އޮފީސް ޑްރާމާ މުބާރާތުގެ ޑްރާމާ ތަކުގެ ތެރެއިން އެމްޑަބްލިއުއެސްއީ ގެ ޑްރާމާ ބަލަމުން ދިޔައިރު ފިލްމުގެ ބަޠަލް ބައި ކުޅު އެކްޓަރުގެ އެކްޓިން ފެނިފައި ގިނަބަޔަކު ހައިރާން ކޮށްލި އެވެ. އެކްޓިން އަކަށްވުރެން ބޮޑަށް ފެންނަމުން ދިޔައީ ވަރަށް އަސްލާއި އެއްގޮތް ޙަރަކާތްތަކެކެވެ. ފާތުމަތު ނަހުލާ ގެ ފިލްމު ކުންފުނިން މިހާރު އުފައްދަމުން ގެންދާ ‘ނަހޫ ސްޓައިލް’ ގެ އަސަރުގަދަ ލޯބީގެ ފިލްމު ‘ބޮސް’ ގެ ލީޑް އެކްޓަރަކަށް ހަމަޖައްސާފައި މިވަނީ މުހައްމަދު ޔުނާނު ކަން މިވަނީ މި ފިލްމު އިޢުލާނުކުރި ރަސްމިއްޔާތުގައި ހާމަކޮށްފަ އެވެ.

މުޙައްމަދު ޔުނާން އަކީ ފީޗަރ ފިލްމަށް މުޅިން އާ މޫނަކަސް ފިލްމީ މަސައްކަތަށް އާ ފަންނާނެއް ނޫނެވެ. މީގެ ކުރިން ޔުނާން ވަނީ އޮފީސް ޑްރާމާ މުބާރާތުގައި ޑްރާމާ ކުޅެފައެވެ. ޔުނާން މަސައްކަތް ކުރަމުން އަންނަ އޮފީހުން 2016 ވަނަ އަހަރު ބައިވެރިކުރި ޑްރާމާ ގައި ޔުނާން ވަނީ ޙަރަކާތްތެރި ވެފަ އެވެ. މީގެ އިތުރުން މިއަހަރު ފެނިގެންދިޔަ ޑްރާމާ ގެ ލީޑް ރޯލް ކުޅެފައިވަނީވެސް ޔުނާން އެވެ.

އުމުރުން 26 އަހަރުގެ މުޙައްމަދު ޔުނާން އުފަންވެފައިވަނީ 26 މެއި 1991 ގައި ގދ. ހޯނޑެއްދުއަށެވެ. މިއަދު  ޔުނާން އަކީ އަކީ ޒުވާން ބައްޕަ އެކެވެ. ޔުނާން އަކީ ކުރެހުމަށްވެސް ޝައުޤު ހުންނަ އަދި އެކަމުގެ ހުނަރު ލިބިފައިވާ ޒުވާނެއްކަން ޔުނާން ކުރަހާފައިވާ ބައެއް ކުރެހުންތަކުން އެނގެއެވެ.

ޔުނާން ކުރަހާފައިވާ ކުރެހުމެއް ފޮޓޯ: ޔުނާން ގެ ފޭސްބްކް އިން

މި އަހަރު އެމްޑަބްލިއުއެސްސީން ގެނެސް ދިން ޑްރާމާ “މަންޒިލް” ގައި ޔުނާން ކުޅެފައިވަނީ ޒިންމާދާރު ކަމެއް ނެތް ފިރިހެން ދަރިއަކު، ފަހުން ވަރަށް ޒިންމާދާރު ޒުވާނަކަށް ބަދަލުވެގެންދާ ގޮތް ދައްކައިދޭ އެ ޑްރާމާގެ މުޅި ވާހަކަ އޮތީ ޔުނާނަށެވެ. މި ޑްރާމާގައި ޔުނާން ވަނީ ވަރަށް ފުރިހަމަ އެކްޓިންއެއް ދައްކައިފަ އެވެ. ޚާއްސަކޮށް އޭނާގެ ޑައިލޮގް ޑެލިވަރީ އާއި ހާލަތްތަކާ ގުޅުވައިގެން ގެނެސް ދީފައި ހުރި އެކްސްޕްރެޝަންތައް ވަރަށް ފާހަގަކޮށްލެވެ އެވެ.

އެމްޑަބްލިޔޫއެސްއީ ގެ ޑްރާމާ ‘މަންޒިލް’ ގެ މަންޒަރެއްގައި ޔުނާން ފޮޓޯ: ޔުނާން ގެ ފޭސްބްކް އިން

ލޯތްބާއި ހިތާމައިން ފުރިގެންވާ މި ފިލްމަށް އާ ތަރިއެއް ހަމަޖައްސެމުން ގިނަ ބަޔަކުވަނީ އެކަމާ ހައިރާން ވެފަ އެވެ. ފިލްމުގެ ޑައިރެކްޓަރަކީ މި ދާއިރާގައި އެންމެ ފާހަގަކޮށްލެވޭ އެއް ނަން ކަމަށްވާ އައިޝަތު ރިޝްމީ އެވެ. ފިލްމުގެ ބައެއް މަންޒަރުތައް މިހާރު ޝޫޓްކޮށްފައި ވާއިރު، ކޮއްކޮ އައްޒަ އާއި ޔުނާނުގެ ކެމިސްޓްރީ އެއްމެ ރަނގަޅަށް ފާހަގަވެފައި ވާނެ އެއް ފަރާތަކީ ރިޝްމީ އަށެވެ.

އައްޒަ އާއި ޔުނާން އާއިއެކު މި ފިލްމުން ދެން ފެނިގެންދާނީ ފާތިމަތު އާޒިފާ، އަލީ އާޒިމް، އިބްރާހިމް ޖިހާދު އަދި އަލީ ޝަމީލް އެވެ.

ބޮސް ގެ ރަސްމީ ޕޯސްޓަރުގައި އައްޒަ އާއި ޔުނާން

އަންނަ އޮކްޓޫބަރު 24 ގައި މި ފިލްމު ރިލީޒް ކުރުމަށް ހަމަޖެހިފައިވާއިރު، މިހާރުވެސް ނަހުލާ ގެ ފިލްމުތަކަށް ސަޕޯޓްކުރާ ފޭނުންނާއި ދިވެހި ފިލްމުތަކަށް ލޯބިކުރާ ފަރާތްތަކުން ތިބޭނީ ކެތްމަދުވެފައިކަން ޔަޤީން ކުރެވެނީ ނަހުލާ އެއްމެ ފަހުން އުފެއްދި ނަހޫ ސްޓައިލް އާއި މުޅިން ތަފާތު ފިލްމަށް ލިބުނު ބޮޑު ތަރުހީބަށް ބަލާފައެވެ. އަދި ވަކިން ޚާއްޞަކޮށް ނަހުލާ އުފައްދާ ނަހޫ ސްޓައިލް ގެ ފިލްމުތަކަށް ލިބިފައިވާ ބޮޑު ތަރުހީބަށްވެސް ބަލާފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: