ކާމިޔާބު ދިވެހި ފީޗާ ފިލްމު “ބަވަތި” އުފެއްދި ޕްރޮޑަކްޝަން ހައުސް ‘އައި ފިލްމްސް’ އިން އުފައްދާ ދެވަނަ ފީޗާ ފިލްމުގެ ނަން ހާމަކޮށްފިއެވެ. ފިލްމުގެ ނަން ހާމަކުރުމަށް މިރޭ ‘އައި ފިލްމްސް’ އިން ވަނީ ވީޑިއޯކޮޅެއް އާއްމުކޮށްފައެވެ.
“ހަމްދުއަށް އެނގޭތަ މަގޭ ނަމުގެ މާނަ؟” ފިލްމުގެ ލީޑް ކުޅޭ ނުޒޫގެ އަޑުން ސުވާލުކޮށްލައެވެ.
“އުނހޫނ. ކިޔާބަލަ!” ފިލްމުގައި ހަމްދުގެ ބައި ކުޅޭ ފިރިހެންކުއްޖާ އެދެއެވެ.
“ރީތި، ހިތްހެޔޮ، ފްރެންޑްލީ، ޕަވަރފުލް، އިންޓެލިޖެންޓް، ސްޓްރޯންގް ވޯރިއަރ. ވަރަށް ވަރުގަދަ ނަމެއް ދޯ؟ އެހެންވީމަ ހަމްދު އެއްވެސް ކަމަކާ ވިސްނާނެ ކަމެއް ނެތް. އަހަރެން ހަމްދު ހުރިހާ ކަމަކުން ސަލާމަތްކުރާނަން.” ނުޒޫ ކިޔައިދެއެވެ.
“އެހެންތަ؟” ފިރިހެން ކުއްޖާ މިހެން ބުނުމާއެކު ދެމީހުން އެއްކޮށް ހިނިގަނޑެއް ޖަހާލާ އަޑު އިވެއެވެ.
ދެން އެއަށްފަހު އިވިގެންދަނީ ފިރިހެން ކުއްޖާ އެހީއަކަށް އެދި ވޭނާއި އާދޭހުގެ ރާގުގައި “ނީނާ” އޭ ކިޔާފައި ގޮވާލާ އަޑެެވެ. އެ ހިސާބުން “ނީނާ” ގެ ނަން ވެސް ވީޑިއޯއިން ފެނިގެންދެއެވެ.
ފިލްމު “ނީނާ“ގެ ކާސްޓަށް ބަލައިލާއިރު، ލީޑްގައި ހަރަކާތްތެރިވަނީ ނުޒުޙަތު ޝުޢާއިބް، އަލަށް ތަޢާރަފުކުރާ ޝަރަފް ޢަބްދުﷲ، ޖުމައްޔިލް ނިމާލް އެވެ. މީގެ އިތުރުން ހަމްދޫން ފާރޫޤް، ޢަލީ ޔޫޝަޢު އާއި އަލަށް ތަޢާރަފްވާ ނަތާޝާ ޖަލީލް، ނާޖިހާ އަޒޫރް، ޢަލީ އިނާޒް، އަލަށް ތަޢާރަފްވާ އިބްރާހިމް ޝާއިފް، މުޙައްމަދު ޢަލީ (މޯޑެކްސް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން އަދި މަރިޔަމް ޝަކީލާ އާދަމް ހިމެނެއެވެ.
ފިލްމުގައި ހަރަކާތްތެރިވާ ތަރިން ބައެއް ތަމްރީނުތައް ހަދަން ފަށާފައިވާއިރު، ނުޒުހަތު ޝުޢައިބް މާޝަލް އާޓްސް ދަސްކުރާ ބައެއް ފޮޓޯތައް އައި ފިލްމްސް އިން ވަނީ މީގެ ކުރިން ދައްކާލާފައެވެ. އެގޮތުން މި ފިލްމުގެ ތަރިންނަށް މާޝަލް އާޓްސް ޓްރެއިނިން ހަދައިދެނީ ‘ޝިން އެޓަމީ މޯލްޑިވްސް’ އިންނެވެ. ބޮޑީ ޓްރާންސްފޮމޭޝަން ޖައްސައިދެނީ ‘ބަރ ކޮންސެޕްޓް’ އިންނެވެ.
ފިލްމުގެ މިއުޒިކް ހަދަނީ ހުސައިން ތައުފީގް އެވެ. މޭކަޕް ހަދައިދެނީ “ބަވަތި”ގައި ފެނިގެންދިޔަ ފުރިހަމަ މޭކަޕްތައް ހެދި އާޓިސްޓް ރުޠުބާ އަޙްމަދު އެވެ.
މި ފިލްމުވެސް ކެމެރާ ކުރަނީ “ބަވަތި” ކެމެރާކުރި ހުނަރުވެރި ކެމެރާމަން ވިޝާން (ކަނޑި) އެވެ. އެޑިޓިން އާއި ޕޯސްޓް ޕްރޮޑަކްޝަން ހަދަނީ “ބަވަތި” ގައި ވެސް އެ މަސައްކަތްތައް ވަރަށް ފުރިހަމައަށް ކޮށްފައިވާ ‘އޯކޭޒް އިންކް’ އިނެވެ. ވިޝުއަލް ހަދަނީ އޯކޭޒް އިންކް ގެ ސާމީ އެވެ.
ފިލްމު “ނީނާ“ގެ ލަވަތަކުގެ މަސައްކަތަށް ބަލާލާއިރު، ލިރިކްސް ހަދަނީ ފިލްމު ޑައިރެކްޓްކުރާ އިލްޔާސް ވަހީދު (އިއްލެ)ގެ އިތުރުން މުޙައްމަދު ޢަބްދުލް ޣަނީ (ތޭރަވާ) އެވެ. ލަވަތައް ކިޔަނީ އަންޔާ، އަޝްފާ އަދި ޖައިޝާ އެވެ.
ފިލްމުގެ ވާހަކަ އާއި ސްކްރިޕްޓް ލިޔުނީ އިލްޔާސް ވަހީދު އެވެ. އެސިސްޓެންޓް ޑައިރެކްޓަރެއްގެ ގޮތުގައި ހަރަކާތްތެރިވަނީ ޓީވީ ޕްރޮޑަކްޝަން ތަކުން ތަޖުރިބާ ލިބިފައިވާ “ބަވަތި” ގެ ލީޑުން ފެނިގެންދިޔަ އަހްމަދު އިފްނާޒް ފިރާގް އެވެ. މި ފިލްމުގެ ވެސް ޕްރޮޑިއުސަރުންނަކީ އާސިމް އަލީ އާއި އަޙްމަދު ވަހީދު އެވެ. މިއީ އިލްޔާސް ވަހީދު ޑައިރެކްޓްކުރާ ދެވަނަ ފީޗާ ފިލްމެވެ.
މުނިއަވަސް އިން އޮންލައިން މީޑިއާ ޕާޓްނަރުކަން ކުރާ ފިލްމު “ނީނާ” ރިލީޒްކުރަނީ 2020 ގައެވެ. ‘އައި ފިލްމްސް’ގެ ފުރަތަމަ ފިލްމު “ބަވަތި” ގެ އޮންލައިން މީޑިއާ ޕާޓްނަރުކަން ކުރީވެސް މުނިއަވަސް އިންނެވެ.
ލިޔުންތެރިޔާގެ ފުރަމަލަ
