ކްރިސްޓަލް އެންޓަޓައިންމަންޓްގެ ފިލްމް “ބޮސް” ގެ ދެ ތީމް ލަވަ ރިލީޒް ކޮށްފައި ވާއިރު އެ ދެލަވަ އަށް އަންނަނީ ބޮޑު ތަރުޙީބެއް ލިބެމުންނެވެ.
އަންނަ އަންގާރ ދުވަހުގެ ރޭ ރިލީޒް ކުރާ މި ފިލްމުގައި އަމިއްލަ ރާގުގެ ޖުމްލަ އަށް ލަވަ ހިމެނެއެވެ. އެއިން ކޮންމެ ލަވައެއްގައި ފިލްމުގެ ވަރަށް އަސަރުގަދަ އަދި އެހާމެ މާނަ ފުން ވާހަކަތަކެއް ކިޔައިދޭނެ އެވެ. އޭގެ ތެރެއިންވެސް މިހާރު ރިލީޒް ކޮށްފައިވާ ދެ ތީމް ލަވަ ފާހަގަ ކޮށްލެވެއެވެ. މީގެ ތެރެއިން އެއް ލަވަޔަކީ އިބްރާހީމް ޒައިދު އަލީ (ކުޑައިއްބެ) ކިޔާފައިވާ ލަވައެކެވެ. “ލައްވާށި ރަހުމަތް” އަކީ އިއްބެގެ މިއުޒިކާއި މެލޮޑީ ތައްޔާރުކޮށްފައިވާ ލަވައެކެވެ. ލަވައިގެ ޅެން ހަދާފައި ވަނީ މައުސޫމް ޝާކިރެވެ.
“ބޮސް” ގެ ދެވަނަ ތީމް ލަވައިގެ މިއުޒިކާއި ޅެމާއި އަދި ލަވަ ކިޔާފައި ވަނީ މުހައްމަދު އަބްދުލްޣަނީ (ތޭރަވާ) އެވެ.
ފާތުމަތު ނަހުލާގެ ސްކްރީންޕްލޭއަކަށް، އޭނާ ޕްރޮޑިއުސްކޮށް، އައިޝަތު ރިޝްމީ ލައްވައި ޑައިރެކްޓް ކުރި ފިލްމްގެ އަނެއް ހަ ލަވަ މީގެ ކުރިން އާންމުންނަށް ސައުންޑް ކްލައުޑާއި މައި ޓޯންސް މެދުވެރިކޮށް ވަނީ ދޫކޮށްލައިފަ އެވެ. “ބޮސް”ގެ ލަވަތައް ކިޔާފައި ވަނީ ރާފިޔަތު ރަމީޒާ، މާއިން ރަޝީދު، މަރިޔަމް އަޝްފާ ޝަލަބީ އިބްރާހީމް، ހަމޫދު އަހުމަދު އަދި މުހައްމަދު ނަބީލެވެ.
އަސަރު ގަދަ ލޯބީގެ ވާހަކައަކަށް ހަދާފައިވާ ފިލްމުގެ ލަވަތަކުގެ މިއުޒިކް ހަދާފައިވަނީ ކުޑައިއްބެ އާއި ތޭރަވާގެ އިތުރުން އަބްދުﷲ އަބްދުލް ފައްތާހް (ފަތޯ)، މިސްޓީ އަދި މުނާޒްގެ އިތުރުން ހުސައިން ސޮބާހެވެ.
ނަހުލާ ބުނީ “ބޮސް” ގެ މަސައްކަތް މިހާރު އެއްކޮށް ނިމިފައިވާ ކަމަށާއި ފިލްމާ ދޭތެރޭ އޭނާ ހުރީ ވަރަށް ހިތްހަމަޖެހިފައި ކަމަށެވެ. އަދި ރިޝްމީ ފިލްމަށް ކޮށްފައި ހުރި މަސައްކަތް ވަރަށް ފުރިހަމަ ކަމަށް ވެސް ބުންޏެވެ.
“ދިވެހި ފިލްމަށް ލޯބި ކުރާ މީހުން އެބަތިބި އަހަރެންގެ ޔޫސުފަށް ފަހު ދެން ދިވެހި ފިލްމު ބެލުން ހުއްޓާލައިގެން ތިބި މީހުން،” ނަހުލާ ބުންޏެވެ. “ބޮސް އަކީ އެ މީހުން ވެސް އަލުން ދިވެހި ފިލްމް ބަލަން ފަށާނެ ވަރުގެ ފިލްމެއް.” އެހެންވެ ވީހާ ވެސް އަވަހަކަށް ޓިކެޓް ނަގައިގެން ފިލްމް ބެލުމަށް އޭނާ އެދުނެވެ.
ފިލްމާ ބެހޭ ގޮތުން ރިޝްމީ ބުނީ ނަހުލާގެ “ޓަޗް” ފިލްމަށް ގެންނަން އޭނާ އަށް ކުރެވުނު ހުރިހާ މަސައްކަތެއްކޮށްފައި ހުންނާނެ ކަމަށާއި ކުރެވުނު މަސައްކަތާ ދޭތެރޭ 98 ޕަސަންޓް ހިތްހަމަޖެހޭ ކަމަށެވެ.
“އެކަމަކު އޮލިމްޕަހުގައި ފިލްމް ބަލާފައި ނަހޫގެ މޫނުމައްޗަށް އަންނަ ކުލަވަރަކުން އަހަރެން ގަބޫލު ކުރާނީ ނަހޫ ބޭނުންވި ގޮތަށް އަހަންނަށް މިއަށް ސަތޭކަ ޕަސަންޓް ދެވިފައިވާ ކަމަށް،” އޭނާ ބުންޏެވެ.
“ބޮސް” ގެ ލީޑް ރޯލް ކުޅެފައި ވަނީ އަލަށް ތައާރަފުވާ މުހައްމަދު ޔުނާންއާ އެކު މަރިޔަމް އައްޒަ އެވެ. އަދި ފިލްމުން އިބްރާހީމް ޖިހާދު (ޖިމީ)، ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ) އަދި ޝަމީލް ވެސް ފެނިގެން ދާނެ އެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
