އެކްޓަރ/ޑައިރެކްޓަރ އަދި ޕްރޮޑިއުސަރ ޢަލީ ސީޒަންގެ ފިލްމު ކުންފުނި، ‘އެސް ޕްރޮޑަކްޝަންސް’ އިން އުފެއްދުމަށް ތައްޔާރުވަމުން އަންނަ ދިވެހި ފީޗަރ ފިލްމު ”ލޯބިވެވިއްޖެ“ ލޯންޗްކޮށްފިއެވެ.

މަޝްހޫރު ގިނަ ތަރިންތަކެއް ހިމެނޭ “ލޯބިވެވިއްޖެ” ގެ ލީޑްގައި މިވަގުތު އެންމެ އަލިގަދަކޮށް ވިދަމުން އަންނަ ޢަލީ އާޒިމް (ދޮން އައްޔަ)، މަރިޔަމް އައްޒަ، އިރުފާނާ އިބްރާހިމް (އެރޫ)، އަހްމަދު އީސާ (އާނަންދު) ގެ އިތުރުން ޢަލީ ޝަމީލް ހިމެނެއެވެ.

ޢަލީ ސީޒަން ޑައިރެކްޓްކުރާ “ލޯބިވެވިއްޖެ” ލޯންޗު ކުރުމުގެ ރަސްމިއްޔާތު އޮތީ މިރޭ 21:00 ގައި ޓިއުލިޕް ރެސްޓޯރެންޓް ގައެވެ. ފިލްމުގެ ޝޫޓިން މިމަހު23 ގައި ގދ. ތިނަދޫގައި ފެށުމަށް ވަނީ ހަމަޖެހިފައެވެ. ފިލްމުގެ 50 އިންސައްތަ ޝޫޓިން އަވަށްޓެރި ސްރީ ލަންކާގައިވެސް ނަގާނެއެވެ.

މަލްޓި ކާސްޓެއް ހިމެނޭ މި ފިލްމު އެޅުވުމަށް އަމާޒުހިފާފައިވަނީ އަންނަ އަހަރު ރަމަޟާން މަހުގެ ފަހުން ކަމަށް ސީޒަން ބުނެއެވެ.

”ލޯބިވެވިއްޖެ“ގެ ސްކްރިޕްޓާއި ޕްރީ-ޕްރޮޑަކްޝަންގެ މަސައްކަތުގެ އިތުރުން ފިލްމުގެ ލަވަތަކު މަސައްކަތްވެސް ކުރަމުން އަންނަކަމަށް ސީޒަން މީގެ ކުރިން ބުނެފައި ވެއެވެ.

ފިލްމު ”ލޯބިވެވިއްޖެ“ގެ ސްކްރީންޕްލޭ ލިޔަނީ ސްކްރީން ރައިޓަރ ޒަރީރު އެވެ. ފިލްމުގެ ލަވަތަކުގެ ތެރެއިން “އިޝްގުގާ“ ލަވައިގެ މަސައްކަތްތައް ވަނީ ކޮށްފައެވެ. އިބްރާހިމް ނިފާރު (ތިއްތި) މިއުޒިކް ހަދާފައިވާ މި ލަވައިގެ އަޑުގެވެރިޔަކީ މޯލްޑިވިއަން އައިޑަލްގެ ޖަޖުކަން ކޮށްފައިވާ ހުނަރުވެރި ލަވަކިޔުންތެރިޔާ އަޙްމަދު އިބްރާހިމް (އައްމަޑޭ) އެވެ.

މި ފަހަކަށް އައިސް ރާއްޖޭގައި އުފައްދަމުން އަންނަ ގިނަ ދިވެހި ފިލްމުތަކުގެ މީޑިއާ ޕާޓްނަރުކަން ކުރަމުން އަންނަނީ މުނިއަވަސް އިންނެވެ. ސީޒަން އުފައްދަމުން އަންނަ ގިނަ ފިލްމުތަކުގެ އޮންލައިން މީޑިއާ ޕާޓްނަރަކީ މުނިއަވަސް އެވެ. އެގޮތުން ފިލްމު ”ލޯބިވެވިއްޖެ“ގެ މީޑިއާ ޕާޓްނަރަކީ ވެސް މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: