ދިވެހިބަހުގެ އެކެޑަމީން އަތޮޅު ފެންވަރުގައި ބާއްވަމުން އަންނަ އަދަބީ ޢީދު، މުލަކަތޮޅު މުލީގައި ވަރަށް ކުލަގަދަކޮށް ފާހަގަ ކޮށްފި އެވެ. ދިވެހިބަހުގެ އެކަޑަމީއާއި މުލަކަތޮޅު ކައުންސިލް ގުޅިގެން ބޭއްވި ޢަދަބީ ޢީދު ގައި މ.އަތޮޅުގެ މީހުން ދިރިއުޅޭ ހުރިހާ ރަށަކުން ބައިވެރިވިއެވެ.
ދިވެހިބަހުގެ އެކެޑަމީން ސްކޫލް ދަރިވަރުންނާއި، ޒުވާނުންނުން އަދި ޢާންމު ރައްޔިތުންނަށް އަމާޒުކޮށްގެން ބާއްވާ އަދަބީ ޢީދުގެ އެންމެ ބޮޑު ބޭނުމަކީ، ދިވެހިބަހާއި އަދަބިއްޔާތާ ދިވެހިންގެ ސަޤާފަތާއި އާދަކާދައަށް ހޭލުންތެރިކަން އިތުރު ކުރުމުގެ އިތުރުން، ވާދަވެރި މާޙައުލެއްގައި ބައިވެރީންގެ ހުނަރުވެރިކަން ތަރައްޤީކޮށް، އެ ކަމުގެ އަގުވަޒަންކުރުމާއެކު، އިޖުތިމާޢީ ރޫޙު އާލާކުރުމެވެ. މ.އަތޮޅު ވެރިކަންކުރާ މުލީގައި ކުރިއަށްދިޔަ އަދަބީ ޢީދު ފަށްޓަވައިދެއްވީ ދިވެހި އަދަބީ އުސްތާޒް އަބްދުﷲ ޞާދިޤްއެވެ.
އަދަބީ ޢީދުގެ ތެރެއިން، ގިނަ ހަރަކާތްތަކެއް ކުރިއަށްގެންގޮސްފައިވެ އެވެ. އެގޮތުން އަދަބީ ތަފާތު މުބާރާތްތަކާ، ލިޔުންތެރިކަމުގެ މުބާރާތްތަކާ، ޅެންވެރިކަމުގެ ހުނަރުވެރިކަން ދަސްކޮށް ދިނުމުގެ ކޯހަކާއި، ފޮތް މަޢުރަޒަކާއި، ތާރީޚާ ބެހޭ ސުވާލު މުބާރާތަކާއި، އަދަބީ ޖޯޝްގެ ނަމުގައި ސްޓޭޖު ހުށަހެޅުންތަކެއް ގެ އިތުރުންވެސް ގިނަ ޙަރަކާތްތަކެއް ކުރިއަށް ގެންގޮސްފައި ވެއެވެ. މީގެ އިތުރުން މުލަކަތޮޅު މުއައްސަސާތަކުގެ މުވައްޒަފުންނަށް އަމާޒުކޮށްގެން ދިވެހި ބަސް ހެޔޮގޮތުގައި ބޭނުންކުރަން ދަސްކޮށްދިނުމަށް ސެޝަންތަކެއް ކުރިއަށް ގެންގޮސްފައިވެއެވެ.
އަދަބީ ޢީދު ފަށްޓަވައިދެއްވާ ދިވެހި ބަހުގެ އުސްތާޒް އަބްދުﷲ ޞާދިޤް ދެއްކެވި ވާހަކަފުޅުގައި ދިވެހި ބަސް ދިރުވާ ޢާލާ ކުރުމަކީ ކޮންމެ ދިވެއްސެއްގެ ވާޖިބެއް ކަމަށް ވިދާޅުވިއެވެ. ޒަމާނަށް އައި ބަދަލާއިއެކު، ބަސް ބޭނުން ކުރުމުގެ ހަމަތައް އޮޅެމުންދާތީ ޞާދިޤް ވަނީ އެކަންކަމުން މިސާލު ނަންގަވާ ރަގަޅު ގޮތްތައް ބައިވެރިންނާ ޙިއްސާކުރައްވާފައެވެ.
އަދަބީ ޖޯޝްގެ ނަމުގައި ކުރިއަށްގެންދިޔަ ސްޓޭޖް ހަރަކާތްތަކުގައި ސަޤާފީ ނެށުމާއި، ޑްރާމާ އަދި، ރައިވަރާއި، ޅެން ކިޔުމުގެ ހުނަރު ލިބިފައިތިބި އެތައް ބަޔަކު ފެނިގެން ދިޔައެވެ. މުލަކަތޮޅު އަދަބީ ޢީދާއި ގުޅުވައިގެން މުލީ ރައްޔިތުން ވަނީ އޮޑި ފަންނުގެ ނަމުގައި، ސަޤާފީ އަވަށެއް ހަދާ، ރަށް ޒީނަތްތެރިކޮށްފައެވެ.
އަދަބީ އީދުގެ ނިމުން ފާހަގަ ކުރުމާއި މުބާރާތްތަކުގައި ވަނަވަނަ އަށް ދިޔަ ފަރާތްތަކަށް އިނާމު ދިނުމަށް މިމަހުގެ ބާރަވަނަ ދުވަހުގެ ރޭ ބޭއްވި ޖަލްސާ ޝަރަފުވެރިކޮށްދެއްވީ ބްރޯޑްކާސްޓިންގ ކޮމިޝަން ގެ ރައީސް މުޙައްމަދު ޝަހީބް އެވެ.
މިއަހަރުގެ އަދަބީ ޢީދު ކުރިއަށްގެންގޮސްފައިވަނީ އޮގަސްޓް މަހުގެ 8 ން 12 އަށެވެ. އަދަބީ ޢީދަށް މުއްޔަށް ވަޑައިގެންނެވި މެހެމާނުންނަށާއި ރަށުގެ ހުރިހާ ރައްޔިތުންނަށް މުލީ ކައުންސިލާއި ރައްޔިތުންގެ ފަރާތުން ޙާއްޞަ ޖާފަތެއް ދިނެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
