ޔުއެފާ ޗެމްޕިއަންސް ލީގުގެ މިސީޒަނުގައި މޮޅުކުޅުމެއް ދެއްކި ރެޑްބުލް ސަލްޒްބާގުގެ ޖަޕާނު ފޯވާޑް ޓަކޫމީ މިނަމީނޯ 7.25 މިލިއަން ޕައުންޑަށް ގަތުމަށް ލިވަޕޫލް އާއި ސަލްޒްބާގުން އެއްބަސްވުމަކަށް އަތުވެއްޖެ ކަމަށް ރިޕޯޓުތައް ބުނެފިއެވެ.
އުމުރުން 24 އަހަރުގެ ހުނަރުވެރި ފޯވާޑް ކުރިއަށް އޮތް ދެ ތިން ހަފުތާގެ ތެރޭގައި އޭނާ އާއި ލިވަޕޫލް އާއި ދެމެދުގައި އެއްބަސްވުން އެކުލަވާލައި، މެޑިކަލް ފުރިހަމަކުރުމުގެ މަސައްކަތް ކުރާނެކަމަށް ވެސް މީޑިއާތަކުން ރިޕޯޓް ކޮށްފައިވެއެވެ. ލިވަޕޫލް އިން ބުނާގޮތުގައި އެ ކުލަބުން 2013 ވަނަ އަހަރުން ފެށިގެން މިނަމީނޯ އަށް އަންނަނީ ފާރަލަމުންނެވެ.
2020 ވަނަ އަހަރުގެ ޖެނުއަރީ މަހުގައި އޮންނަ ފިނިމޫސުމުގެ ޓްރާންސްފަރ ބާޒާރުގައި މިނަމީނޯ ލިވަޕޫލް އާއި ގުޅޭއިރު، ވާދަވެރި މެންޗެސްޓަރ ޔުނައިޓެޑުން ވެސް އޭނާ ހޯދުމުގެ މަސައްކަތް ކުރާ ކަމަށް ޚަބަރުތައް ބުނެއެވެ. ޚަބަރުތައް ބުނާގޮތުން، ސަލްޒްބާގުން އެ ކުލަބުގެ ކުޅުންތެރިންނާއި ދެމެދު ހަދާފައިވާ އެއްބަސްވުންތަކުގައި، ބޮޑެތި ކުލަބުތަކުން ހުށަހެޅުމެއް އަތުވެއްޖެނަމަ، ބޮޑެތި ކުލަބުތަކަށް އެ ކުޅުންތެރިން ވިއްކާލުމަށް ފަހިކޮށްދޭ މާއްދާ އެއް އޮންނަ ކަމަށް ވެއެވެ.
ޓަކޫމީ މިނަމީނޯ / ފޮޓޯ: ގެޓީ އިމޭޖެސް
ލިވަޕޫލްގެ ސްޕޯޓިންގް ޑިރެކްޓަރު، މައިކަލް އެޑްވާޑްސް އާއި، ސަލްޒްބާގުގެ ޑިރެކްޓަރ އޮފް ފުޓްބޯލް، ކްރިސްޓޯފް ފްރެންޑް މިއަހަރުގެ ނޮވެމްބަރު މަހުން ފެށިގެން މިނަމީނޯ ގެ ޓްރާންސްފަރ ކަންތަކާ ބެހޭގޮތުން އަންނަނީ މަޝްވަރާކުރަމުންނެވެ. “އަހަރެންނަށް ޔަގީންކަން ދެވިދާނެ މިހާރު ލިވަޕޫލް އާއި ދެމެދު މަޝްވަރާތައް ކުރެވެމުންދާކަން. މިފަދަ ބޮޑެތި ކުލަބުތަކުން އަހަރެމެންގެ ކުޅުންތެރިންނަށް ޝައުގުވެރިވާތީ އެއީ ވަރަށް ބޮޑު ޝަރަފެއް.” ސަލްޒްބާގުގެ ޑިރެކްޓަރ އޮފް ފުޓްބޯލް މީޑިއާ އަށް ބުނެފައިވެއެވެ.
ޔުއެފާ ޗެމްޕިއަންސް ލީގުގެ ގުރޫޕް ސްޓޭޖުގައި ލިވަޕޫލް އާއި ދެކޮޅަށް ކުޅުނު ދެ މެޗުގައި ސަލްޒްބާގުން ދެއްކި ކުޅުމުން، ލިވަޕޫލްގެ ކޯޗް ޔާގެން ކްލޮޕް ޝައުގުވެރިކަން އެ ޓީމުން ދަމައިގަތެވެ. ޚާއްޞަކޮށް މިނަމީނޯ ގެ ފަރާތުން ފެނިގެންދިޔަ މޮޅުކުޅުމުން ދުނިޔޭގެ ކުލަބުތަކުގެ ލޯތައް އޭނާ އަށް އަމާޒުވި ކަމަށްް ރިޕޯޓްތައް ބުނެއެެވެ. މިނަމީނޯ ވަނީ ޗެމްޕިއަންސް ލީގުގައި ދެ ގޯލާއި، ތިން އެސިސްޓް ހަދާފައެވެ. އަދި އޭނާ އަކީ ޓީމުގެ ކުރިއާއި، މެދުތެރެއަށް ކުޅުމުގެ ގާބިލްކަން ލިބިފައިވާ “ވާސަޓައިލް” ކުޅުންތެރިއެކެވެ.
ލިޔުންތެރިޔާގެ ފުރަމަލަ
- އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.
މި ލިޔުންތެރިޔާގެ ބައެއް އެހެން ލިޔުންތައް
- 5 ޖެނުއަރީ 2022ޚަބަރުކޮވިޑް ކޭސްތައް ގިނަވެ އިނގެރޭސި ލީގު ކަޕް ސެމީ ފައިނަލް މެޗު ފަސްކޮށްފި
- 4 ޖެނުއަރީ 2022ޚަބަރުއާ އަހަރު ކުޅުނު ފުރަތަމަ މެޗުން ޔުނައިޓެޑް ބަލިވެއްޖެ
- 4 ޖެނުއަރީ 2022ޚަބަރުފްރެންޗް ކަޕްގެ ގެ ގަދަ 16 އަށް ޕީއެސްޖީ ދަތުރުކޮށްފި
- 2 ޖެނުއަރީ 2022ޚަބަރުރޮޑްރީގެ ގޯލުން ފަހު ވަގުތު ސިޓީން އާސެނަލް ބަލިކޮށްފި
