ހިންދީި ފިލްމުތަކުން ގުލްޝަން ގްރޯވަރ ގެނެސްދޭ ފަދަ ވިލަން އެއްގެ މޮޅު އެކްޓިން އެއް ދިވެހި ފިލްމުތަކުގައި ގެނެސްދޭ ފިލްމީ ތަރިއަކީ ކާކުހޭ އަހައިފި ނަމަ ހިތަށް އަންނަނީ ކޮން ނަމެއް ހެއްޔެވެ؟ ކުޑަކުދިންގެ މަގުބޫލު ބައެއް ފިލްމުތަކުން ކުޑަކުދިންނަށް ވަސްވާސްދޭން އުޅޭ އިބިލީސް ފަދަ މަޚްލޫގުންގެ ނުބައި ވަސްވާހުން ކުދިން ރައްކާތެރިކޮށްދޭން އަޅުވެރިއެއްގެ ގޮތުގައި އުޅޭ ކެރެކްޓަރ އަށް އެންމެ ފިޓް ވާނީ ކާކުހޭ އަހައިފިނަމަ، ހަމަ ގައިމުވެސް ޖަވާބަކަށް އަންނާނީ ޒިޔާގެ ނަމެވެ.

މިފަހަރު ހަފުތާގެ ތަރި ސެގްމެންޓްގައި މި ގެނެސްދެނީ އަޙްމަދު ޒިޔާ އެވެ. މާ ގިނަ ވާހަކަތަކެއް ނުދައްކައި، ޒިޔާ އާއި ބައްދަލުކޮށް ދައްކައިލި ވާހަކަތައް ގެނެސްދޭނަމެވެ.

ޒިޔާ އާއި އިންޓަވިއުކުރީ އަޙްމަދު ރަޝީދު އެވެ.

ޒިޔާ އާއި ރިޝްފާ ލަވައެއްގެ މަންޒަރެއްގައި – ފޮޓޯ: ޒިޔާ ފޭސްބްކް

ފިލްމީ ދާއިރާއަށް ވަދެވުނީ ކޮންއިރަކު؟ ކީއްވެގެން؟

ފިލްމީ ދާއިރާއަށް ނުކުތީ ކިހާ ހިސާބެއްގަ ކަމެއް ނޭނގެ.. އެކަމު މިހާރު ގާތްގަނޑަކަށް މޯރ ދެން 15 އިޔާރސް ވެދާނެ މި ފީލްޑްގަ މަސައްކަތްކުރާތާ.. މޯރ ދެން 15 އިޔާސް..

ދެން އަސްލު ހަޤީޤަތުގައި ފިލްމީ ދާއިރާއަށް ނުކުންނަން އެއްވެސް ކަހަލަ ޚިޔާލެއް ހަމަ ނެތް ފުރަތަމަ.. އެއީ ސްކޫލް ނިމުނުތާ ކައިރީގައި.. ދެން އޭރު ޖޮބަކަށް ނުދާތީ އަހަރެންގެ މަންމަ އަހަރެން ހަވާލުކުރީ އޭރު އިންނާނެ ކޮރޯނާ އާޓްސް ކިޔާ ތަނެއް.. އޭރު އެތާ އުޅޭނީ ސުޖާއާ އަލްތާއާ އަފޭއާ (ޝްވެކް ސިނަމާއާ މިހާރު ހަވާލުވެގެން ހުންނަ).. ދެން ސުޖާއަކީ އޭރުގަ ވަރަށް މަޝްހޫރު ޑައިރެކްޓަރެއް.. ކޮރޯނާ ސުޖާއޭ ކިޔާނީވެސް.. ދެން އޭރު ޖޮބަކަށް ނުދާތީ އެމީހުންނާއެކީ ބޯއީއަކަށް ދިޔައީ ޓެކްނީޝަނަކަށް.. އެމީހުން ބުނީމަ ބުނާ ކަމެއް ކޮށްދޭން.. ވާގަނޑު އޮޅާލާ، ލައިޓު ތަންތާ ބަހައްޓާލަން ބުނީމަ އެތާ ބަހައްޓާލާ، އެއްޗެއް ގަނެދޭން ބުނީމަ ގަނެދީ.. އެގޮތަށް އުޅެމުން ގޮސް ފިލްމީ ދާއިރާއަށް އިސްޓަރެސްޓްވީ ގޮތަކީ..

ފިލްމެއްގެ ޝޫޓިންގައި ޒިޔާ – ފޮޓޯ: ޒިޔާ ފޭސްބްކް

މި ދާއިރާގައި ޒިޔާ މައިގަނޑު ގޮތެއްގައި ކުރާ މަސައްކަތްތަކަކީ ކޮބާ؟

އަސްލު ފިލްމީ ދާއިރާގައި މަގޭ އަސްލު މެއިން މަސައްކަތަކީ ޕޯސްޓް ޕްރޮޑަކްޝަން.. އެޑިޓިންއާ ޑަބިންއާ މިކަހަލަ ކަންތައްތައް ކުރުން.. ދެން މީގެ އިތުރުން ކުރާ ކަންކަން މި ހުންނަނީ ޑައިރެކްޝަން ދެން އެކްޓްކުރުން.. އަސްލު އިންނާނީ ފިލްމުގެ މާސްޓަރއާ ހަމައަށް އެ ދާ ކަންތައްތައް ކުރުން.. ދެން އެހެން ނަމަވެސް ހަމަ ކެމެރާވެސް ކުރަން، ޑައިރެކްޝަންވެސް ހަދާފަ ހުންނާނެ ފިލްމުތަކުގައި..

އެކްޓިންގއާ ޓެކްނިކަލް މަސައްކަތްތަކާ އެކީގައި މިހާތަނަށް ކިތައް ފިލްމު، ޑްރާމާ އަދި ސީރީޒްގައި މަސައްކަތް ކުރެވިއްޖެ؟

އެހެން ހަމަ ނޭނގެ ބުނާކަށް.. ހުންނާނެ ބޮޑެތި ފިލްމުތައްވެސް ކުޅެފައި.. ޑްރާމާވެސް ހުންނާނެ ފުދޭވަރަކަށް ކުޅެފައި.. ލަވަވެސް ހުންނާނެ.. އެހެން ވަކި ސީދާ އަދަދެއް ބުނާކަށް ނޭނގެ..

ދިވެހި ފިލްމީ ދާއިރާއާއި ދޭތެރޭ މިހާރުވެސް ވަރަށް ގިނަ ޒުވާނުން ބުނާ އެއްޗެއް ދިވެހި ފިލްމެއް ނުބަލާނަމޭ، ދިވެހި ފިލްމު އެހެންނޭ މިހެންނޭ.. އެހެން ކިޔާ ދާއިރާއަށް ފާޑުކިޔުންތައް އަމާޒުވޭތާ.. ދެން އޭރުގެ ޔަންގު ޖެނެރޭޝަންގެ ފަރާތެއް ޒިޔާއަކީ.. ދެން އެހެން އުޅެފައި ފިލްމީ ދާއިރާއަށް ވަނީމަ އެކީގައި އުޅުނު ކުދިން ޖޯކު ޖަހާ މަލާމާތްކޮށް ހެދިތަ؟

ނޫނޭ.. އޭރުގައި ޒިޔާމެން ފިލްމީ ދާއިރާއަށް ވަން ޒަމާނުގައި މިބުނީ ކެމެރާ ކުރިމައްޗަށް ނުކުތް ޒަމާނަކީ މީހުން ފިލްމީ ދާއިރާއަށް ވަރަށް ސަޕޯޓުކުރި ޒަމާނެއް.. ދެން ލަވައެއް ފިލްމެއް އެއްޗެއް ކުޅެލާފައި ހުންނަ މީހަކު ވިއްޔާ މީހުން ވަރަށް ބަލައިގަނޭ.. އޭރުގައި މީހުންނެއް ނުކިޔާ މިހާރުހެން ފިލްމު ކުޅުމަކީ ކަޑަ ކަމެކޭ.. އެގޮތަށް ހަޖޫ ޖަހާފައެއް ނެތް.. މަށަށް އައިސްފައި ހުރީ ހަމަ ވަރަށް ސަޅި ކޮމެންޓްސް.. އޭރު އަސްލު މީހުންގެ ލޯބި ވަރަށް ލިބޭ.. އަހަންނަކީ ހަޤީޤަތުގައި އެހާ ލޯބީގެ ބައިބައި ކުޅޭ މީހެއް ނޫން.. މަގޭ ފިލްމީ ކެރިއަރުގައި މުޅިން ކަހަލަ ގޮތަކަށް ކުޅެފައި ހުންނާނީ ވިލަންގެ ބައި.. ދެން ބައެއް މީހުން ހިތް އޮތްގޮތެއް ނޭނގެ.. އެކަމަކު މުޅިންވެސް މީހުން ބުނެފައި ހުރީ ވަރަށް މޮޅޭ، ވަރަށް ސަޅިއޭ، ކަލެޔާ ގުޅެނީ ތިކަހަލަ ރޯލޭ.. އެގޮތަށް ވަރަށް ސަޅި ކޮމެންޓްސް އާދޭ..

ފިލްމެއްގެ ޝޫޓިންގައި ޒިޔާ – ފޮޓޯ: ޒިޔާ ފޭސްބްކް

މި ދާއިރާގައި ފައިތިލަ ސާބިތުކޮށްލަން މަސައްކަތްކުރި ދުވަސްވަރު އެންމެ ބޮޑު ގޮންޖެހުމަކަށް ކުރިމަތިވީ ކޮންކަމެއް ނުވަތަ ކޮންކަހަލަ ކަންތައްތަކެއް؟

އެންމެ ފުރަތަމަ ދުވަސްކޮޅުގައި ގޮންޖެހުމަކަށް ހުންނަނީ.. އަސްލު ވަރަށް ކަޑަވޭ މިހާރުވެސް މިވާހަކަ ބުނަންވެސް.. ބައެއް ޑައިރެކްޓަރުން އެބަހުރި އަހަރެން އިގްނޯރ ކޮށްލާފަ އަހަރެން ކަޅުވީމަ.. އޭގެ އިތުރުން ބުނަންޏާ އޭރުގައި އަހަރެންނަށް ދިން ފުރުސަތެއް ވިއްޔާ ދީފައި ހުންނާނީ އޭރު އަހަރެން ކައިރީ އުޅުނު ރައްޓެހިން.. ފުންނާބު އުހޭ މި ކިޔާވަރުގެ މީހުން.. އަހަރެންވެސް އުޅުނީ އޭރު ހަމަ ފުންނާބު އުސް މީހުންނާއެކީގައި.. އެމީހުން އަހަރެންނަށް ދިން ފުރުސަތެއް ވިއްޔާ ދީފައި ހުންނާނީ.. ދެން އޭގެ އިތުރުން އުޅުނު މީހުން އަހަރެމެން ވަރަށް ބޮޑަށް އިގްނޯރ ކޮށްލި ޒަމާނެއްވެސް ދިޔަ.. އޭރުގައި އަހަރެމެންނަކާ އެމީހުންނަކާ ވާހަކަދައްކައެއް ނުހެދޭނެ.. އޭރުގައި ދެން އަހަރެމެންނަކީ ހަމަ ބޯއީ ގޮތަށް އުޅޭ ކުދިންތާ.. އެހެންވެ އެމީހުން ފެނުނަސް އަނގައިންވެސް ނުބުނެ ވޭތޯ ބަލާނީ.. އެކަމު މިއަދު އެހެނެއް ނުވާނެތާ ދޯ..

ފިލްމެއްގެ ޝޫޓިންގައި ޒިޔާކުރު ފިލްމު “ކަނޑު އިނބިލީސް”ގައި ޒިޔާ

މިހާ ދުވަހު މި ދާއިރާގައި މަސައްކަތް ކުރިއިރު އެކުގައި މަސައްކަތްކުރި ފަރާތްތައް، މިސާލަކަށް ޑައިރެކްޓަރުން، ޕްރޮޑިއުސަރުންގެ ފަރާތުން ޓެކްނިކަލް ކަންތައްތަކުގެ އިތުރުން ދަސްވީ ކޮން ކަންތައްތަކެއް؟

އަސްލު އެންމެ މުހިންމު ކަމަކަށް ދަސްވީ ލީޑާޝިޕް ނަގައިގެން މަސައްކަތްކުރުން.. ގިނަ މީހުންތަކެއް ގޮވައިގެން އެކުވެރި މާހައުލެއްގައި މަސައްކަތްކުރަން ވަރަށް ބޮޑަށް ދަސްވި.. ހުންނާނެ 13 އެޕިސޯޑްގެ ޑްރާމާއާއި ކުރު ފިލްމުތަކެއްވެސް އެގޮތަށް އަހަރެން ލީޑާޝިޕް ނަގައިގެން ގޮސް ނަގާފައި ހުރި.. ލީޑާޝިޕް އެންމެ ބޮޑަށް ދަސްވީ..

ކުރެވިފައި ހުރި މަސައްކަތްތަކުގެ ތެރެއިން އެންމެ ހިތްހަމަޖެހޭ މަސައްކަތަކީ ނުވަތަ މަސައްކަތްތަކަކީ ކޮބާ؟

އަހަރެންނަށް ކުޅެވިފައި ހުރި ފިލްމުތަކުން އަހަރެން އަދިވެސް އެންމެ ހިތްހަމަޖެހޭ ފިލްމަކީ އިންސާފް.. އެއީ އޭގައި އިންނާނެ ބެސްޓް ސަޕޯޓިންގ އެކްޓަރ އަދި ބެސްޓް އެޑިޓިންގއަށް ނޮމިނޭޓުވެސްވެފައި.. ދެން އަދިވެސް މީހުން އަހަރެން އިންސާފުގައި ކުޅެފައި އިން ރޯލުގެ ވާހަކަ ދައްކާ..

ޒިޔާގެވެސް ފުދޭވަރަކަށް ފޭންސް ތިބޭނެތާ.. ފޭންއެއްގެ ފަރާތުން ނުވަތަ ފޭނުންތަކެއްގެ ފަރާތުން އެންމެ އާދަޔާ ޚިލާފު ކަމަކަށް މިހާތަކަށް ކުރީ ކޮންކަމެއް؟

މިހާރު ދެން އަސްލު ފިލްމީ ދާއިރާއާއި ތަންކޮޅެއް ދުރުގައި މި އުޅެވެނީ.. މިހާރު ފިލްމީ ދާއިރާގެ އެއްވެސް މަސައްކަތެއް ނުކުރަން.. ވަޒީފާގައި އުޅޭތީއާވެސް އެކީގައި.. އެކަމު މިހާރުވެސް އެކި ރަށްރަށަށް އަރާލީމަ ވަރަށް ތަފާތު މީހުންނާ ދިމާވޭ.. ވަރަށް އެޕްރިޝިއޭޓްކުރޭ.. ފޮޓޯ ނަގާލާ ކަންކަން ކުރޭ..

ދެން އަހަރެން މިކަން ކޮށް އުޅުނުއިރު ދިމާވެފައި އިން އެންމެ އާދަޔާ ޚިލާފު ހާދިސާއަކީ.. މަ އިނީ މީހަކާ އެކީ ކޮފީއެއްގައި.. އިންދާ އަންނަނީ މުސްކުޅިފުރައިގެ ފިރިހެނެއް.. އެތާގެ ފިރިހެންގޮލައަކާ އެކީ މަ އިނީ.. އިންދާ މަ ފެނިގެން އެމީހާ ރުޅިއައީ މަދެކެ.. ރުޅިއައިސްގެން ބުނީ އިނގޭހެއްޔޯ ކާކުކަން ކަލޭ މީނަ ކައިރީ ތި އިންނަނީ.. މީނައަކީ މަންމަގެ ވޮލެޓުން ލާރި ނަގާ، މަންމަ ގައިގައި ތަޅާ އަނިޔާކުރާ މީހެކޯ.. ވައްކަންކޮށް ޑްރަގު ނަގާ މީހެކޯ.. މަ ކުޅެފައި އިންނާނެ މަދަހައެއް.. އެ މަދަހަ ބަލާފައި އޭނަ ހުރީ.. އެހެންވެ އެވާހަކަ އެބުނީ..

ފިލްމު އެވޯޑް 9 ގައި ޒިޔާ އާއި ކޮޕީ އިއްސެ – ފޮޓޯ: ޒިޔާ ފޭސްބްކް

ފިލްމުތަކުގެ ޝޫޓިންތަކުގައި އުޅޭއިރު ހުންނާނެއެއްނު ހަނދާނުން ފިލުވާލަން ދަތި ކަންތައްތައް ދިމާވެފައި.. އެކަހަލަ ކަމެއް އެބައޮތްތަ ފާހަގަކޮށްލަން ބޭނުންވާ؟

ހަނދާނުން ފިލުވާލަން ވަރަށް ދަތި ޝޫޓިންއެއް އެއީ ޖުމައްޔިލްގެ ފުރަތަމަ ފިލްމު އަނިޔާއަކީ.. އެއީ ކޮޕީ އިއްސެއާ ނިއުމާއާ މަށާ ފަރީއާ ނިމާލްއާ އޭރު ވަރަށް އެއްކޮށް އުޅުނު އެންމެން ކަހަލަ ގޮތަކަށް އެއްތަނަކަށް ގޮސްގެން ޝޫޓްކުރި ފިލްމެއް.. އެ ދަތުރަކީ މަގޭ ފިލްމީ ހަޔާތުގައި އައި އެންމެ މަޖާ ޝޫޓިން ދަތުރު..

ފިލްމީ ދާއިރާގެ މަސައްކަތްތަކާއި ދުރަށް ޖެހިލާފައި އަމިއްލަ ދިރިއުޅުން ކުޑަކޮށް ކިޔާލަދީބަލަ..

މިހާރު މި އުޅެނީ ދެވަނަ ކައިވެނި ކޮށްގެން.. 3 އަހަރުގެ ދަރިއަކުވެސް ހުރޭ..

ދަރިފުޅާމެދު ކުރެވޭ އުއްމީދަކީ ކޮބާ؟

ވަރަށް ފޮނި އުއްމީދުތަކެއް ކުރެވޭ.. އޭނަ ބޮޑުވެގެން ވަރަށް މޮޅު ކުއްޖަކަށް ވާ ދުވަސް އެއީ އެންމެ ދެކިލަން ބޭނުންވާ ދުވަހަކީ.. މީހުން ޤަދަރުކުރާ މީހުން އިތުބާރުކުރާ ހެޔޮލަފާ ދަރިއަކަށް ވުން.. އެއީ ކަންނޭނގެ ކޮންމެ މީހެއްގެވެސް ދުޢާއަކަށް ވާނީ.. ޑްރީމްއަކަށް ވާނީ..

ޒިޔާ އޭނާގެ ދަރިފުޅާއެކު – ފޮޓޯ: ޒިޔާ ފޭސްބްކް

މި ދާއިރާއިން ހާސިލްކުރަން ބޭނުންވާ ކަމަކީ ކޮބާ؟

ވަރަށް ދެކެން ބޭނުންވާ ދުވަހެއް އެއީ ރާއްޖޭން ބޭރުގެ މީހުން އައިސް ރާއްޖޭގެ މީހުންނާ ގުޅިގެން ފިލްމު ހެދުން.. މިހާރު މަޑުމަޑުން އެކަންވެސް އެބަ ކުރިއަށްދޭ ކަންނޭނގެ.. ބޮލީވުޑް، ހޮލީވުޑް ވާހަކަ އަސްލު މި ބުނަނީ އިނގޭ.. އޭގެ އިތުރުން ސަރުކާރުން އަހަރެމެންދެކެ ލޯބިވެގެން އަހަރެމެންނާ ގުޅިގެން ކަންތައްތަކެއް ކުރެވޭނެ ދުވަހެއް އައުން..

ސަޕޯޓަރުންނަށް ދޭން ބޭނުންވާ މެސެޖަކީ ކޮބާ؟

ސަޕޯޓަރުންނަށް ބުނެލަން ބޭނުންވަނީ ޒިޔާ މިދުވަސްކޮޅު ކުޑަކޮށް ދުރުގައޭ މި އުޅެނީ ފިލްމީ ދާއިރާއާ.. އެކަމު މިދިޔަ އަހަރުވެސް ފިލްމެއް ތައްޔާރުކޮށް ބެލުންތެރިންނާ ހަމައަށް ގެނެސްދީފައި ވާނެ.. ފިލްމީ ދާއިރާއާ އެއްކޮށް ދުރަށް ދިޔައީކީ ނޫނޭ.. ތިޔަ ދޭ ސަޕޯޓް މިހާރުވެސް ދެމުން ދާގޮތަށް ދާށޭ.. ވަރަށް އުފާވެޔޭ ސަޕޯޓަރުން ތިގޮތަށް ތިބޭތީ.. ސަޕޯޓަރުން އުފާވާފަދަ ރޯލުތަކުން ފެންނަމުން ދާނެޔޭ ބުނެލަން ބޭނުންވަނީ..

ފިލްމެއްގެ ޝޫޓިންގައި ޒިޔާ – ފޮޓޯ: ޒިޔާ ފޭސްބްކް

އެންމެ ފަހު ސުވާލު.. މުނިއަވަސްއާ ދޭތެރޭ ދެކެނީ ކިހިނެއް؟

މުނިއަވަސްއިން ފިލްމީ ދާއިރާ ކުރިއެރުވުމަށް ތިޔަ ކޮށްދޭ މަސައްކަތް ބަލައިގަންނަން.. ވަރަށް ހިތްހަމަޖެހޭ ދާއިރާ ކުރިއަރުވަން ތިޔަ ކޮށްދޭ މަސައްކަތާއިމެދު..

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: