އަންނަ ޑިސެމްބަރު މަހު 1ވަނަ ދުވަހުންފެށިގެން 10ވަނަ ދުވަހުގެ ނިޔަލަށް ނޭޕާލްގައި ބޭއްވުމަށް ހަމަޖެހިފައިވާ 13 ވަނަ ސައުތު އޭޝިއަން ގޭމްސް ގައި ވާދަކުރާ ގައުމީ ޓީމްތައް، ތަމްރީނުތައް ހެދުމަށް ގައުމުތަކުގައި ކޭމްޕް ކުރުމަށް ފުރަންފަށައިފިއެވެ.

ސައުތު އޭޝިއަން ގޭމްސް ގައި ވާދަކުރާ އަންހެން ފުޓްބޯޅަ ޓީމު ތަމްރީންތައް ހެދުމަށް މިއަދު ދުބާއީ އަށް ވަނީ ފުރާފައެވެ. އަންހެން ފުޓްބޯޅަ ޓީމު މިއަދު ތަމްރީނުތަކަށް ފުރިއިރު، ޓީމަށް އިރުޝާދު ދިނުމަށް ހަމަޖެހިފައިވަނީ ތަޖުރިބާކާރު ދެ ކޯޗުން ކަމަށްވާ އިސްމާއީލް އަނިލް އާއި އަހުމަދު ނާޝިދު (ނާދު) އެވެ. ޓީމުގެ ހެޑް ކޯޗުގެ ގޮތުގައި ނާދު ހަމަޖައްސާފައިވާއިރު އަނިލް ހަމަޖައްސާފައިވަނީ އެސިސްޓެންޓް ކޯޗުގެ މަގާމަށެވެ. ސައުތު އޭޝިއަން ގޭމްސް އަށް ގައުމީ އަންހެން ފުޓްބޯޅަ ޓީމު ނޭޕާލަށް ދިއުމަށް ހަމަޖެހިފައިވަނީ ދުބާއީ އިންނެވެ. ސައުތު އޭޝިއަން ގޭމްސްގައި ވާދަކުރާ 23 އަހަރުން ދަށުގެ ފިރިހެން ފުޓްބޯޅަ ޓީމު އެކުލަވާލުމުގެ މަސައްކަތް އެފްއޭއެމުން މިހާރު އަންނަނީ ކުރަމުންނެވެ.

ޤައުމީ އަންހެން ފުޓްބޯޅަ ޓީމު – ފޮޓޯ: އެފްއޭއެމް

ސައުތު އޭޝިއަން ގޭމްސްގައި ވާދަކުރާ ގައުމީ އަންހެން ބާސްކެޓްބޯޅަ ޓީމު، ތަމްރީނުތައް ހެދުމަށްޓަކައި މި މަހުގެ 17 ވަނަ ދުވަހު ޗައިނާ އަށް ވަނީ ފުރާފައެވެ. ޗައިނާގައި އަންހެން ބާސްކެޓްބޯޅަ ޓީމު ތިން މެޗު ކުޅުމަށް ހަމަޖެހިފައިވާއިރު، މި ތަމްރީނުތަކުން ރަނގަޅު ތަޖުރިބާތަކެއް ލިބިގެންދާނެކަމަށް އަންހެން ބާސްކެޓްބޯޅަ ޓީމުގެ ކޯޗު ސުޕުން ވިމާލް ވަނީ ފާހަގަކޮށްފައެވެ. ގައުމީ އަންހެން ބާސްކެޓްބޯޅަ ޓީމާއެކު ގައުމީ ފިރިހެން ބާސްކެޓްބޯޅަ ޓީމް ވެސް ޗައިނާގައި ކޭމްޕް ކުރުމަށް ވަނީ ހަމަޖެހިފައެވެ. ފިރިހެން އަދި އަންހެން ބާސްކެޓްބޯޅަ ޓީމު ވެސް ސައުތު އޭޝިއަން ގޭމްސް އަށް ނޭޕާލް އަށް ފުރުމަށް ހަމަޖެހިފައިވަނީ ޗައިނާ އިންނެވެ.

ގައުމީ އަންހެން ބާސްކެޓް ޓީމް – ފޮޓޯ: ބާސްކެޓް ބޯލް އެސޯސިއޭޝަން

ސައުތު އޭޝިއަން ގޭމްސް ގައި ވާދަކުރާ ފިރިހެން އަދި އަންހެން ވޮލީބޯޅަ ޓީމު ތަމްރީންތައް ހެދުމަށް މި މަހުގެ 19 ވަނަ ދުވަހު ލަންކާ އަށް ވަނީ ފުރާފައެވެ. ސައުތު އޭޝިއަން ގޭމްސް ރަސްމީކޮށް ފަށާނީ ޑިސެމްބަރު މަހުގެ އެއް ވަނަ ދުވަހުގައި ނަމަވެސް، މިމަހުގެ 27 ވަނަ ދުވަހު ވޮލީބޯޅަ މުބާރާތް ފެށުމަށް ހަމަޖެހިފައިވާތީ ރާއްޖޭގެ އަންހެން އަދި ފިރިހެން ވޮލީބޯޅަ ޓީމު މާދަމާ ލަންކާ އިން ނޭޕާލަށް ދާގޮތަށް ވަނީ ހަމަޖެހިފަ އެވެ.

ގައުމީ ފިރިހެން އަދި އެންހެން ވޮލީ ޓީމް – ފޮޓޯ: ވޮލީބޯލް އެސޯސިއޭޝަން

ސައުތު އޭޝިއަން ގޭމްސްގެ ބެޑްމިންޓަންގައި މިފަހަރު ރާއްޖެ އިން ވާދަކުރާނީ ހަމައެކަނި އަންހެން ޓީމު ކަމަށް ބެޑްމިންޓަން އެސޯސިއޭޝަނުން މަޢުލޫމާތު ދީފައިވެއެވެ. ނޭޕާލަށް ދިއުމުގެ ކުރިން ތަމްރީނުތައް ހެދުމަށްޓަކައި މާދަމާ ގައުމީ އަންހެން ބެޑްމިންޓަން ޓީމު އިންޑިއާއަށް ފުރާގޮތަށް ވަނީ ހަމަޖެހިފައެވެ. އަދި އިންޑިއާގެ ފާހަގަކޮށްލެވޭ ބައެއް ބެޑްމިންޓަން ކުޅުންތެރިންނާއެކު ރާއްޖޭގެ ކުޅުންތެރިން މެޗުތަކެއް ކުޅުމަށް ވަނީ ހަމަޖެހިފައެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: