ރެއާލް މެޑްރިޑާއި ބާސެލޯނާ ބައްދަލުކުރާ “އެލް ކްލެސިކޯ” މެޗަކީ ދުނިޔޭގެ އެންމެ ގިނަ އަދަދެއްގެ މީހުން ބަލާ އެއް ފުޓްބޯޅަ މެޗެވެ. އަދި ހަމަ އެހެންމެ އެއީ ފުޓްބޯޅައިގެ ދުނިޔޭގައި އެންމެ ވާދަވެރި އަދި އެންމެ ފޯރިގަދަ ފުޓްބޯޅަ މެޗު ކަމީ އެއްވެސް ޝައްކެއްނެތް ކަމެކެވެ.

މާދަމާ ރޭ އެލް ކްލެސިކޯ ގެ 243 ވަނަ މެޗުގައި ބާސެލޯނާ އަދި ރެއާލް މެޑްރިޑް ބައްދަލުކުރަން ތައްޔާރުވަމުން ދާއިރު، އެލް ކްލެސިކޯ ގެ ތާރީޚަށް އަލި އަޅުވާލައި  ހަނދާންތައް އާކޮށްލަމާ ހިނގާށެވެ. އެލް ކްލެސިކޯ ގެ ތާރީޚުގައި މި ދެޓީމު ރަސްމީކޮށް 242 ފަހަރު ވަނީ ބައްދަލުކޮށްފައެވެ. މީގެތެރެއިން 96 ފަހަރު ބާސެލޯނާ މޮޅުވެފައި ވާއިރު، ރެއާލް މެޑްރިޑް މޮޅުވެފައި ވަނީ 95 ފަހަރުގައެވެ. އަނެއް 51 މެޗު ނިމުނީ އެއްވަރުވެގެންނެވެ. ރަހުމަތްތެރިކަމުގެ 33 މެޗު ކުޅެފައިވާއިރު، ބާސެލޯނާ 19 މެޗުން މޮޅުވިއިރު، ރެއާލް މެޑްރިޑް މޮޅުވެފައި ވަނީ 4 މެޗުގައެވެ. އަނެއް 10 މެޗު ނިމުނީ އެއްވަރުވެގެންނެވެ. އެހެންކަމުން މުޅި ޖުމުލަ އަދަދުތަކަށް ބަލާއިރު، ބާސެލޯނާ 115 ފަހަރު މޮޅުވެފައިވާއިރު، ރެއާލް މެޑްރިޑް މޮޅުވެފައި ވަނީ 99 ފަހަރުގައެވެ. 61 މެޗު ނިމިފައި ވަނީ އެއްވަރުވެގެންނެވެ.

އެލް ކްލެސިކޯ މެޗެއްގެ ތެެރެއިން / ފޮޓޯ: ގެޓީ އިމޭޖެސް

އެލް ކްލެސިކޯ ގެ ތާރީޚުގައި ޖުމުލަ 768 ގޯލު ޖަހާފައިވެއެވެ. ރެއާލް މެޑްރިޑް 391 ގޯލު ޖަހާފައި ވާއިރު، ބާސެލޯނާ ވަނީ 377 ގޯލު ޖަހާފައެވެ. އެލް ކްލެސިކޯ ގެ ތާރީޚުގައި އެންމެ ގިނަ ގޯލު ޖެހުމުގެ ޝަރަފާއި، އެންމެ ގިނަ އެސިސްޓް ހެދި ކުޅުންތެރިޔާގެ ޝަރަފު އޮތީ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނެލް މެސީ އަތުގައެވެ. އޭނާ ވަނީ ޖުމުލަ 26 ގޯލާއި، 14 އެސިސްޓް ހަދާފައެވެ. މި ލިސްޓުގެ ދެވަނައިގައި 18 ގޯލާއެކު ރެއާލް މެޑްރިޑް ގެ ލެޖެންޑް އަލްފްރެޑޯ ޑީ ސްޓެފަނޯ އޮތްއިރު، ތިންވަނައިގައި 18 ގޯލާއެކު އޮތީ ކްރިސްޓިއާނޯ ރޮނާލްޑޯ އެވެ.

އެލް ކްލެސިކޯ މެޗެއްގައި މެސީ ގޯލްޖެހުމަށްފަހު އުފާފާޅުކުރަނީ / ފޮޓޯ: ގެޓީ އިމޭޖެސް

އެލް ކްލެސިކޯ ގެ ތާރީޚުގައި ތަފާތު 23 ކުޅުންތެރިން ޖުމުލަ 28 ހެޓްރިކް ހަދާފައިވެއެވެ. ޖެއިމީ ލަޒްކާނޯ، ސެންޓިއާގޯ ބެރްނެބެއޫ، ޕައުލީނިއޯ އަލްކަންޓާރާ އަދި ފެރެންކް ޕުސްކަސް އާއި އެކު އެލް ކްލެސިކޯ ގައި އެންމެ ގިނަ ހެޓްރިކް ހެދުމުގެ ޝަރަފު ވެސް އޮތީ މެސީ އަތުގައެވެ. މި ކުޅުންތެރިން ވަނީ ޖުމުލަ ދެ ހެޓްރިކް ހަދާފައެވެ. އެންމެ ގިނަ އެލް ކްލެސިކޯ މެޗު ކުޅެފައިވަނީ މެނުއެލް ސެންޗިސް، ފްރާންސިސްކޯ ގެންޓޯ، ޒަވީ އަދި ސާޖިއޯ ރާމޯސް އެވެ. މި ކުޅުންތެރިން ވަނީ 42 އެލް ކްލެސިކޯ ގައި ކުޅެފައެވެ.

އެލް ކްލެސިކޯ ގެ ތާރީޚަށް ނަޒަރު ހިންގާއިރު، ބާސެލޯނާ އަދި ރެއާލް މެޑްރިޑަށް ކުޅެފައިވާ، ފާހަގަކޮށްލެވޭ ކުޅުންތެރިންނަށް ބަލާލުމަކީ މުހިއްމުކަމެކެވެ. ލުއިސް ފީގޯ، ރޮނާލްޑޯ ނަޒާރިއޯ، ޖޫލެން ލޮޕެޓެގީ، ސަމުއެލް އެޓޫ، ހާވިއޭ ސަވިއޯލާ، ޖިއޮރްގޭ ހާޖީ، މައިކަލް ލައުޑްރަޕް، ލުއިސް އެންރީކޭ އަކީ ފާހަގަކޮށްލެވޭ ކުޅުންތެރިންނެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: