މި ދުނިޔެމަތީގައި އާރާއި ބާރު އެއީ الله ތަޢާލާ އިރާދަކުރައްވާ މިންވަރަކަށް އެކަލާންގެ އިރާދަކުރައްވާ އަޅަކަށް ދެއްވާ އެއްޗެކެވެ. އެއްވެސް ހާލެއްގައި ތިމާގެ މޮޅު ކަމަކުން ނުވަތަ ތިމާއަތުގައި ފައިސާ ގިނަވެގެން ހޯދޭ އެއްޗެއް ނޫނެވެ. އެކަން މި މުޖްތަމަޢަށް ބެލިނަމަވެސް ދިމާއަށް އެ ހުރީ ފެންނާށެވެ. ރުފިޔާ ފައިސާގެ މަހުޖަނުން އެކަމަށް ކުރިމަތިލައި ނޫޅޭ ހެއްޔެވެ؟ ޢިލްމީ ބޭފުޅުން އެ މަޤާމުތަކަށް އަންނަން މަސައްކަތް ނުކުރޭހެއްޔެވެ؟ އެކަމަކު އެކަން ކާމިޔާބުވި ހެއްޔެވެ؟
ބާރުލިބޭ ދުވަހު އެ ބާރު ހެޔޮގޮތުގައި ބޭނުން ނުކޮށް، އާރާއިބާރުގެ މަތީގައި ތާއަބަދު ތިބޭވޭނެކަމަށް ދެކި އެކަމަށް މަގުފަހި ކުރި ނަމަވެސް އެ ވަގުތު ޖެހުމުން އެކަން ބަދަލުވެގެން ދެއެވެ. ބާރެއް ލިބޭ ދުވަހު އަނިޔާވެރިކަމާއި ބޭއިންސާފުގެ މަގު އިސްނުކުރާށެވެ. މި ދުނިޔެ ދޫކޮށް ދާންޖެހޭނެކަން ހިތަށް ގެނެސް ޒާތީ ހަސަދަ ތަކުން ދުރުހެލިވުމަށް މަސައްކަތް ކުރާށެވެ.
ﷲ ތަޢާލާ އިންސާނާ އަށް ވެރިކަން ދެއްވުމުން އެކަމަށް ޤައްދާރުވި ކިތައްކިތައް މީހުން ނިކަމެތި ކުރައްވައި އެ ބާރު ގެންދަވާފައި ވޭ ހެއްޔެވެ؟ އިއްޔެ ފައިސާގެ މަތީގައި އުދުހުނު ނަމަވެސް މިއަދު ނިކަމެތިވެ ފަގީރުވެފައި ވަނީ އޭގެތެރެއިން ކިތައް މީހުން ހެއްޔެވެ؟ އިއްޔެ ނުހައްޤުން މީހުންނަށް އަނިޔާވެރިވި ކިތައްކިތައް މީހުން ޖަލުގެ ތޭރިތަކުގެ ތެރޭގައި ވޭ ހެއްޔެވެ؟ މިފަދަ އެތައް ކަމެކެވެ. ނަމަވެސް ވިސްނައި ފިކުރުކުރާ ބަޔަކަށެވެ. މިއީ އިއްޔެ އާއި މިއަދު ވެސް ދުނިޔެ ދެކެމުން އަންނަ ހަޤީޤަތެވެ.
ހިތާމައަކީ ބާރެއް ލިބޭ ދުވަހު އެއީ ވަގުތީ އެއްޗެއްކަން އިހުސާސް ނުކުރެވުމެވެ. އެންމެ ހެޔޮއެދޭ މީހާއަށް ވެސް ގައްދާރުވެވުމެވެ. ހެޔޮ ނަސޭހަތެއް ދޭ މީހާވެސް އެއީ އަދުއްވުން ކަމުގައި ދެކެވުމެވެ. އަމިއްލަ އެދުންތަކުން އެއްކިބާވެ އިންސާނާ ޚަލްޤު ކުރައްވައި ދުނިޔެއަށް ފޮނުވުނު މަގުސަދާއި މެދު ވިސްނައިލަމާ ހިނގާށެވެ. الله ތަޢާލާ ވަޙީ ކުރައްވާފައި ވެއެވެ. وَمَا خَلَقْتُ الْخِنَّ وَالْاِنْسَ إِلاَّلِيَعْبُدُوْنِ (الذاريات 56) މާނަ: ތިމަން ރަސްކަލާނގެއަށް އަޅުކަން ކުރަން މެނުވީ ތިމަން ރަސްކަލާނގެ ޖިންނީންނާއި އިންސީން ނުހައްދަވަމެވެ
ލިޔުންތެރިޔާގެ ފުރަމަލަ
- މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.
މި ލިޔުންތެރިޔާގެ ބައެއް އެހެން ލިޔުންތައް
- 24 ޖެނުއަރީ 2024ރިޕޯޓްބަރުދަން އިތުރުވާން ހާސްދުވަސް، ލުއިކުރަން އެއްދުވަސް!
- 28 ޖޫން 2020ޚަބަރުކާނިވާ ސަރަޙައްދުގައި ޕާރކިންގ ޒޯނެއް ހެދުމަށް އެތަން ހުސްކުރުމަށް އަންގައިފި
- 27 ޖޫން 2020ޚަބަރުމާލޭ މަސް މާރުކޭޓު އަލުން ހުޅުވަނީ
- 27 ޖޫން 2020ޚަބަރުމުއްދަތު ހަމަވެފައިވާ އައިޑީ ކާޑަށް ޚިދުމަތް ފޯރުކޮށްދެވޭ މުއްދަތު އިތުރުކޮށްފި
