އިންޑިއާ ކެރެލާ ސްޓޭޓްގެ ޑައިރެކްޓަރ ބޭނަޒީރު މުޚްތާރު ރާއްޖޭގައި ހަދާ ފުރަތަމަ ފިލްމު “މާސްޓާރމައިންޑް” މިއަދު ލޯންޗްކޮށްފިއެވެ. މި ފިލްމަކީ ‘މައި މޯލްޑިވްސް ޕްރޮޑަކްޝަން’ އިން އުފައްދާ ފުރަތަމަ ދިވެހި ފިލްމެވެ.

މިއަދު ހަވީރު ސަލްސާ ރޯޔަލްގައި ފިލްމު ލޯންޗް ކުރުމަށް ބޭއްވި ޚާއްޞަ އިވެންޓްގައި ފިލްމުގެ ކާސްޓުން ފިލްމަށް ސޮއެކުރުމާއި ފިލްމާ ބެހޭ މަޢުލޫމާތުތައް ނޫސްވެރިންނަށް ހިއްސާކުރުން ކުރިއަށް ގެންދިޔައެވެ. މި އިވެންޓްގައި ފިލްމުގައި ހަރަކާތްތެރިވާ ގިނަ ކާސްޓުންނާއި ފިލްމުގެ ޑައިރެކްޓަރ ބޭނަޒީރު އާއި އޭނާގެ ފިރިމީހާ އަދި މި ފިލްމުގެ ޕްރޮޑިއުސަރ ބައިވެރިވިއެވެ.

ބޭނަޒީރު ބުނީ މި ފިލްމުގެ ޝޫޓިން މިއަހަރު ޑިސެމްބަރު 17 ގައި ފަށާނެކަމަށާއި މަސް ދުވަސްތެރޭގައި ޝޫޓިން ނިންމުމަށް މަސައްކަތްކުރާނެ ކަަމަށެވެ.

ފިލްމު ރިލީޒްކުރުމަށް ނިންމާފައިވަނީ 2020 ވަނަ އަހަރު ފެބްރުއަރީ 14 ގައެވެ.

ފިލްމު “މާސްޓަރމައިންޑް” ލޯންޗިންގައި ޔޫއްޕެ. ޓޮމް އަދި ބޭނަޒީރު – ފޮޓޯ: ޝަފީޤް

މި ފިލްމުގައި ހަރަކާތްތެރިވާ ކާސްޓުންގެ ތެރޭގައި ޔޫސުފް ޝަފީއު (ޔޫއްޕެ)، މުޙައްމަދު މަނިކް، ޝީލާ ނަޖީބް، އައިމިނަތު ރިޝްފާ، އަމަން އަލީ (ޓޮމް) ގެ އިތުރުން އަލީ އާޒިމް (ދޮން އައްޔަ) އާއި ޢަލީ ޝަމީލް، މަރިޔަމް ޝަހުޒާގެ އާއި ލަހުފާ (ލަހޫ) ވެސް މި ފިލްމުން ފެނިގެންދާނެއެވެ. މީގެ ތެރެއަށް ބައެއް ކާސްޓުން އިތުރުވެގެންދާނެކަން މިއަދުގެ އިވެންޓްގައި ހާމަކޮށްފައިވެއެވެ.

މި ފިލްމުގެ މަންޒަރުތައް ނަގަން ނިންމާފައިވަނީ، މިވަގުތު ބޭނަޒީރާއި އޭނާގެ އާއިލާ ދިރިއުޅެމުން އަންނަ އައްޑޫ ސިޓީގައެވެ.

މީގެ ކުރިން ތަމަޅަ ފިލްމެއްގެ ޑައިރެކްޝަންގައި ބޭނަޒީރު މަސައްކަތްކޮށްފައި ވެއެވެ.

ލޯންޗުކުރުމަށް ބޭއްވި އިވެންޓްގެ ތެރެއިން – ފޮޓޯ: ޝަފީޤް

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: