އިންޑިއާގެ ބެންގަލޫރުގައި، ސާވިސަސް އެކްސްޕޯޓް ޕްރޮމޯޝަން ކައުންސިލް (އެސް.އީ.ޕީ.ސީ) ގެ ފަރާތުން، އީ- ސްޕޯޓްސް ފެޑެރޭޝަން އޮފް އިންޑިއާ އާއި ގުޅިގެން މި މަހުގެ 26 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް “ނޭޝަންސް ކަޕް” ގެ ނަމުގައި ކުރިއަށް ގެންދިޔަ އިލެކްޓްރޯނިކް ގޭމިންގ މުބާރާތުން އަބްދުލް މަސީޙް އަބްދުއްރަހީމް ތިންވަނަ ހޯދައިފިއެވެ.

ދިވެހިރާއްޖޭގެ ގައުމީ އިލެކްޓްރޯނިކްސް ގޭމިންގ ޓީމުގެ ކުޅުންތެރިއެއް ކަމަށްވާ ލ. ހިތަދޫ އަބްދުލް މަސީޙް، މި މުބާރާތުގައި ވާދަކޮށްފައިވަނީ ޕްލޭސްޓޭޝަން 4 ގެ ޕްރޯ އިވޮލިއުޝަން ސޮކަރ ގޭމް އިވެންޓުގައެވެ.

މަސީހް އެވޯޑާއި ހަވާލުވަނީ – ފޮޓޯ: މޯލްޑިވްސް އީ ސްޕޯޓިން އެސޯސިއޭޝަން

މަސީހަށް މި ކާމިޔާބު ލިބުމާ ގުޅިގެން މުނިއަވަސް އިން ވާހަކަ ދައްކައިލީމެވެ. މަސީހު ބުނީ ރަށްރަށުގައި ޕެސް ކުޅެން ބޭނުންވާ ބައިވަރު ކުދިން އެބަ ތިބި ކަމަށާއި އެފަދަ ކުދިންނަށް ފުރުޞަތު ހޯދައިދޭން މަސައްކަތްކުރަން ޖެހޭ ކަމަށެވެ.

“މީތި ވީހާވެސް ފުޅާ ދާއިރާއެއްގައި ރާއްޖޭގައި ހިންގުން އެއީ އަހަރެންގެ އެންމެ ބޮޑު އެދުމަކީ. އަހަރެން ވަކިން ބޭރުގައުމަކަށް (މި ކުޅެން) ދާކަށް ބޭނުމެއް ނޫން ފިލައިގެންނެއް. އެންމެނާވެސް ޗެލެންޖް ކޮށްގެން އެންމެނަށް ވުރެން މޮޅުވެގެން، ރާއްޖޭގަ ހުރި އެންމެ މޮޅުމީހާގެ ގޮތުގަ ދާން ބޭނުންވަނީ.” މަސީހް ބުންޏެވެ.

ދިވެހި ސަރުކާރުގެ ދަށުން އީ ސްޕޯޓްސް އޮގަނައިޒޭޝަން އެއް ހެދުމަކީވެސް މަސީހްގެ ވަރަށް ބޮޑު އެދުމެއްކަން އޭނާ ފާހަގަކުރިއެވެ.

މަސީހް އަށް މި މުބާރާތުން 3 ވަނަ ލިބިފައިވޭ – ފޮޓޯ: މޯލްޑިވްސް އީ ސްޕޯޓިން އެސޯސިއޭޝަން

މަސީހް އަށް މި މުބާރާތުގައި ބައިވެރިވެވުނީ ފޭސްބްކް ތެރެއިން މޯލްޑިވްސް އީ ސްޕޯޓްސްއިން ކޮށްފައިވާ ޕޯސްޓެއް ފެނި އެއަށް އެޕްލައިކޮށް ގައުމީ ކުޅުންތެރިއަކަށް ކޮލިފައިވުމަށް މާލެ ގޮސްގެންނެވެ. މާލޭގައި ބޭއްވި މުބާރާތް ކާމިޔާބުވުމުން ބޭރަށް ގޮސް ކުޅެން ފުރުޞަތު ލިބުނީ ކަމަށް އޭނާ ބުންޏެވެ.

މަސީހް ރާއްޖެ ތަމްސީލުކޮށް 3 ވަނަ ހޯދި – ފޮޓޯ: މޯލްޑިވްސް އީ ސްޕޯޓިން އެސޯސިއޭޝަން

ކުއާޓާ ފައިނަލްގައި ލަންކާގެ ކުޅުންތެރިޔާގެ މައްޗަށް 8-0 ގެ ނަތީޖާއަކުން ކުރިހޯދައިގެން ސެމީފައިނަލަށް ދަތުރުކުރި ނަމަވެސް، ސެމީފައިނަލްގައި އިންޑިއާ ކުޅުންތެރިޔާ ފަހުވަގުތު ކާމިޔާބުކުރި ޕެނަލްޓީއަކުން މަސީޙް ވަނީ ބަލިވެފައެވެ. މުބާރާތުގެ ތިންވަނަ ހޮވި މެޗުގައި އުޒްބެކިސްތާނުގެ ކުޅުންތެރިޔާގެ މައްޗަށް 4-0 ގެ ނަތީޖާއަކުން މޮޅުވެ، މަސީޙް ވަނީ މުބާރާތުގެ ތިންވަނަ ހާސިލްކޮށްފައެވެ.

ރާއްޖޭގެ ފަރާތުން މި މުބާރާތުގައި ވާދަކުރުމަށް އަބްދުލް މަސީޙް ހޮވިފައިވަނީ ރާއްޖޭގައި ބޭއްވި ކޮލިފައިން ބުރުތަކުން އެއްވަނަ ހޯދައިގެންނެވެ.

މި މުބާރާތުގައި އިންޑިއާ އާއި، ދިވެހިރާއްޖޭގެ އިތުރުން އިންޑޮނޭޝިއާ، ވިއެޓްނާމް، ނޭޕާލް، ސްރީލަންކާ، ޖަޕާން، ސައޫދީއަރަބިއާ، ނިއުޒިލޭންޑް، އޮސްޓްރޭލިއާ، ސައުތު އެފްރިކާ އަދި ކޮރެއާ ފަދަ ގައުމުތަކުން ކުޅުންތެރިން ވަނީ ބައިވެރިވެފައިވެއެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: