން ވެސް ޚަބަރެއް ނުވުމުން ތިންކުދިންނަށް ލިބުނީ ހައިރާންކަމެވެ. ކޮންމެވެސް ވަރަކަށް ސުވާލު އުފެދިފައި ތިބެގެން ތިންކުދިން ގޮސް ކޮޓަރި ބަލާލިއިރު ޔަޒީދާ އޮތީ ނިދާފައެވެ.

ކަމާލިޔާ ގޮވައިގެން އައި ވާހަކަ ބުނަން ޔަޒީދާއަށް ގޮވުމުން އެއްވެސް ޚަބަރެއް ނުވިއެވެ. ދެތިން ފަހަރަކު ގޮވާލުމުން ވެސް ޔަޒީދާގެ ޚަބަރެއްނުވިއެވެ. ޔަޒީދާއަކީ އެހާ ނިދިގަދަ މީހެއް ނޫނެވެ. ޔަޒީދާގެ އަތުގައި ހިފާ ދަމާލަމުން އޭނާއާ ދިމާއަށް ގުދުވި ސާދަ އަހަރުގެ ލަމްޔާ އަށް ކޮންމެވެސް އެއްޗެއް ވިސްނުނީ ކަންނޭނގެއެވެ. ކުއްލިއަކަށް ޔަޒީދާގެ އަތުން ދޫކޮށްލަމުން އަވަސް އަވަހަށް އޭނާއާ ދިމާއަށް ގުދުވިއެވެ.

މޫނު ކައިރިއަށް ޖެހިލަމުން ވަރަށް ރަނގަޅަށް ބަލާލިއެވެ. ޔަޒީދާ ނޭވާ ނުލާކަން ލަމްޔާ ޔަގީންކުރިއެވެ.

ކުއްލިއަކަށް ލަމްޔާ ރޮއިގަތް އަޑަށް ލުހްޔާ އާއި ކަމާލިޔާ ދިޔައީ ސިއްސައިގެންނެވެ. ލަމްޔާގެ ރުއިމުގެ އަޑަށް ކަމާލިޔާ ރޮއިގަތް ނަމަވެސް ލުމްހާ ހުރީ ވާނުވާ ނޭނގި ހުއްޓުން އަރާފައެވެ. ސުވާލުތަކުން ފުރިފައެވެ.

ވެގެން އުޅޭގޮތް ނާއިމަށް ޚަބަރުކުރީ ލަމްޔާ އެވެ. ލަމްޔާގެ ވާހަކަތަކާއި އޭނާގެ ކިބައިން ފާޅުވަމުން ދިޔަ ހިތާމަވެރި އަސަރުތަކުގެ ސަބަބުން ނާއިމް ހާސްވެ ކަންބޮޑުވިއެވެ. އަވަސް އަވަހަށް ގެއާ ދިމާއަށް ދުއްވައިގަތެވެ.

ނާއިމް އައިސް ބަލާލިއިރު ޔަޒީދާ ކުރިން ވެސް އޮތްގޮތަށް އެނދުމަތީގައި އޮތެވެ. ސުވާލުތައް ގިނަވީ އެހިސާބުންނެވެ. ނިދާފައި އޮތް މީހެއް ނަމަވެސް މިހާގިނައިރުވާންދެން އެއްގޮތަކަށް ނޯއްނާނެކަމަށް ނާއިމްގެހިތް ބުންޏެވެ.

މަޑުމަޑުން ކައިރިއަށް ޖެހިލަމުން ޔަޒީދާ ހަށިގަނޑަށް ނަޒަރުހިންގާލުމާއިއެކު ވެސް ނާއިމްގެ ސުވާލުތަކަށް ޖަވާބު ލިބުނެވެ. ޔަޒީދާ އޮތީ މަރުވެފައެވެ. ކުރިން އެވަރަށް ސަމާލުކަން ނުދެވުމުން ނޭނގުނީއެވެ.

ދެއަތުން ބޮލުގައި ހިފަހައްޓާލަމުން ރޮއިގަތުމާއިއެކު ނާއިމްގެ ދެފައިން ބާރުދޫވާން ފެށިއެވެ. މަޑުމަޑުން ތިރިވަމުން ތިރިވަމުން ގޮސް ފާރުބުޑު ގައި އިށީންދެވިއްޖެއެވެ. ފެނުނު މަންޒަރުން ކޮންމެވެސް އެއްޗެއް ވިސްނިގެން ކަހަލަގޮތަކަށް ކަމާލިޔާ ރޮމުން ރޮމުން ނާއިމް ގާތަށް ދާން މަސައްކަތްކުރިއެވެ. ހަދާނެގޮތް ހުސްވެ ހުއްޓުންއަރާފައި ލުހްޔާ ހުރީއެވެ.

ލަމްޔާ ނުކުމެގެން ދިޔަތާ ދިހަވަރަކަށް މިނިޓްތެރޭ ނާއިމްގެ އިތުރުން ދެފަރާތުގެ ޢާއިލާގެ އިސްމީހުން އެގެއަށް ގެނައެވެ. ލަމްޔާގެ ކުޅަދާނަކަމަށް އެންމެން ވެސް ތަޢުރީފް ކުރިއެވެ.

ފެނުނު މަންޒަރުން އެންމެ ބޮޑަށް އަސަރުކުރީ ޔަޒީދާގެ މަންމަ ގަޒާލިޔާ އަށެވެ. ހިތަށް ކެތްނުވެ ޚަބަރު ހުސްވެގެން އޭނާ ވެއްޓުނުއިރު އެންމެންގެ ފަރާތުން ވެސް ފެންނަމުންދިޔައީ ހިތާމަ އާއި ހިތްދަތިކަމެވެ. ދެލޮލުން ކަރުނަ ނުހިލޭ އެންމެ މީހަކު ވެސް ނެތެވެ. މިހާރުން މިހާރަށް ކުރަންޖެހޭ މަސައްކަތްތައް ކުރުމަށް ނާއިމްގެ ބައްޕަ ފާހިރު އަވަސްވެގަތްއިރު ނާއިމްގެ މަންމަ ނަރީމާ އުޅުނީ ނާއިމް ހަމައަކަށް އެޅުވޭތޯ އެވެ. ޔަޒީދާގެ މަރުގެ ސަބަބުން ނަރީމާއަށް ކުރި އަސަރު ކުޑައެއް ނޫނެވެ. ދަރިފުޅަށްޓަކައި ކެތްތެރިވެ ހަމަޖެހޭކަން ދެއްކީއެވެ. ޔަޒީދާގެ ބައްޕަ އާދަމް އާއި ދެކޮއްކޮ ދިޔައީ ކަމާލިޔާ އާއި ގަޒާލިޔާ ގޮވައިގެން ސިއްހީ މަރުކަޒަށެވެ.

ދެފަރާތުގެ ޢާއިލާ މެންބަރުންނާއި ހެޔޮއެދޭ ބައެއް ރައްޔިތުންގެ އެހީތެރިކަމާއެކު ޔަޒީދާ ހިނަވައި ކަފުންކޮށް ވަޅުލުމަށްޓަކައި ކުރަންޖެހޭ ކަންތައްތައް ކުރަމުންގެންދިޔައެވެ. ވަގުތުތައް ފާއިތުވަމުން ދިޔައިރު ވަގުތާއި ހާލަތާ އެއްގޮތަށް ނާއިމް ވެސް މަޑުމަޑުން ހަމައަކަށްއެޅެމުން ދިޔައެވެ. މިވަގުތަށް އެނޫންގޮތެއް ނެތްކަން ނާއިމަށް ވެސް ވިސްނުނެވެ.

ޔަޒީދާގެ މަރާއިއެކު ނާއިމްގެ ފިޔަވަޅުތަކަށް ހުއްޓުންއައި ކަހަލައެވެ. ކެއިން ބުއިމުން ދުރުހެލިވެ ނެގިމަޑުވެފައި އެތައް ދުވަހެއް ވާންދެން ހުއްޓެވެ. ދޭންވާ ސަމާލުކަމާއި ބަހައްޓަންވީ ފަރުވާތެރިކަން ނެތުމުގެ ސަބަބުން ވިޔަފާރި އަޑިއަޅާލިއެވެ. މުދާ ގެނައުމަށް ކުރަމުންދިޔަ ދަތުރުތަކަށް ހުއްޓުން އައެވެ. ދަރިފުޅަށް ދޭންވާ ސަމާލުކަން ވެސް އެންމެ ރަނގަޅަކަށް ނުދެވެއެވެ.

ދެފަރާތުގެ ޢާއިލާމެންބަރުންނާއި ހެޔޮއެދޭ ރައްޓެހިންގެ ނަސޭހަތްތަކާއި ވިސްނައިދިނުން ތަކުގެ ސަބަބުން ނާއިމް މަޑުމަޑުން ހަމައަކަށްއެޅެން ފެށިއިރު ދެތިންމަސް ފާއިތުވެގެން ހިނގައްޖެއެވެ.

 

ކުޑައިރުއްސުރެ އުޅެންޖެހުނު ނިކަމެތިކަމުން އަރައިގަތުމަށްޓަކައި، ދަހިވެތިކަމާއެކު މުއްސަނދިންގެ ފިޔަވަޅުތަކަށް ފާރަލަމުން ބަލަމުންދާ ނާޖިދާ އަކީ އުމުރުން ނަވާރައަހަރުގެ ޒުވާނެކެވެ. ރަށުގެ ޒުވާން އަންހެންކުދިންނަށް ބަލާއިރު ރީތިކުދިންގެ ލިސްޓްގެ ކުރީކޮޅުން ޖާގަލިބޭ ފަދަ ހިތްގައިމު ރީތި ހަށިގަނޑެއްގެ ވެރިއެކެވެ. ކުލަ އަލި ހެދިހުރި އަންހެންވަންތަ ފުރިހަމަ ހަށިގަނޑާއި އިސްކޮޅާއި ރޫފަ ގުޅެއެވެ. ބައްޓަން ރީތިވެފައި ވަނާތައް ގުޅެއެވެ.

ލޯބީގެ އެތައް ހުށަހެޅުމަކާއި އެތައް ދަޢުވަތެއް މެދުނުކެނޑި ލިބެމުންދިޔަ ނަމަވެސް، އެއިން އެއްވެސްކަމަކަށް ސަމާލުކަންނުދީ ނާޖިދާ ހުރުމުގެ އެންމެބޮޑު ސިއްރަކީ ވެސް އޭނާގެ ހިތުގައިވާ އަމިއްލަ އެދުމެވެ. އެފަދަ އަތްމަތި ތަނަވަސް ބައިވެރިއެއްގެ ދަޢުވަތު ނުލިބުމެވެ. އެނޫން ގޮތަކަށް އޭނާ ގުޑައެއް ނުލާނެއެވެ. މި ނިކަމެތިކަމާއި ހިތްދަތިކަމުގައި އަބަދު އުޅުމަކީ އޭނާ ބޭނުންވާގޮތެއް ނޫނެވެ. ކޮންމެވެސް ދުވަހަކުން އުފަލާއި އަރާމުގައި ދިރިއުޅުމަކީ އޭނާގެ އަބަދުގެ ވެސް އުންމީދެވެ.

ޔަޒީދާ މަރުވުމާއިއެކު ނާޖިދާގެ އަމާޒަކަށްވީ ނާއިމްއެވެ. އޭނާއަށްވުރެ ސާދަވަރަކަށް އަހަރު ދޮށިވެފައި ދަރިއަކު ހުރި ނަމަވެސް ނާޖިދާގެ މައްސަލައެއް ނެތެވެ. މުއްސަނދިކަމާއި ތަނަވަސްކަމުގައި އުޅެވޭނެއެވެ. ބޭނުން އިރަކު ބޭނުން އެއްޗެއް ބޭނުން ވަރަކަށް ލިބިފައި އަރާމު ދިރިއުޅުމެއް ލިބޭނެއެވެ. ދޮންމަންމަ އަކަށް ވާންޖެހުނަސް އެކުއްޖާ ބަލާކަށް ވެސް މިހާރަކު މާއުނދަގުލެއް ނުވާނެއެވެ. ކައިވެންޏަށްފަހު އެކަމަށް ހައްލެއް ގެނެވިދާނެއެވެ.

ލަދަކާހުރެ ތަދެއް ނުފިލާނެކަން ނާޖިދާއަށް އަބަދުވެސް ގަބޫލުކުރެވެއެވެ. ބޮއްކުރާދޮށަށް އޮޑި ކަނބާން ލަދުން އުޅުނު ޒަމާން މާޒީއާއެކުވެ ހިނގައްޖެއެވެ. މިހާރަކީ އެޒަމާނެއް ނޫނެވެ. އަންހެނުންނާއި ފިރިހެނުން ހަމަހަމަކަމަށް މުޅިދުނިޔެ ގޮވަމުންދާ ޒަމާނެވެ. ހުށަހެޅުމެއްގެ ހުރި ބުރަދަނެއް ވެސް އެނގޭނީ ހުށަހެޅީމާތާއެވެ.

ވަގުތަކަށް ބަލަމުން ފާރަލަމުން ދިޔަ ނާޖިދާގެ ވިސްނުން ކިތަންމެހާ ވެސް މޮޅެވެ. ވަޒީފާއެއް ހޯދުމުގެ ނަމުގައި ނާއިމްގެ ފިހާރައަށް ދިޔަ ނާޖިދާގެ ފުރަތަމަ ރޭވުން ވެސް ކާމިޔާބެވެ. ވަޒީފާ ހަމަޖެހި ނާއިމްގެ ކައިރީ މަސައްކަތްކުރުމުގެ ފުރުސަތު ލިބުނެވެ. ވަޒީފާ ލިބުމުން ނާޖިދާގެ މޫނުމަތިން ފާޅުވެގެންދިޔަ ހިނިތުންވުމުގެ ފަހަތުގައި ފޮރުވިފައިވާ ސިއްރެއް ވާކަމެއް އޭނާ ފިޔަވާ އެހެންމީހަކަށް ނޭނގެއެވެ. ނާއިމްގެ ހެޔޮކަމަށް ނާޖިދާ ޝުކުރުއަދާކުރިއެވެ.

ވަގުތާއި ހާލަތަށް އިސްކަންދީ ފިޔަވަޅަކަށްފަހު ފިޔަވަޅެއް ނާއިމްއާ ކައިރިއަށް އަޅަމުންދިޔަ ނާޖިދާގެ ރޭވުން ކާމިޔާބުވަމުންދިޔަ އެވެ. ނާއިމްގެ ފަރާތުން ނާޖިދާއަށް ލިބެމުންދިޔަ ސަމާލުކަމާއި ގާތްކަން އިތުރުވަމުންދިޔައެވެ.

ޔަޒީދާގެ މަރާއިއެކު ކުއްލިއަކަށް ކަހަލަގޮތަކަށް ނާއިމްގެ ފިހާރައިގެ ވަޒީފާއަށް ނާޖިދާ ދިއުމުގެ ފަހަތުގައި ފޮރުވިފައިވާ ސިއްރެއް ވާނެކަމަށް ބައެއްމީހުން ބުނަމުންދިޔަ ނަމަވެސް އެއިން އެއްވެސް ކަމަކަށް ނާޖިދާ ސަމާލުކަމެއް ނުދެއެވެ. ނާޖިދާ ބުނަމުންދަނީ އޭނާ ވެސް އާމްދަނީއެއް ލިބޭ ކަހަލަ މަސައްކަތެއް ކުރަން ބޭނުންވާ ކަމަށާއި އޭނާ ކުރަނީ އެމަސައްކަތް ކަމަށެވެ. ނާއިމް އަކީ އޭނާއާ އެކަށީގެންވާ ވަރަށްވުރެ އަތްމަތި ތަނަވަސް އޭނާ އަށްވުރެ އުމުރުން މާދޮށި މީހެއް ކަމަށެވެ. ފާޑުފާޑުގެ ވާހަކަ ދައްކައި ރަށުތެރޭގައި އަޑު ނުފެތުރުމަށާއި އޭނާގެ ވަޒީފާ ގެއްލުވާލަން ނޫޅުމަށެވެ.

 

ދުވަހުގެ ހަވީރު ވަގުތެވެ. ދަރިފުޅު ކަމާލިޔާ ގޮވައިގެން ނާއިމް ޕާކަށްދިޔައީ ޕާކަށް ގޮސްލަން ކަމާލިޔާ އެދޭވަރުންނެވެ. ޔަޒީދާގެ އެންމެގާތް އެކުވެރިންގެ ތެރޭގައި ހިމެނޭ ސާނިހާ އާއި ނާއިމް ބައްދަލުވީ ޕާކުތެރެއިންނެވެ. ސާނިހާ އުޅުނީ އޭނާގެ ދެކުދިން ގޮވައިގެންނެވެ. އެންމެ ކުޑައިރުއްސުރެ ފެށިގެން މިއަދާއި ޖެހެންދެން ވެސް ކަމާލިޔާއާ މެދު ގާތްގޮތެއް ބަހައްޓާ ސާނިހާ ވެގެން ގޮސްފައިވަނީ ޔަޒީދާ ފަދައިން ކަމާލިޔާ އަށް ވެސް ވަރަށް ހާއްސަ މީހަކަށެވެ. ސާނިހާ ފެނުމާއެކު ކަމާލިޔާ ގޮސް އޭނާއާ ބައްދާލާ ވާހަކަދައްކަން ފެށިއެވެ.

“މިހިރީ ހަމަ ޔަޒީދާ ….. މަގޭ ބެސްޓް ފުރެންޑް.” ލޯތްބާއި އޯގާތެރިކަމާއެކު ކަމާލިޔާގެ ބޮލުގައި ފިރުމާލަމުން ސާނިހާ ބުންޏެވެ. ސާނިހާގެ އެޖުމްލައާއެކު ނާއިމްގެ މޫނުމައްޗަށް ވެރިވެގެންދިޔަ ހިތާމަ އާއި ހިތްދަތިކަން ސާނިހާއަށް ފާހަގަކުރެވުނެވެ. ޔަޒީދާގެ މަރުގެ ސަބަބުން ނާއިމަށް ކޮށްފައިވާ އަސަރަކަށް ބަދަލެއް ނާދެއެވެ.

އިތުރު ކައިވެންޏެއްކޮށް ކަމާލިޔާ އަށް މަންމައެއްގެ ލޯބި ހޯދައިދިނުމާއި ބެހޭގޮތުން ސާނިހާ ދެއްކި ވާހަކަތަކާއިމެދު ނާއިމް ވަރަށް ވިސްނިއެވެ. އެކަމާ ބެހޭގޮތުން ސާނިހާ ދެއްކި ވާހަކަތައް ކިތަންމެހާ ވެސް މުހިންމުވެފައި ރަނގަޅެވެ. އެކަންކުރުން އަވަސްކުރުން މުހިންމު ފަދައިން އެކަމުގައި ކަމާލިޔާ އަށް އެންމެ ރަނގަޅުގޮތް ވެސް އެހާމެ މުހިންމެވެ. ޔަޒީދާ ފަދަ ދެވަނަ މީހަކު ނުލިބޭނެކަމަށް ނާއިމްގެ ހިތް އަބަދު ވެސް ބުނެއެވެ. ޔަޒީދާއެއް އެނބުރި ނާއްނާނެއެވެ. ޔަޒީދާއަށްޓަކައި މިހާރު ނާއިމަށް ކޮށްދެވޭނެ އެންމެބޮޑު ހެޔޮކަމަކީ ކަމާލިޔާ އާމެދު އޭނާ ދެކެމުންދިޔަ ހުވަފެންތައް ޙަޤީޤަތަކަށް ހެދުމަށް މަސައްކަތް ކުރުމެވެ.

އިތުރުކައިވެންޏެއް ކުރުމާބެހޭގޮތުން ނާއިމް ދައްކަމުންދިޔަ ވާހަކަތަކަށް ޚިޔާލެއްދިނީ އޭނާގެ އެކުވެރިންގެ ތެރޭގައި ހިމެނޭ މަހްދީ އެވެ. މަހްދީގެ އެ ޚިޔާލާއިއެކު އެކަމުގައި އޭނާ އުޅެދޭނެކަމާއި އެކަން ކާމިޔާބުވާނެކަމުގެ ޔަގީންކަން ބޮޑުކަމަށް ވެސް ބުންޏެވެ. ޔަޒީދާ ވަރު ނުވިޔަސް ރަނގަޅުވާނެކަމަށް ފެންނަކަމަށް ވެސް ބުންޏެވެ.

ނާޖިދާއާ ކައިވެނިކުރަން ނާއިމް ބޭނުންވާ ވާހަކަ މަހްދީ ބުނުމާއިއެކު ނާޖިދާގެ މޫނުމަތިން ހިތްހަމަނުޖެހުން ފާޅުވެގެންދިޔައެވެ. ފޫހިކަމާއެކު މަހްދީގެ މޫނަށް ބަލާލަމުން ތުން އަނބުރާލިއެވެ. ނާއިމްއާ ކައިވެނިކުރަން އެއްވެސް ވަރަކަށް އޭނާ ބޭނުންނުވާކަން މަހްދީއަށް އަންގާލި އެވެ. ނާއިމްއަކީ އޭނާއަށްވުރެ މާ ދުވަސްވީ މީހެއްކަމާއި ޅަކުދިން ފަހަތުން ނުދުވެ އޭނާއާ އެއްއުމުރުގެ މީހެއް ހޯދުމަށް ނަސޭހަތްދިނެވެ. އޭނާއަކީ މިހާރުގެ ޅަކުއްޖެއްކަމާއި އުމުރުގެ އެންމެ ތާޒާ ޒުވާން ދުވަސްވަރު ދޮންމަންމައަކަށް ވާން އެއްވެސް މީހަކު ބޭނުންނުވާނެ ކަމަށް ބުންޏެވެ. އެފަދަ އެތައް ވާހަކައެއް ދެއްކިއެވެ.

ނާޖިދާއާ ވާހަކަދެއްކުމުން ނާޖިދާ ދެއްކި ވާހަކަތައް ނާއިމް އަކަށް މަހްދީ ކިޔައެއްނުދެއެވެ. ލިބުނު މާޔޫސްކަމެއްގެ ބޮޑުކަމުން އެ ވާހަކަތައް ދައްކަން ނުކެރުނީއެވެ.

މަހްދީގެ ވާހަކަތަކާމެދު ވިސްނާ ބޭކާރު ވަގުތުތަކެއް ދުއްވާލުމުގެ ބޭނުމެއްނެތެވެ. ލިބުނީ އެދިއެދިހުރި ފުރުސަތެވެ. ދެން އޮތީ ނާޖިދާ އާނ ބަސްބުނުމެވެ. ނާޖިދާގެ އާނ ބަސް ލިބުމާއެކު ނާއިމްގެ މަސައްކަތް ފަށާނެއެވެ.

ނުނިމޭ

ލިޔުންތެރިޔާގެ ފުރަމަލަ

މުޙައްމަދު މުނީރު (ނީރު)
މުޙައްމަދު މުނީރު (ނީރު)
ވާހަކަ ލިޔުމުގައި ގަލަން ނަމަކަށް "ނީރު" ބޭނުންކުރާ މުޙައްމަދު މުނީރަކީ ހުނަރުވެރި ވާހަކަ ލިޔުންތެރިއެކެވެ. ވާހަކަފޮތްތައް ކަރުދާހުގައި ޗާޕްކޮށްފައިވެސް ވެއެވެ.

ގުޅުންހުރި ލިޔުން: