ވިޓަމިން އާއިލާއިން އެންމެ މަޤްބޫލު ވިޓަމިނަކީ ވިޓަމިން ސީ އެވެ. އެއާ ޖެހިގެންވިޓަމިން އޭ، ބީ، ޑީ، އީ އަދި ކޭ އެވެ. އެކަމަކު ވިޓަމިން އެފް އޭކިޔާ ވިޓަމިނެއްގެ ވާހަކަ މީގެ ކުރިން އަޑުއެހިން ހެއްޔެވެ؟

އާއްމު އުޞޫލުން ބަލާއިރު، އެފް އަކީ ވިޓަމިނެއް ނޫނެވެ. ވިޓަމިން އެފް އަކީ ހަމަ އެކަނި ފެޓްސްގެ ދެ މާއްދާ އަކަށް ބޭނުންކުރާ ލަފުޒެކެވެ. އެއީ އަލްފާ–ލިނޯލެނިކް އެސިޑް (އޭއެލްއޭ) އާއި ލިނޯލެއިކް އެސިޑް (އެލްއޭ) އެވެ. މިއީ ހަށިގަނޑު އެތަކެއް މަސައްކަތްތަކަކަށް ބޭނުންވާ ދެ މާއްދާއެކެވެ. ޚާއްޞަގޮތެއްގައި ސިކުނޑިއާއި ހިތުގެ މަސައްކަތަށް މުހިންމުކަން ބޮޑެވެ. އޭއެލްއޭ އަކީ އޮމެގާ-3 ފެޓީ އެސިޑް އާއިލާއަށް ނިސްބަތްވާ ކީމި މާއްދާއެކެވެ. އެލްއޭ އަކީ އޮމެގާ-6 ފެޓީ އެސިޑެކެވެ.

ވިޓަމިން އެފް ހޯދުނު ގޮތަކީ ޝައުޤުން ފުރިގެންވާ ކަމެކެވެ. 1920 ވަނަ އަހަރު ފެޓް–ފްރީ ޑަޔަޓުން މީދަލަށް ނައްސި އަސަރުތަކެއް ކުރާކަން ސައިންސްވެރިން ތަކަކަށް އެނގުނެވެ. އެކަން އެހެން ދިމާވަނީ ވިޓަމިން އެފްގެ ނަން ދީފައިވާ ވިޓަމިން މަދުވުމުން ކަމަށް އެމީހުން ހީކުރިއެވެ. އަލަށް މި ހޯދުނު ވިޓަމިން އެފް އަކީ އޭއެލްއޭ އާއި އެލްއޭ ކަން އެމީހުންނަށް އެނގުނެވެ.

ވިޓަމިން އެފް ގެ މަސްއޫލިއްޔަތު ތަކަކީ ކޮބާ؟

އޭއެލްއޭ އާއި އެލްއޭ ދަރަޖަކޮށްފައި ވަނީ މުހިންމު ފެޓީ އެސިޑްސްގެ ގޮތުގައެވެ. އެއީ އިންސާނާގެ ހަށިގަނޑުގައި މި ފެޓީ އެސިޑްތައް އަދާކުރާދައުރުގެ ސަބަބުންނެވެ. ފުރަތަމަ ކަމަކަށް، މިއީ ކެލޮރީސް ލިއްބައިދޭ ވަޞީލަތްތަކެކެވެ. އޭއެލްއޭ އާއި އެލްއޭ ގެ ކޮންމެ ގްރާމެއްގައި 9 ކެލޮރީސް ހުރެއެވެ. ހަށިގަނޑުގައި ހުންނަ ސެލްތަކަށް އޮނިގަނޑަކާއި ފަހެލިކަން އެއިން ލިއްބައިދެއެވެ. އެލްއޭއެލް މައިގަނޑުގޮތެއްގައި ގުޅިފައިވަނީ ހެދިބޮޑުވުން، ލޮލުގެ ފެނުން ރަނގަޅުކޮށްދިނުމާއި ސިކުނޑި ތަރައްޤީކޮށްދިނުމާއެވެ. މި ފެޓްސްގެ އެންމެ ރަނގަޅު ކަމަކީ ހަށިގަނޑުގައި ހުންނަ އެ ފެޓްސް، ފެޓްސް ބޭނުންވާ އެހެން ބޭނުންތަކަށް ބަލައި އެހެން ވައްތަރުތަކުގެ ފެޓްސްއަށް ބަދަލުކޮށްދޭތީއެވެ.

ވިޓަމިން އެފް އަކީ ލޭގެ ޕްރެޝަރު ހަމަޖައްސައިދިނުމަށް، ލޭ ގަނޑުކޮށްދިނުމަށް، ދަމަނަކުރުމަށާއި އެހެނިހެން ފިސިއޮލޮޖިކަލް ކަންތައްތަކަށް ވެސް ހަރަކާތްތެރިވާ އެއްޗެކެވެ. އިތުރު އެހެން ފައިދާތަކުގެ ތެރޭގައި ހުޅުހުޅާއި ފުއްޕާމޭ އަދި ސިކުނޑީގައި އުފެދޭ އިންފްލެމޭޝަން ކުޑަކޮށްދިނުން، ކާޑިއޯވަސްކިއުލާ މައްސަލަތައް ކުރިމަތިވުން ދަށްކޮށްދިނުން، ހާސްވުމާއި ކަންބޮޑުވުން ނައްތައިލުން ހިމެނެއެވެ.

ވިޓަމިން އެފް ލިއްބައިދޭ ވަޞީލަތްތަކަކީ ކޮބާ؟

އަހަރުމެންގެ ހަށިގަނޑުން އޭއެލްއޭ އާއި އެލްއޭ އުފަދައެއް ނުދެއެވެ. އެހެންކަމުން ވިޓަމިން އެފް ލިބޭނީ އަހަރުމެން ކާ ކާނާއިންންނެވެ. ވިޓަމިން އެފް މަދުވުމުގެ މައްސަލައަކީ ވަރަށް މަދުން ކުރިމަތިވާ ކަމެއް ނަމަވެސް، އެއީކީ ނުވާ ކަމެއް ނޫނެވެ. އޭއެލްއޭ އާއި އެލްއޭ މަދުވުމުން ހަންގަނޑު ހިކި ކުރަކިވުން، އިސްތަށި ފޭބުން، ތުއްތުކުދިން ހެދިބޮޑުވުން ލަސްވުން، ހަންގަނޑު ޒަޚަމްވުން، ފާރު ހިކުން ލަސްވުން، ސިކުނޑީގެ ހެދިބޮޑުވުން ލަސްވުމާއި ލޮލުގެ ފެނުން ފުސްވުން ހިމެނެއެވެ. އެހެންކަމުން މި ވިޓަމިނާ މެދު ފަރުވާކުޑަކޮށްލުމަކީ ރަނގަޅުގޮތެއް ނޫނެވެ.

ވިޓަމިން އެފް ލިއްބައިދޭ އެންމެ ރަނގަޅު ކާނާގެ ތެރޭގައި ސޯއީބީން ތެޔޮ (ކޮންމެ މޭޒުމަތީސަމުސަލެއްގައި 7 ގްރާމުގެ އެލްއޭ)، ފްލެކްސް އޮށުގެތެޔޮ (ކޮންމެ މޭޒުމަތީސަމުސަލެއްގައި 7 ގްރާމުގެ އޭއެލްއޭ)، ޝިއާ އޮށް (ކޮންމެ އައުންސެއްގައި 5 ގްރާމުގެ އޭއެލްއޭ)، ޒައިތޫނި ތެޔޮ (ކޮންމެ މޭޒުމަތީ ސަމުސަލެއްގައި 10 ގްރާމުގެ އެލްއޭ)، ޒުވާރި ތެޔޮ (ކޮންމެ މޭޒުމަތީ ސަމުސަލެއްގައި 7 ގްރާމުގެ އެލްއޭ)، ސަންފްލާވަރ އޮށް (ކޮންމެ އައުންސެއްގައި 7 ގްރާމުގެ އެލްއޭ)، ޕެކާންސް (ކޮންމެ އައުންސެއްގައި 6 ގްރާމުގެ އެލްއޭ) އާއި އާމަންޑްސް (ކޮންމެ އައުންސެއްގައި 3.5 ގްރާމު) ހިމެނެއެވެ.

މަހާއި ބިސް އަދި އެއްގަމު މަހުގައި ވެސް އޭއެލްއޭ އާއި އެލްއޭ ހުރެއެވެ. އެމެެރިކާގެ ނޭޝަނަލް އިންސްޓިޓިއުޓް އޮފް ހެލްތުގެ ގައިޑްލައިންތައް ބުނާގޮތުން، ވިޓަމިން އެފް ގެ ފައިދާ އެންމެ އެދެވޭ މިންވަރަށް ބޭނުންނަމަ އަހަރުމެންގެ ކެއުމުގައި އެލްއޭ އާއި އޭއެލްއޭގެ ރޭޝިއޯ ހުންނަންޖެހޭނީ 4:1 އަށެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: