ހަނިމާދޫ ޒުވާނުންގެ ޖަމުޢިއްޔާއިން އިންތިޒާމު ކޮށްގެން ކުރިއަށް ގެންދާ އާދަމް ސަލީމް ކަޕް 2019 ފުޓްބޯޅަ މުބާރާތުގެ ސާދަވަނަ މެޗު ފަސޭހަ ކަމާއިއެކު ރިއަލް ސްޓާރސް ކާމިޔާބުކޮށްފިއެވެ.

އިއްޔެ ހަވީރު ހަނިމާދޫ ރަސްމީ ފުޓްބޯޅަ ދަނޑުގައި ކުޅުނު މި މެޗު ޔުނީފޯމާއި ވާދަކޮށް ރިއަލް ސްޓާރސް ކާމިޔާބުކޮށްފައިވަނީ 3-0 ގެ ނަތީޖާއަކުންނެވެ.

މުޅި މެޗު ކޮންޓްރޯލު ކޮށްގެން މޮޅަށް ކުޅެފައިވަނީ ރިއަލް ސްޓާރސް ޓީމުންނެވެ. ފުރަތަމަ ލަނޑު ފެނިގެން ގޮސްފައިވަނީ ފުރަތަމަ ހާފުގެ 8 ވަނަ މިނެޓުގައެވެ. މި ލަނޑު ކާމިޔާބު ކޮށްފައިވަނީ ރިއަލް ސްޓާރސްގެ ޖޯޒީ ނަންބަރު 10 ނޫރުﷲ ޠާހާއެވެ. ދެވަނަ ލަނޑަކީ ޔުނީފޯމުގެ ހުސެއިން އަހުމަދު އަތުން ބައިކޮޅަށް ވަދެފައިވާ ލަނޑެކެވެ. ފުރަތަމަ ހާފު ނިމިގެން ގޮސްފައިވަނީ 2-0 ގެ ނަތީޖާއަކުން ރިއަލް ސްޓާރސް ކުރީގައި އޮވެގެންނެވެ.

މެޗުގެ ފަހު ހާފުގައި ވެސް ރިއަލް ސްޓާރސް އިން ވަނީ މޮޅަށް ކުޅެ ގިނަ ހަމަލާތަކެއް އުފައްދާފައެވެ. ނަމަަވެސް ފަހު ހާފުގައި އެ ޓީމަށް ކާމިޔާބު ކުރެވިފައިވަނީ އެންމެ ލަނޑެކެވެ. އެ ލަނޑު ކާމިޔާބު ކޮށްފައި ވަނީ 78 ވަނަ މިނެޓުގައި އެ ޓީމުގެ ޖޯޒީ ނަންބަރު 5 އަބްދުﷲ މިސްބާހުއެވެ.

މުބާރާތް ރާވާލެވިފައި ވަނީ ކޮންމެ ޓީމެއް ކޮންމެ ޓީމަކާއި ވާދަކޮށް އެންމެ ގިނަ ޕޮއިންޓު ހޯދާ ޓީމަށް ފައިނަލުގެ ފުރަތަމަ ޖާގަ ލިބިގެންދާ ގޮތަށެވެ. އަދި ދެވަނަ އަދި ތިންވަނަ ޓީމު ސެމީ ފައިނަލު ކުޅެ އެތަނުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބޭ ގޮތަށެވެ.

މިއަދު ގުރޫޕު ސްޓޭޖު ފަހު މެޗަށް ޝީލްޑު އަދި ޔޫތު ފުރެންޑްސް ނުކުންނައިރު މުބާރާތުގެ ގުރޫޕު ސްޓޭޖު މެޗުތަކުން އެއްވަނަ ލިބޭ ޓީމާއި، ދެވަނަ އަދި ތިންވަނަ ލިބޭ ޓީމެއް ވެސް އެނގިގެން ދާނީ މިއަދުގެ މެޗަށް ފަހުއެވެ. ކުޅުނު ފަސްމެޗުން ދިހަ ޕޮއިންޓް ހޯދައިގެން އެއްވަނައިގައި މި ވަގުތު ރިއަލް ސްޓާރސް އޮތްއިރު، ދެވަނައިގައި ހަތަރު މެޗުން ހަމަ އެ އަދަދަށް ޕޮއިންޓު ހޯދައިގެން އޮތީ ޝީލްޑެވެ. އަހުލީ ފަސް މެޗުން އަށް ޕޮއިންޓު ހޯދައިގެން ތާވަލުގެ ތިންވަނައިގައި އޮތްއިރު، ހަތަރު މެޗުން ލިބުނު ފަސް ޕޮއިންޓާއިއެކު ތާވަލުގެ ހަތަރުވަނައިގައި އޮތީ ޔޫތު ފުރެންޑްސްއެވެ.

މިއަދުގެ މެޗުން ޕޮއިންޓެއް ހޯދައިގެން، ޕޮއިންޓު ތާވަލުގެ އެއްވަނަ ހޯދުމުގެ ފުރުޞަތު ޝީލްޑަށް އޮތްއިރު، މުބާރާތުގެ ސެމީފައިނަލުގެ ޖާގައެއް ކަށަވަރު ކުުރުމަށް މިއަދުގެ މެޗުން ތިން ޕޮއިންޓު ހޯދުން  ޔޫތު ފުރެންޑްސް އަށް ވަނީ މަޖުބޫރު  ވެފައެވެ. މިއަދު މެޗުން ޝީލްޑު މޮޅުވެއްޖެނަމަ ފައިނަލުގެ ފުރަތަމަ ޖާގަ ޝީލްޑަށް ލިބި ދެވަނަ ރިއަލް ސްޓާރސް އަށް ލިބި ތިންވަނަ ލިބިގެން ދާނީ އަހުލީއަށެވެ. މިއަދުގެ މެޗުން ޔޫތު ފުރެންޑްސް މޮޅުވެއްޖެނަމަ އެއްވަނަ ލިބިގެންދާނީ ރިއަލް ސްޓާރސްއަށެވެ.  ދެވަނަ ޝީލްޑަށް އަދި ތިންވަނަ ލިބިގެން ދާނީ ޔޫތު ފުރެންޑްސްއަށެވެ.

އިއްޔެ މެޗުގެ މޮޅު ކުޅުންތެރިޔަކަށް ހޮވިފައިވަނީ ރިއަލް ސްޓާރސް ޓީމުގެ ޖޯޒީ ނަންބަރު 10 ނޫރުﷲ ޠާހާއެވެ.

މޮޅުކުޅުންތެރިޔާ އަށް ޓްރޮފީ ހަވާލުކޮށްދެއްވަނީ / ފޮޓޯ: އައި ކްލިކް ސްޓޫޑިއޯ

މި މުބާރާތުގެ ގުރޫޕު ސްޓޭޖުގެ ފަހު މެޗުގައި މިއަދު ވާދަކުރާނީ ޔޫތު ފުތެންޑްސްއާއި ޓީމު ޝީލްޑެވެ. ފޯރިގަދަވާނެ ކަމަށް ބެލެވިފައިވާ މި މެޗު ފެށުމަށް ހަމަޖެހިފައިވަނީ 16:00 ގައެވެ.

ލިޔުންތެރިޔާގެ ފުރަމަލަ

އިބްރާހިމް ޚަލީލް
އިބްރާހިމް ޚަލީލް
މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.

ގުޅުންހުރި ލިޔުން: